މިއަހަރު ބާއްވާ ރިޔާސީ އިންތިޚާބު ސެޕްޓެމްބަރު 9ގައި ބާއްވަން އިލެކްޝަންސް ކޮމިޝަނުން ނިންމައިފިއެވެ. އެ ކޮމިޝަނުން ވިދާޅުވީ އިންތިހާބުގައި ދެވަނަ ބުރެއް ބާއްވަން ޖެހޭނަމަ އެ ވޯޓްލުން އޮންނާނީ 30 ސެޕްޓެމްބަރުގައިކަމަށެވެ.
ރިޔާސީ އިންތިޚާބަށް ވަމުން އަންނަ ތައްޔާރީތަކާއި ގުޅޭގޮތުން މަޢުލޫމާތު ދިނުމަށް އިލެކްޝަންސް ކޮމިޝަނުން ބޭއްވި ޕްރެސްކޮންފަރެންސްގައި އެ ކޮމިޝަނުގެ ރައީސް ފުއާދު ތަޢުފީޤް ވިދާޅުވީ، ރިޔާސީ އިންތިޚާބު ސެޕްޓެމްބަރު 9ގައި ބޭއްވުމަށްފަހު، ދެވަނަ ބުރެއް ބާއްވަން ޖެހިއްޖެނަމަ ވޯޓުލުން އޮންނާނީ ސެޕްޓެމްބަރު 30ގައިކަމަށެވެ.
ފުއާދު ވިދާޅުވީ، މިފަހަރުގެ އިންތިޚާބުގައި ސްލޯގަންއަކަށް ބޭނުންކުރަނީ މަގޭ ވިސްނުން، މަގޭ ވޯޓުކަމަށާއި، މި އިންތިޚާބަށް ހޭޝްޓެގްގެ ގޮތުގައި ބޭނުންކުރާނީ visnun23# ކަމަށެވެ.
ވޯޓުލެވޭ މީހުންގެ ޢަދަދު އިތުރުވާނެ
މިފަހަރުގެ އިންތިޚާބުގައި ވޯޓުލެވޭ މީހުންގެ ލިސްޓު އާންމުކުރައްވާނީ މެއި 2ގައިކަމަށެވެ. އަދި ވޯޓު ލެވޭމީހުންގެ ލިސްޓަށް ޝަކުވާ ހުށައެޅުމަށް 30 ދުވަހުގެ މުއްދަތެއް ޖޫން މަހުގެ 2 އާއި ހަމައަށް ދޭނެކަމަށް ފުއާދު ވިދާޅުވިއެވެ.
އެމީހަކު ރަޖިސްޓްރީވެފައިވާ ތަން ނޫން އެހެން ތަނަކަށް ވޯޓުލުމަށް ރީ-ރަޖިސްޓްރޭޝަނަށް 21 ދުވަހުގެ މުއްދަތެއް ދެއްވާނެކަމަށާއި، އެގޮތުން 16 ޖުލައިން 5 އޯގަސްޓާއި ހަމައަށް އެ ފުރުޞަތު އޮންނާނެކަމަށް ފުއާދު ވިދާޅުވިއެވެ.
އިންތިޚާބަށް ހުޅުވާލުން ޖުލައި މަހު
މިއަހަރުގެ ރިޔާސީ އިންތިޚާބަކީ ރާއްޖޭގައި ބޭއްވޭ އެންމެ ވާދަވެރި އިންތިޚާބަށް ވެގެންދާނެއެވެ. ސަބަބަކީ މިހާތަނަށް އިންތިޚާބުގައި ވާދަކުރައްވާނެކަން އިއުލާންކުރައްވާފައިވާ ބޭފުޅުންގެ ޢަދަދުތަކުންނެވެ.
ފުއާދު ވިދާޅުވީ، ރިޔާސީ އިންތިޚާބުގައި ކެނޑިޑޭޓުންގެ ގޮތުގައި ވާދަކުރުމަށް 23 ޖުލައިން 3 އޯގަސްޓުގެ ނިޔަލަށް ހުޅުވާލާނެކަމަށެވެ. އަދި ކެނޑިޑޭޓުންގެ ނަންތައް ތަރުތީބުކޮށް 9 އޯގަސްޓްގައި އިއުލާންކުރައްވާނެކަމަށާއި، ކެންޑިޑޭޓުން ކެމްޕެއިން ކުރުމަށް 10 އޯގަސްޓުން ފެށިގެން 8 ސެޕްޓެމްބަރާއި ހަމައަށް ފުރުޞަތު އޮންނާނެކަމަށް ފުއާދު ވިދާޅުވިއެވެ.
ފުއާދު ވިދާޅުވީ، އިންތިޚާބުގެ ވަގުތީ ނަތީޖާ ވޯޓުގެ ނަތީޖާ ޝީޓު ލިބޭ މިންވަރަކުން އިއުލާންކުރަމުން ދާނެކަމަށެވެ. އަދި ފުރަތަމަ ބުރުގެ ރަސްމީ ނަތީޖާ އިންތިޚާބު ބާއްވާތާ 7 ދުވަހުގެ ތެރޭގައި އިއުލާންކުރާނެކަމަށް ފުއަދު ވިދާޅުވިއެވެ. މީގެ އިތުރުން ދެވަނަ ބުރެއް ބާއްވަން ޖެހިއްޖެނަމަ 30 ސެޕްޓެމްބަރުގައި ބާއްވަންވެސް އިލެކްޝަންސް ކޮމިޝަނުން ވަނީ އިއުލާންކޮށްފައެވެ.
އޮބްޒާވަރުންނާއި މޮނިޓަރުންގެ ގޮތުގައި ކުރިމަތިލުމުގެ މުއްދަތު 25 ޖުލައިން 13 އޯގަސްޓަށް ހުޅުވާލުމަށްވެސް އެ ކޮމިޝަނުން ވަނީ ނިންމާފައެވެ.
އިންތިޚާބުގެ ޓައިމްލައިން
* އިންތިޚާބު ބޭއްވުން (ފުރަތަމަ ބުރު) - 09 ސެޕްޓެމްބަރ
* ވޯޓާސް ލިސްޓް އާންމުކުރުން - 02 މެއި
* ވޯޓާސް ލިސްޓަށް ޝަކުވާ ހުށައެޅުން - 02 މެއި އިން 02 ޖޫން
* ރީ-ރަޖިސްޓްރޭޝަން މުއްދަތު - 16 ޖުލައި އިން 05 އޮގަސްޓު
* ޓްރައިނަރުން ތަމްރީން ކުރުން - 16 ޖުލައި އިން 21 ޖުލައި
* ކެނޑިޑޭޓުންގެ ގޮތުގައި ކުރިމަތިލުން - 23 ޖުލައި - 03 އޮގަސްޓް
* އޮބްޒާވަރުންނާއި މޮނިޓަރުންނަށް ފުރުޞަތު ހުޅުވާލުން - 25 ޖުލައި އިން 13 އޮގަސްޓް
* ކެނޑިޑޭޓުންގެ ނަންތައް ތަރުތީބުކުރުން - 09 އޮގަސްޓް
* ކެނޑިޑޭޓުން ކެމްޕެއިން ކުރުމުގެ މުއްދަތު - 10 އޮގަސްޓް އިން 08 ސެޕްޓެމްބަރ
* ފުރަތަމަ ބުރުގެ ނަތީޖާ - 09 ސެޕްތެމްބަރުން ފެށިގެން
* އިންތިޚާބުގެ ދެވަނަ ބުރު - 30 ސެޕްޓެމްބަރ
އިންތިޚާބުގެ މައި މަރުކަޒަކަށް އަޑު
މީގެ ކުރީގެ އިންތިޚާބުތަކުގައި މައި މަރުކަޒެއްގެ ގޮތުގައި ބޭނުންކުރީ ބައު ޖަމާލުއްދީން ޢިމާރާތެވެ. ނަމަވެސް އެތަނުގައި ޢަރަބިއްޔާ ސްކޫލް ޢިމާރާތްކުރާތީ އިންތިޚާބީ މައި މަރުކަޒެއްގެ ގޮތުގައި ސަރުކާރުން ދީފައިވަނީ ދިވެހިރާއްޖޭގެ އަޑުގެ ބައު ޢިމާރާތެވެ.
އިލެކްޝަންސް ކޮމިޝަންގެ ނާއިބު ރައީސް އިސްމާޢީލް ހަބީބު ވިދާޅުވީ، އިންތިޚާބީ މައި މަރުކަޒު އަދިވެސް ނުލިބޭތީ، އިންތިޚާބުގެ މަސައްކަތްތައް ބާރަށް ކުރިއަށް ގެންދެވޭނީ އެ ޢިމާރާތް ލިބިގެންކަމަށެވެ. ނަމަވެސް އެތަން ހަމަޖެހުމުގައި ލަސްތަކެއްވަނަމަ ، އިންތިޚާބަށް އިއުލާންކުރި ތާރީޚުތަކަށް ބަދަލުތަކެއް އައުން އެކަށީގެންވާކަމަށް ހަބީބު ވިދާޅުވިއެވެ.
އެންމެ ވާދަވެރި އިންތިޚާބު
މިހާތަނަށް އިންތިޚާބުގައި ވާދަކުރައްވާނެކަމަށް އިއުލާންކުރައްވާފައިވާ ޕާޓީތަކުގެ ތެރެއިން ރާއްޖޭގެ އެންމެ ބޮޑު ސިޔާސީ ޕާޓީ އަދި ވެރިކަން ކުރާ މައި ޕާޓީގެ ރިޔާސީ ކެނޑިޑޭޓަކު މިމަހު 28ގައި ކަނޑައަޅާނެއެވެ. އެ ކެނޑިޑޭޓް ކަނޑައަޅާނީ އެދުވަހު އޮންނަ އެޕާޓީގެ ރިޔާސީ ޕްރައިމަރީންނެވެ. އެމްޑީޕީން ވާދަކުރައްވާނީ ޕްރައިމަރީގައި ވާދަކުރައްވާ މިހާރުގެ ރައީސުލްޖުމްހޫރިއްޔާ އަދި އެމްޑީޕީގެ އެންމެ އިސް ލީޑަރު އިބްރާހީމް މުޙައްމަދު ޞާލިޙް ނުވަތަ އެމްޑީޕީގެ ރައީސް މުޙައްމަދު ނަޝީދެވެ. ވާދަވެރި ކެމްޕެއިންތަކެއް ދެބޭފުޅުންވެސް ގެންދަވަނީ ކުރައްވަމުންނެވެ.
އިދިކޮޅު ޕީޕީއެމް ޕީއެންސީން ވާދަކުރައްވާނީ ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްކަމަށް ކަނޑައަޅާ ރިޔާސީ ޓިކެޓް ވަނީ އެމަނިކުފާނަށް އަރުވާފައެވެ. އެންމެ ފުރަތަމަ ރިޔާސީ ޓިކެޓް ޕާޓީއަކުން އެރުވި ރައީސް ޔާމީންގެ މައްޗަށް އުފުލި ދައުވާ ސާބިތުވު ޖަލު ހުކުމެއް ތަންފީޒްކުރައްވަމުން ގެންދަވާތީ އެމަނިކުފާނު މި އިންތިޚާބުގައި ވާދަކުރެއްވޭނެކަމާމެދު އަދިވަނީ ސުވާލު އުފެދިފައެވެ. ނަމަވެސް އިދިކޮޅު ކޯލިޝަނުން ބުނަމުންދަނީ އިންތިޚާބުގައި ވާދަކުރައްވާނީ ރައީސް ޔާމީންކަމަށެވެ.
މީގެ އިތުރުން މި އިންތިޚާބުގައި ވާދަކުރައްވާނެކަން އެންމެ ފަހުން އުފެދުނު ސިޔާސީ ޕާޓީ، މޯލްޑިވްސް ނޭޝަނަލް ޕާޓީ، އެމްއެންޕީގެ ރައީސް އަދި ދަނގެތި ދާއިރާގެ މެންބަރު މުހައްމަދު ނާޒިމާއި، އެމްޑީއޭގެ ރައީސް އަޙްމަދު ސިޔާމް މުހައްމަދު ވެސް ވަނީ އިއުލާންކުރައްވާފައެވެ. އަދި ޖުމްހޫރީ ޕާޓީންވެސް ކެނޑިޑޭޓެއްނެރޭނެކަން އިއުލާންކޮށްފައިވެއެވެ. މީގެ އިތުރުން ކުރީގެ ހޯމް މިނިސްޓަރ ޢުމަރު ނަޞީރާއި، އެލްޖީއޭގެ ކުރީގެ ނާއިބު ރައީސް ޝުޖާޢު ޙުސައިން އާއި، ޑރ.ޢަބްދުﷲ ޝިހާމް ފަދަ ބޭފުޅުންވެސް ރިޔާސީ އިންތިޚާބުގައި ވާދަކުރައްވާނެކަމަށް ވިދާޅުވެ ސޯޝަލް މިޑިއާގައި އަންނަނީ ކެމްޕެއިން ކުރައްވަމުންނެވެ.