ޔޫކްރެއިނަށް އަސްކަރީ އެހީ ފޯރުކޮށްދިނުމަށް ކުރަމުންދާ މަސައްކަތުގެ ދަށުން އެ ޤައުމަށް 321 ހަނގުރާމަމަތީ ޓޭންކު ފޮނުވަން އެހީދޭ ޤައުމުތަކުން އެއްބަސްވެފައިވާ ކަމުގައި ފަރަންސޭސިވިލާތުގައި ހުންނަވާ ޔޫކްރެއިނުގެ ސަފީރު ވިދާޅުވެއްޖެއެވެ. ޔޫކްރެއިނަށް އަރާފައިވާ ރަޝިޔާ ސިފައިން ފަހަތަށް ޖައްސައި، އެ ޤައުމުގެ މިނިވަންކަން ދިފާޢު ކުރުމަށް ބަރުހަތިޔާރާއި އެންމެ ޒަމާނީ ޓޭންކު ހޯދުމަށް އެ ޤައުމުގެ ރައީސް ވޮލޮޑޮމީރް ޒެލެންސްކީ ގެންދަވަނީ މަސައްކަތް ކުރައްވަމުންނެވެ.
އެންމެ ފަހުގެ ޒަމާނީ ޓޭންކުތައް ޔޫކްރެއިނަށް ފޮނުވަން މިއަދާ ހަމައަށް އެމެރިކާއާއި ހުޅަނގުގެ ބާރުތަކުން ވަނީ ދެކޮޅު ހަދާފައެވެ. ނަމަވެސް، ހުސްވި ހަފުތާގައި ނޭޓޯގެ ޤައުމުތަކުން ވަނީ ޒަމާނީ ޓޭންކުތައް ވެސް ޔޫކްރެއިނަށް ފޮނުވަން އެއްބަސްވެފައެވެ. މި ޤައުމުތަކުގެ ތެރޭގައި އެމެރިކާ، ޖަރުމަނުވިލާތް، ފަރަންސޭސިވިލާތް، އިނގިރޭސިވިލާތް އަދި ޕޮލެންޑު ހިމެނެއެވެ.
"321 ޓޭންކު ޔޫކްރެއިނަށް ފޮނުވަން ޤައުމުތަކުން ވަނީ އެއްބަސްވެފައި. ހަނގުރާމައިގައި ކާމިޔާބީ ލިބޭނީ އެ ތަކެތި ލިބިގެން. އެހެންވުމުން، ވީ އެންމެ އަވަހަކަށް ޓޭންކުތައް ހޯދުމަށް މި ދަނީ މަސައްކަތް ކުރަމުން،" ފަރަންސޭސިވިލާތުގައި ހުންނަވާ ޔޫކްރެއިނުގެ ސަފީރު ވަޑީމް އޮމެލްޗެންކޯ ވިދާޅުވިއެވެ.
އެންމެ ފަހުން ޔޫކްރެއިނަށް ޒަމާނީ ޓޭންކު ފޮނުވަން އެއްބަސްވެފައި ވަނީ ޕޮލެންޑުންނެވެ. އެ ޤައުމުން ވަނީ 60 ޓޭންކު ޔޫކްރެއިނަށް ފޮނުވާނެ ކަމަށް ބުނެފައެވެ. މީގެ ތެރޭގައި ޖަރުމަނުވިލާތުގައި އުފައްދާ "ލެޕަޑް 2" މަރުކާގެ 14 ޓޭންކު ވެސް ހިމެނޭނެއެވެ.
މީގެ ކުރިން ވެސް ޕޮލެންޑުން ވަނީ ލެޕަޑް މަރުކާގެ ޓޭންކު ޔޫކްރެއިނަށް ފޮނުވަން މަސައްކަތް ކޮށްފައެވެ. ނަމަވެސް، ޖަރުމަނުވިލާތުގެ ހުއްދަ ނުލިބުމުގެ ސަބަބުން އެ ކަމަށް އޮތީ ހުރަސްއެޅިފައެވެ. ޕޮލެންޑުން މީގެ ކުރިން ވަނީ ޔޫކްރެއިނަށް 250 ޓޭންކު ފޮނުވާފައެވެ. ޕޮލެންޑުން މިހާރު ފޮނުވަން ތައްޔާރުވެފައިވާ ޓޭންކުތަކުގެ ތެރޭގައި ހިމެނެނީ "ޕީ.ޓީ-91" މަރުކާގެ ޓޭންކު ވެސް ހިމެނެއެވެ.
މީގެ އިތުރުން، އެމެރިކާގެ އަސްކަރިއްޔާއިން ބޭނުންކުރާ "އެބްރާމްސް" މަރުކާގެ ޓޭންކު ޔޫކްރެއިނަށް ފޮނުވާނެ ކަން އިޢުލާނުކޮށްފައިވާއިރު، ޖަރުމަނުވިލާތުން ވެސް ވަނީ އެ ޤައުމުގައި އުފައްދާ "ލެޕަޑް 2" މަރުކާގެ ޓޭންކު ޔޫކްރެއިނަށް ފޮނުވަން ނިންމާފައެވެ.
އެމެރިކާގެ ސަރުކާރުގެ އިސް ވެރިޔަކު ވިދާޅުވީ، އެބްރާމްސް މަރުކާގެ 31 ޓޭންކާ އެކު، 100 އަށްވުރެ ގިނަ އަސްކަރީ އުޅަނދު ޔޫކްރެއިނަށް ފޮނުވުމުގެ މަސައްކަތް ފަށާފައިވާ ކަމުގައެވެ. އަދި ޖަރުމަނުވިލާތުން ފޮނުވާ ފުރަތަމަ ޝިޕްމަންޓްގެ ތެރޭގައި 14 ޓޭންކު ހިމެނޭނެއެވެ.
ޔޫކްރެއިނުގެ ސިފައިން ވަނީ، އެ ޤައުމަށް އަރައި ހަނގުރާމަ ކުރަމުންދާ ރަޝިޔާގެ ފައުޖުތައް ފަހަތަށް ޖެއްސުމަށް އަސްކަރީ ކެމްޕޭނެއް ފެށުމަށް ތައްޔާރުވަމުންނެވެ. ނޭޓޯގެ ޤައުމުތަކުން ފޮނުވާ ހަތިޔާރުތަކާ އެކު، ޔޫކްރެއިނުގެ އަސްކަރީ ކެމްޕޭން އިތުރަށް ވަރުގަދަވެގެންދާނެ ކަމަށް މަސްރަޙު ދިރާސާކުރާ ފަރާތްތަކުން ޤަބޫލުކުރެއެވެ.
އެމެރިކާއާއި ޖަރުމަނުން ޔޫކްރެއިނަށް އެބްރާމްސްއާއި ލެޕަޑް މަރުކާގެ ޓޭންކު ފޮނުވާނެ ކަމަށް ބުނެފައިވާއިރު، އިނގިރޭސިވިލާތުން ވެސް ވަނީ އެ ޤައުމުގެ އަސްކަރިއްޔާއިން ބޭނުންކުރާ "ޗެލެންޖަރ 2" މަރުކާގެ ޓޭންކުތައް ޔޫކްރެއިނަށް ފޮނުވާނެ ކަން އިޢުލާނުކޮށްފައެވެ. މި ހަތިޔާރުތަކާ އެކު، ރަޝިޔާގެ އަސްކަރިއްޔާއިން ޔޫކްރެއިނަށް ފޮނުވާފައިވާ "ޓީ-72" އަދި "ޓީ-90" މަރުކާގެ ޓޭންކުތަކުގެ މައްޗަށް ކުރިހޯދަން ފަސޭހަވެގެންދާނެ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.