އަންނަ ރިޔާސީ އިންތިޚާބުގައި ވާދަކުރާނެ ކެނޑިޑޭޓަކު ހޮވުމަށް ބާއްވާ އެމްޑީޕީގެ ރިޔާސީ ޕްރައިމަރީގައި ވާދަކުރައްވާ ދެ ކެނޑިޑޭޓުންވެސް ވޯޓު ދެއްވައިފިއެވެ.
މި ޕްރައިމަރީގައި ވާދަކުރައްވަނީ އެމްޑީޕީގެ އެންމެ އިސް ލީޑަރު އަދި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި، އެމްޑީޕީގެ ރައީސް މުޙައްމަދު ނަޝީދެވެ.
މި ޕްރައިމަރީއަކީ އެމްޑީޕީން ފަހުގެ ތާރީޚެއްގައި ބާއްވާ އެންމެ ވާދަވެރި އިންތިޚާބެވެ. އަދި ދެ ބާރުގެ ވެރިން ޕްރައިމަރީގައި ވާދަކުރައްވާ ފުރަތަމަ ފަހަރުވެސްމެއެވެ.
ހެނދުނު 9 ޖެހިއިރު ޕްރައިމަރީގެ ވޯޓުލުން ފެށުމަށްފަހު ފެނިގެންދަނީ ރާއްޖޭގެ އެކި ކަންކޮޅުތަކުގައ ވަރަށް ފޯރިއާއި ވާދަވެރިކަމާއެކު އިންތިޚާބުގެ ކަންކަން ކުރިއަށްދާތަނެވެ. ޚާއްޞަކޮށް ވޯޓުލާ މަރުކަޒުތަކުގައި ބޮޑެތި ކިއުތައް އެބައޮތެވެ.
މި ޕްރައިމަރީގައި ވާދަކުރައްވާ ދެ ކެނޑިޑޭޓުންވެސް މިހާރު ވަނީ ވޯޓު ދެއްވާފައެވެ. އެގޮތުން ރައީސް އިބްރާހީމް މުޙައްމަދު ޞާލިޙް ވޯޓު ދެއްވީ އިސްކަންދަރު ސްކޫލުގައި ބަހައްޓާފައިހުރި ހިންނަވަރު ރައްޔިތުން ވޯޓުލުމަށް ޚާއްޞަ ވޯޓު ފޮއްޓަށެވެ.
އަދި ރައީސް ނަޝީދު ވޯޓު ދެއްވީ ގަލޮޅު އުތުރު ދާއިރާގެ އެމްޑީޕީ މެންބަރުންނަށް ޚާއްޞަކޮށް ޖަމާލުއްދީން ސްކޫލްގައި ބަހައްޓާފައިހުރި ފޮއްޓަށެވެ.
އެމްޑީޕީން ބުނީ ބައެއް މަރުކޒުތަކުގައި ޝަކުވާ ހުރިނަމަވެސް، ވޯޓުލުމުގެ ކަންކަން ކުރިއަށްދަނީ ސުލްހަވެރިކަމާއެކުކަމަށެވެ. ވޯޓުލުން ނިމޭނީ ހަވީރު 5 ޖަހާއިރުއެވެ. އަދި އިރުއޮއްސޭއިރު ޕްރައިމަރީ ކާމިޔާބުކުރެއްވި ކެނޑިޑޭތެއް ކަށަވަރުވާނެކަމަށް ބެލެވެއެވެ.
ދެ ކެނޑިޑޭޓުންވެސް ވަނީ އިންތިޚާބު ކާމިޔާބުކުރެއްވޭނެކަމަށް ވިދާޅުވެފައެވެ.