ފަލަސްޠީނުގެ މިނިވަންކަން ކަށަވަރުނުކޮށް ޔަހޫދީންނާ ގުޅުންބަދަހިކުރުމެއް ނެތް: ސަޢޫދީ ޢަރަބިއްޔާ

ފަލަސްޠީނުގެ މިނިވަން ދަޢުލަތެއް ޤާއިމުކޮށް، ފަލަސްޠީނު ރައްޔިތުންގެ މިނިވަންކަން ކަށަވަރުކޮށް ނުދެވެނީސް، ޔަހޫދީންގެ ދަޢުލަތް އިސްރާޢީލާ ގުޅުން ބަދަހިނުކުރާނެ ކަމުގައި ސަޢޫދީ ޢަރަބިއްޔާއިން ބުނެފިއެވެ. މި ކަމާ ގުޅޭ ގޮތުން ސަޢޫދީ ޚާރިޖީ ވަޒީރު ޕްރިންސް ފައިޞަލް ބިން ފަރްޙާން އަލް ސަޢުދު ވިދާޅުވީ، ސަޢޫދީ ޢަރަބިއްޔާއިން ޔަހޫދީންގެ އިސްރާޢީލާ އެކު ގުޅުން ޤާއިމުކުރާނެ ހަމައެކަނި ގޮތަކީ، ފަލަސްޠީނުގެ މިނިވަން ދަޢުލަތެއް ޤާއިމުކޮށްދެވުމުން ކަމުގައެވެ.

އޭނާ މި މޭރުމުން ވާހަކަފުޅު ދައްކަވާފައި މި ވަނީ، ސަޢޫދީ ޢަރަބިއްޔާއާ އެކު ގުޅުން ބަދަހިކުރަން މަސައްކަތް ކުރަމުންދާ ކަމަށް ޔަހޫދީންގެ ޖައްބާރު ބޮޑުވަޒީރު ބެންޖަމިން ނަތަންޔާހޫ ވިދާޅުވުމުންނެވެ. އޭނާ މިހެން ވިދާޅުވެފައި ވަނީ، ޑާވޯސްގައި ކުރިއަށްދާ ދުނިޔޭގެ އިޤުތިޞާދާ ބެހޭ ފޯރަމްގެ ހަވާސާގައި އެމެރިކާގެ ޤައުމީ ސަލާމަތާ މުޝީރު ޖޭކް ސަލިވަންއާ އެކު ބޭއްވި ބައްދަލުވުމެއްގައެވެ.

"[ދެ ފަރާތުގެ ދެމެދުގައި] ފުރިހަމައަށް ގުޅުން ބަދަހިކުރެވޭނީ، އަދި ހަމަޖެހުން ޤާއިމުކުރެވޭނީ، ފަލަސްޠީނުގެ މިނިވަން ދަޢުލަތެއް ޤާއިމުކޮށްދިނުމަށް ފަހު،" ބްލޫމްބަރގްއަށް ދެއްވި ބަސްދީގަތުމެއްގައި ޕްރިންސް ފައިޞަލް ވިދާޅުވިއެވެ. ސަޢޫދީ ޢަރަބިއްޔާއަކީ އެންމެ ގިނައިން ތެޔޮ އެކްސްޕޯޓު ކުރާ ޤައުމެވެ. އަދި، އެމެރިކާގެ ގާތް އެކުވެރިއެކެވެ.

އެމެރިކާއިން ދަނީ، ސަޢޫދީ ޢަރަބިއްޔާއާއި އިސްރާޢީލާ ދެމެދު ގުޅުން ބަދަހިކުރުވަން މަސައްކަތް ކުރަމުންނެވެ. ނަމަވެސް، އެމެރިކާގެ ފިއްތުންތަކަށް ބޯލެނބުމަށް ސަޢޫދީން ދަނީ ދެކޮޅު ހަދަމުންނެވެ. އަދި، ފަލަސްޠީނުގެ ރައްޔިތުން އަޅުވެތިކުރުން ހުއްޓައިނުލަނީސް، އިސްރާޢީލާ އެކު ގުޅުން ބަދަހިކުރުމަށް ނޫނެކޭ ބުނަމުންނެވެ.

ނަމަވެސް، އެމެރިކާގެ އިސްނެގުމުގެ ދަށުން ބައެއް ޢަރަބި ޤައުމުތަކުން މިހާރު ވަނީ ޔަހޫދީންނާ އެކު ސިޔާސީ ގުޅުން ޤާއިމުކޮށްފައެވެ. 2020 ވަނަ އަހަރު ސޮއިކޮށްފައިވާ އަބްރަހަމް އެއްބަސްވުމުގެ ދަށުން ޔަހޫދީންގެ އިސްރާޢީލާ އެކު އެންމެ ފުރަތަމަ ގުޅުން ބަދަހިކޮށްފައިވާ ޢަރަބި ޤައުމުތަކުގެ ތެރޭގައި އެކުވެރި ޢަރަބި ޢިމާރާތް (ޔޫ.އޭ.އީ)އާއި ބަހުރައިން ހިމެނެއެވެ. އެ ލިސްޓަށް ސަޢޫދީ ޢަރަބިއްޔާ އިތުރުކުރުމަކީ ޖައްބާރު ނަތަންޔާހޫގެ ވަރަށް ބޮޑު ބޭނުމެކެވެ.

2022 ނޮވެންބަރު 1 ވަނަ ދުވަހު ބޭއްވި އިންތިޚާބު ކާމިޔާބުކޮށް، އިސްރާޢީލުގެ ވެރިކަމާ ޖައްބާރު ނަތަންޔާހޫ ހަވާލުވީ ހަރުކަށި ފިކުރުގެ ޕާޓީތަކުގެ ތާޢީދާއެކުގައެވެ. އަދި، އޭނާގެ ސަރުކާރާ އެކު، ފަލަސްޠީނުގެ މިނިވަން ދަޢުލަތެއް ޤާއިމު ކުރުމުގެ ހުވަފެންތަކަށް ނިމުމެއް އައިސްފައިވާ ކަމުގައި މަސްރަޙު ދިރާސާކުރާ ފަރާތްތަކުން ޤަބޫލުކުރެއެވެ. ސަބަބަކީ، ފަލަސްޠީނުގެ މުސްލިމުން އަޅުވެތިކުރުން އިތުރު ކުރުމަށް ނަތަންޔާހޫގެ ސަރުކާރުން މިހާރުވެސް މަސައްކަތް ފަށާފައިވުމެވެ.

ނަތަންޔާހޫގެ ސަރުކާރުން މިހާރުވެސް ދަނީ، ޔަހޫދީން އަތްގަދަކޮށްފައިވާ ފަލަސްޠީނުގެ ބިންތަކުގައި ޔަހޫދީން ވަޒަންވެރި ކުރުވަން މަސައްކަތް ކުރަމުންނެވެ. ޔަހޫދީންނަށް ޚާއްޞަކޮށްފައިވާ ޢިމާރާތްތައް ބިނާކުރުމަށް މަސައްކަތް ކުރަމުންދާއިރު، ފަލަސްޠީނުގެ ރައްޔިތުން އެ މީހުންގެ ގެދޮރުން ބޭރުކުރުމުގެ މަސައްކަތް ކުރަމުންނެވެ. އަދި، ފަލަސްޠީނުގެ މުސްލިމުންގެ ގެދޮރު ސުންނާފަތިކުރުމުގެ މަސައްކަތް ކުރަމުންނެވެ.

ނަތަންޔާހޫގެ އައު ސަރުކާރަކީ، ފަލަސްޠީނުގެ ރައްޔިތުންނަށް އިތުރު ބިރުވެރިކަމެއްގެ ގޮތުގައި މަސްރަޙު ދިރާސާ ކުރާ ފަރާތްތަކުން ސިފަ ކުރެއެވެ. ފަލަސްޠީނަށް އާމްދަނީގެ ގޮތުގައި ލިބޭ ފައިސާތައް ހިފަހައްޓާނެ ކަމުގެ އިންޒާރު އޭނާ މިހާރު ވެސް ވަނީ ދެއްވާފައެވެ. އަދި، ފަލަސްޠީނުގެ ރައްޔިތުން ބަނޑަށް ޖައްސައި، ނިކަމެތި ކޮށްލާނެ ކަމަށް އޭނާ ގެންދަވަނީ ފާޅުގައި ވިދާޅުވަމުންނެވެ.