ޔޫކްރެއިނުގެ އުތުރުގައިވާ ޑޮނެޓްސްކްގެ ސޮލޭދާރަށް އ.ދ.އިން އިންސާނީ އެހީ ފޯރުކޮށްދޭން ފަށައިފިއެވެ. ސޮލޭދާރަކީ މި ވަގުތު އެންމެ ވަރުގަދައަށް ހަނގުރާމަ ހިނގަމުންދާ އެއް ސަރަޙައްދެވެ. ސޮލޭދާރާއި އެ ރަށާ އިންވެގެންވާ ބަޚްމުތް ހިފުމަށް ރަޝިޔާ ސިފައިން މަސައްކަތް ކުރަމުންދާތާ މިހާރު މަސްތަކެއް ފާއިތުވެއްޖެއެވެ.
އ.ދ.ގެ އިންސާނީ އެހީއާ ބެހޭ އިދާރާ (އޯ.ސީ.އެޗް.އޭ)އިން ބުނީ، އެ އިދާރާއިން އިންސާނީ އެހީގެ ސާމާނު ސޮލޭދާރަށް ފޮނުވަން ފަށާފައިވާ ކަމުގައެވެ. އެ އިދާރާގެ ތަރުޖަމާނު ޔެންސް ލެއާރކް ވިދާޅުވީ، އެހީގެ ސާމާނު ހިފައިގެން ދަތުރުކުރަމުންދާ ގާފިލާއެއް ޔޫކްރެއިނު ސިފައިންގެ ބެލުމުގެ ދަށުގައިވާ ސަރަޙައްދަށް މިހާރު ގޮސްފައިވާ ކަމުގައެވެ. ސޮލޭދާރަކީ ސިނާޢީ މަސައްކަތްތައް ކުރާ ސަރަޙައްދެކެވެ.
މިއީ، 2022 ފެބުރުވަރީ 24 ވަނަ ދުވަހު ރަޝިޔާ ސިފައިން ޔޫކްރެއިނަށް ފޮނުވައި ހަނގުރާމަ ފެށިފަހުން، އ.ދ.އިން އެ ޤައުމަށް އިންސާނީ އެހީގެ ސާމާނު ފޯރުކޮށްދޭ ފުރަތަމަ ފަހަރެވެ. ލެއާރކް ވިދާޅުވީ، ސޮލޭދާރަށް ފޮނުވާފައިވާ އެހީގެ ސާމާނުގެ ތެރޭގައި ކާބޯތަކެއްޗާއި، ފެނާއި، ސާފުތާހިރުވުމަށް ބޭނުންކުރާ ސާމާނުގެ އިތުރުން ބޭސްފަރުވާއަށް ބޭނުންވާ ސާމާނު ހިމެނޭ ކަމުގައެވެ. ނަމަވެސް، އެއީ، ގާފިލާގައި ގެންގޮސްފައި ވަނީ އެންމެ 800 މީހުންނަށް ބޭނުންވާ މިންވަރުގެ ސާމާނެވެ.
ސޮލޭދާރުގައި ރަޝިޔާއާއި ޔޫކްރެއިނުގެ ސިފައިން ކުރަމުންދާ ހަނގުރާމައިގައި އެ ސަރަޙައްދު ވަނީ ސުންނާފަތިވެފައެވެ. ކަރަންޓާއި ފެނުގެ ޚިދުމަތް ވަނީ ކެނޑިފައެވެ. އަދި، ކާބޯތަކެތި ހޯދޭނެ މަގުތައް ބަންދުވެފައިވާއިރު، އެ ސަރަޙައްދުގައި ދިރިއުޅޭ ރައްޔިތުން ވަނީ ހާލުގައި ޖެހިފައެވެ.
އެ މީހުންނަށް އިންސާނީ އެހީގެ ސާމާނު ފޯރުކޮށްދިނުމުގެ މަސައްކަތް ފަށާފައިވާއިރު، އެހީގެ އިތުރު ގާފިލާތައް އެ ސަރަޙައްދަށް ފޮނުވުމުގެ ފުރުޞަތު ބޭނުންވާ ކަމަށާއި، އެ ފުރުޞަތު ފަހިކޮށްދޭނެ ކަމަށް އުންމީދު ކުރައްވާ ކަމުގައި ލެއާރކް ވިދާޅުވިއެވެ. އަދި، މިހާރު ފޮނުވާފައިވާ އެހީގެ ސާމާނު ހުސްވުމުގެ ކުރިން، އެ ސަރަޙައްދަށް އިތުރު ގާފިލާތައް ފޮނުވުމަށް މަސައްކަތް ކުރަމުންދާ ކަމުގައި އޭނާ ވިދާޅުވިއެވެ.
ސޮލޭދާރު މިހާރު އޮތީ ރަޝިޔާ ސިފައިންގެ އަތްދަށުގައި ކަމަށް އެ ޤައުމުން ހުސްވި ހަފުތާގެ ތެރޭގައި ވަނީ އިޢުލާނުކޮށްފައެވެ. ނަމަވެސް، ޔޫކްރެއިނުން ދަނީ އެ ކަން ދޮގުކުރަމުންނެވެ. ޔޫކްރެއިނުން ބުނީ، ސޮލޭދާރު ދިފާޢު ކުރުމަށް އެ ޤައުމުގެ ސިފައިން ހުއްޓުމެއް ނެތި މަސައްކަތް ކުރަމުންދާ ކަމުގައެވެ.
ސޮލޭދާރާއި ބަޚްމުތް ހިފުމަށް ރަޝިޔާގެ އަސްކަރިއްޔާގެ އެންމެ ކުޅަދާނަ އަދި އެންމެ ތަޖުރިބާކާރު ސިފައިންގެ ފައުޖުތައް ފޮނުވާފައިވާއިރު، އެ މީހުންނަށް އެހީތެރިވުމަށް ވެގްނާ ގުރޫޕުގެ ކުލީ ސިފައިން ވެސް ވަނީ ފޮނުވާފައެވެ. މި ހަނގުރާމައަށް 11 މަސް ފުރެން ގާތްވެފައިވާއިރު، މި ވަގުތު އެންމެ ނުރައްކާތެރި ހަނގުރާމައެއް ހިނގަމުން ދަނީ، އަދި އެންމެ ވަރުގަދައަށް ހަމަލާތައް ބަދަލުކުރަމުން ދަނީ ސޮލެދާރާއި ބަޚްމުތްގައި ކަމަށް ޔޫކްރެއިނުން ބުނެއެވެ.
ސޮލޭދާރް ރަޝިޔާ ސިފައިންގެ އަތްދަށަށް ވެއްޓިއްޖެ ނަމަ، ބަޚްމުތްގެ ދިފާޢުގައި ހަނގުރާމަ ކުރަމުންދާ ޔޫކްރެއިނުގެ ފައުޖުތަކަށް ބޮޑު ނުރައްކަލަކާ ކުރިމަތިވާނެއެވެ. އަދި، ބަޚްމުތްގައި ތިބި ސިފައިންނަށް ހަތިޔާރާއި އެހެނިހެން ސާމާނު ފޯރުކޮށްދޭން އޮތް މަގުތައް ބަންދުވާނެ ކަމުގައި ވެސް މަސްރަޙު ދިރާސާކުރާ ފަރާތްތަކުން ބުނެއެވެ. ބަޚްމުތް ހިފުމަކީ، މި ވަގުތު ރަޝިޔާ ސިފައިންގެ މައިގަނޑު އެއް އަމާޒެވެ.