އަސްލު އޮޅޭގޮތަށް ކޮންޓެއިނަރުގައި ލޭބަލް ހަރުކޮށް ރާއްޖެ އެތެރެކުރާ ކާބޯތަކެތި، ފެބުރުއަރީ މަހުގެ 15ގެ ފަހުން ރާއްޖެއަށް އެތެރެކުރުމުގެ ހުއްދަ ނުދޭން ނިންމައިފިއެވެ.
ފުޑް އެންޑް ޑްރަގް އޮތޯރިޓީން މިގޮތަށް ނިންމާފައިވަނީ، ވަކި އުފެއްދުމެއް ވިއްކުމަށް ލޭބަލްކޮށްފައި ހުންނަ ޕެކެޓް ނުވަތަ ކޮންޓެއިނަރުފަދަ ތަކެތީގައި، އެހެނިހެން ބާވަތްތައް ބަންދުކޮށް އެތެރެކުރާ މިންވަރު އިތުރުވެފައިވާކަން ފާހަގަކުރެވިގެންނެވެ.
އެގޮތުން ރާއްޖެ އެތެރެކުރާ ބިސްކޯދު ފަދަ ބައެއް ކާބޯތަކެތި، އެހެން އުފެއްދުމެއް ބަންދުކޮށް ވިއްކުމަށް ލޭބަލްކޮށްފައި ހުންނަ ޑަބިޔާ ފަދަ ކޮންޓެއިނަރުގައި ބަންދުކޮށް އެތެރެކުރަމުންދާ ކަމަށް އެމްއެފްޑީއޭއިން ނެރެފައިވާ ބަޔާނުގައި ވަނީ ބުނެފައެވެ.
އަދި މިގޮތަށް ވަކި އުފެއްދުމެއް ބަންދުކުރުމަށް ޚާއްސަކޮށް ލޭބަލްކޮށްފައި ހުންނަ ކޮންޓެއިނަރުގައި އެހެން އުފެއްދުމެއް ބަންދުކުރުމަށްފަހު އެ ލޭބަލްގެ އިތުރުން، ފަސޭހައިން ނެއްޓޭ ގޮތަށް އެހެން ލޭބަލް ހަރުކޮށްފައި ހުންނަ ކަމަށްވެސް ބުނެފައިވެއެވެ.
ބަންދުކުރި ކާބޯތަކެތި މިގޮތަށް ލޭބަލްކުުރުމަކީ އެ ބޭނުންކުރާ ފަރާތްތަކަށް އެތަކެތީގެ އަސްލު އޮޅުންއަރާފަދަ ހާލަތެއް މެދުވެރިވުމުގެ ފުރުޞަތު އޮތްކަމެއްކަމަށް އެއޮތޯރިޓީންވަނީ ބުނެފައެވެ. މިއީ އެފަދަ އުފެއްދުމެއްގައި މައްސަލަޖެހޭ ހާލަތުގައިވެސް އެ އުފެއްދުމެއް ޓްރޭސްކުރުމަށް ނުވަތަ ގަނެ ވިއްކާ ތަންތަން ދެނެގަތުމަށްވެސް ކުރިމަތިވާނެ ގޮންޖެހުމެއްކަމަށް އެމްއެފްޑީއޭގެ ބަޔާނުގައިވެއެވެ.
މިގޮތަށް މަޢުލޫމާތު އޮޅޭގޮތަށް ކާބޯތަކެތި ބަންދުކުރުމަަކީ، "ބަންދުކުރި ކާބޯތަކެތި ލޭބަލްކުރުމުގެ ޤައުމީ މިންގަނޑު"އާއިވެސް ޚިލާފު ކަމެކެވެ.
އެހެންކަމުން އަސްލު ކޮންޓެއިނަރުގައި ނޫން އެހެން ކޮންޓެއިނަރުގައި ބަންދުކޮށް، ލޭބަލްކޮށްގެން ރާއްޖެއަށް އެތެރެކުރާ ކާބޯތަކެއްޗަށް، 15 ފެބުރުއަރީން ފެށިގެން ހެލްތު ކްލިއަރެންސް ނުދިނުމަށް ވަނީ ނިންމާފައެވެ.
އެމްއެފްޑީއޭގެ ބަޔާނުގައިވަނީ ކާބޯތަކެތީގެ ރައްކާތެރިކަން ދެމެހެއްޓުމަށްޓަކާ އެތަކެތި ބަންދުކޮށް ލޭބަލްކުރުމުގައި އެއަށް ޚާއްސަ ކޮންޓެއިނަރުގައި ބަންދުކޮށް ރަނގަޅަށް ލޭބަލްކުރުމަށް އިލްތިމާސްކޮށްފައެވެ.