ސެޕްޓެމްބަރު މަހު އޮންނަ ރިޔާސީ އިންތިޚާބުގައި އެމްޑީޕީގެ ފަރާތުން ވާދަކުރާނެ ކެނޑިޑޭޓަކު ހޮވުމަށް ބާއްވާ ރިިޔާސީ ޕްރައިމަރީގައި ވާދަކުރައްވާ ދެ ކެނޑިޑޭޓުންގެ ކެމްޕެއިން ނިންމާލައިފިއެވެ. އެމްޑީޕީގެ ރިޔާސީ ޕްރައިމަރީގައި ވާދަކުރައްވަނީ އެޕާޓިގެ އެންމެ އިސްލީޑަރު އަދި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި، އެމްޑީޕީގެ ރައީސް މުޙައްމަދު ނަޝީދެވެ. މިއީ ދައުލަތުގެ ދެ ބާރެއްގެ ވެރިޔަކު ޕާޓީއެއްގެ ޕްރައިމަރީގައި ވާދަކުރައްވާ ފުރަތަމަ ފަހަރުވެސްމެއެވެ.
ދެބޭފުޅުންވެސް ވަނީ ވާދަވެރި އަދި ފޯރިގަދަ ކެމްޕެއިންތަކެއް ކުރައްވާފައެވެ. އެގޮތުން ދެބޭފުޅުން ވަނީ އަތޮޅުތަކަށްވެސް ވަޑައިގެންފައެވެ. ކެމްޕެއިންގެ ފަހު ޖަލްސާ ދެބޭފުޅުންވެސް ބޭއްވީ ރޭގައެވެ. އަދި ކެމްޕެއިން ނިންމެވުމަށް ދެބޭފުޅުންވެސް ވަނީ މިއަދު ހަވީރު ހަރަކާތްތަކެއް މާލެއާއި ހުޅުމާލޭގައި ބާއްވާފައެވެ.
އެމްޑީޕީގެ ރިޔާސީ ޕްރައިމަރީގެ ވޯޓުލުން ކުރިއަށްދާނީ މާދަމާ ހެނދުނު 9 އިން ހަވީރު 5 ޖެހުމާއި ހަމައަށެވެ. އަދި ޕްރައިމަރީ ކާމިޔާބުކުރައްވާ ކެނޑިޑޭޓެއް އިރުއޮއްސޭއިރު އެނގޭނެކަމަށް ބެލެވެއެވެ.
އެމްޑީޕީން ބުނީ މި އިންތިޚާބުގައި 200އަށް ވުރެ ގިނަ ވޯޓު ފޮށި ބެހެއްޓުމަށް ނިންމާފައިވާކަމަށެވެ. އެގޮތުން މާލެ ސަރަހައްދުގައި ޖުމްލަ 49 ވޯޓު ފޮށި ބަހައްޓާއިރު، އަތޮޅުތެރޭގައި 194 ވޯޓު ފޮށި ބަހައްޓަން އެޕާޓިން ނިންމާފައިވެއެވެ.
އެ ޕާޓީން ޢާންމުކޮށްފައިވާ ވޯޓާސް ލިސްޓުގައިވާގޮތުން 57،257 މީހުންންނަށް މި އިންތިޚާބުގައި ވޯޓު ލެވޭނެއެވެ. މިއީ ސިޔާސީ ޕާޓީއަކުން ބާއްވާ އެތެރޭގެ އެންމެ ފޯރިގަދަ އިންތިޚާބެވެ.