ކަންކަމާ ވިސްނާ، ކަންބޮޑުވެ، ފިކުރު ބޮޑުވާ މީހުންނަށް ޚާއްސަކޮށް ޢިލްމީ އަދި ދީނީ ނަޒަރިއްޔާތުން ކަންކަން ކުރާނެ ގޮތް ބަޔާންކޮށް، ޑރ.އަނާރާ ނަޢީމް ފޮތެއް ނެރުއްވައިފިއެވެ. ޤައުމީ ކުތުބުޚާނާގައި ބޭއްވި ހަފްލާއެއްގައި "ފިކުރު ބޮޑުވުމާއި އެކަމުގެ ޙައްލު"ގެ ނަމުގައި ލިޔެފައިވާ މި ފޮތް ނެރެދެއްވީ ކްލިނިކަލް ސައިކޮލިޖިސްޓް ޑރ.އައިޝާތު ޢަލީ ނާޒްއެވެ.
ފޮތް ނެރުއްވުމަށްފަހު ވާހަކަދައްކަވަމުން ޑރ.އަނާރާ ނައީމް ވިދާޅުވީ މި ފޮތް ލިޔުމުގެ ޚިޔާލު އައިސްފައިވަނީ، ކޯވިޑް 19ގެ ޙާލަތުގެ ތެރެއިންކަމަށެވެ. ގޭގައި ބަންދުވެ ދިރިއުޅުމަށް އައި ބަދަލުގައި އެތަށް ބަޔަކަށް ނަފްސާނީ މައްސަލަތަކާއި ކުރިމަތިވަމުންދިޔަކަން ޑރ.އަނާރާ ފާހަގަކުރެއްވިއެވެ. އަދި ކަންކަމާއި ވިސްނާ ފިކުރުބޮޑުވުން އިތުރުވުމާއި، އެފަދަ ޙާލަތްތަކުގައި ކަންކުރަންވީ ގޮތް ނޭނގި ތިބި އެތަށް ބަޔަކު ރާއްޖޭގައި ތިބިކަން ހާމަވިކަމަށާއި، ހާސްވެ ކަންބޮޑުވާ ޙާލަތުގައި، އެކަމަށް ޙައްލު ހޯދޭނީ ކިހިނެތްތޯ އަހާ، އެތަށް ބައެއްގެ ސުވާލުތައް ކުރިމަތިވިކަށްވެސް ޑރ.އަނާރާ ވިދާޅުވިއެވެ.
ޑރ.އަނާރާ ވިދާޅުވީ، ކުދިކުދި ކަންކަމާވެސް މީހުން ފިކުރު ބޮޑުވާ މިންވަރު އިތުރުވެ އެކަމަށް، ޙައްލު ހޯދޭނެ ގޮތެއް ނޭނގޭ އެތައް ބަޔަކު އުޅޭކަމަށާއި، އެހެންކަމުން މި ނެރުނު ފޮތުން އެފަދަ އެތަށް ސުވާލެއްގެ ޖަވާބު ލިބޭނެކަމަށްވެސް ޑރ.އަނާރާ ވިދާޅުވިއެވެ.
"މި ފޮތް ކިޔާ މީހާއަށް އެބަ ބުނެދެވޭ އަމިއްލައަށް އެފަދަ މައްސަލަތަކާއި ކުރިމަތިލާނެގޮތް. ކުރެވޭނީ ކީއްކަން. އިސްލާމީ ޝާރިޢަތުގެ ޢަލީގައި، އެފަދަ ޙާލަތްތަކުގައި ހިތްވަރު ހޯދޭނެ ގޮތްތައް ލިޔެފައިވާނެ. ކުރެހުންތަކާއި ވާހަކަތައް ހުންނާނެ." ޑރ.އަނާރާ ވިދާޅުވިއެވެ.
ޑ.އަނާރާ ވިދާޅުވީ މި ފޮތް ލިޔުމުގައި ނަފްސާނީ ދުޅާހެޔޮކަމާއިގުޅޭ މާހިރުންނާއި، ޑޮކްޓަރުންނާއި އަދި ދީނީ ގޮތުން ކަން އޮންނަ ގޮތް ބެލުމަށް މުހިންމު ދިރާސާތަކެއް ކޮށްފައިވާކަމަށެވެ.
މި ފޮތުގެ ކޮޕީ ޤައުމީ ކުތުބުޚާނާއާއި، އެހެނިހެން ލައިބްރަރީތަކާއި ފޮތް ވިއްކާ ފިހާރަތަކުން ލިބޭނެއެވެ.