ސެޕްޓެމްބަރު މަހު އޮންނަ ރިޔާސީ އިންތިޚާބުގައި އެމްޑީޕީގެ ފަރާތުން ވާދަކުރާނެ ކެނޑިޑޭޓަކު ހޮވުމަށް ބާއްވާ ރިިޔާސީ ޕްރައިމަރީގެ ވޯޓުލުން ފަށައިފިއެވެ.
އެމްޑީޕީގެ ރިޔާސީ ޕްރައިމަރީގައި ވާދަކުރައްވަނީ އެޕާޓިގެ އެންމެ އިސްލީޑަރު އަދި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި، އެމްޑީޕީގެ ރައީސް މުޙައްމަދު ނަޝީދެވެ. މިއީ ދައުލަތުގެ ދެ ބާރެއްގެ ވެރިޔަކު ޕާޓީއެއްގެ ޕްރައިމަރީގައި ވާދަކުރައްވާ ފުރަތަމަ ފަހަރުވެސްމެއެވެ. އަދި މިއީ އެޕާޓީގެ ތާރީޚުގައިވެސް ބާއްވާ އެންމެ ވާދަވެރި ރިޔާސީ ޕްރައިމަރީއެވެ.
މި ޕްރައިމަރީގެ ވޯޓުލުން ފަށާފައިވަނީ ހެނދުނު 9 ޖެހިއިރެވެ. ވޯޓުލުން 5 ޖެހުމާއި ހަމައަށް ކުރިއަށްދާނެއެވެ.
މި އިންތިޚާބުގައި 200 އަށް ވުރެ ގިނަ ވޯޓު ފޮށި މާލެއާއި އަތޮޅުތަކުގައި އެމް.ޑީ.ޕީން ވަނީ ބަހައްޓާފައެވެ. އެގޮތުން މާލެ ސަރަހައްދުގައި ޖުމްލަ 49 ވޯޓު ފޮށި ބަހައްޓާފައިވާއިރު، އަތޮޅުތެރޭގައި 194 ވޯޓު ފޮށި ބަހައްޓާފައިވެއެވެ.
އެ ޕާޓީން ޢާންމުކޮށްފައިވާ ވޯޓާސް ލިސްޓުގައިވާގޮތުން 57،257 މީހުންންނަށް މި އިންތިޚާބުގައި ވޯޓު ލެވޭނެއެވެ. މިއީ ސިޔާސީ ޕާޓީއަކުން ބާއްވާ އެތެރޭގެ އެންމެ ފޯރިގަދަ އިންތިޚާބެވެ.
ރިޔާސީ ޕްރައިމަރީގެ ކެމްޕެއިންގައިި ރައީސް ޞާލިޙާއި ރައީސް ނަޝީދުވެސް ވަނީ ވަރަށް ވާދަވެރި އަދި ފޯރިގަދަ ކެމްޕެއިނެއް ކުރިއަށް ގެންދަވާފައެވެ.