ޗައިނާގައި ހަލުވިކަމާ އެކު ކޮވިޑް-19 ފެތުރެމުންދިޔަ ނަމަވެސް، އެ ކަމުގެ ބޮޑު އަސަރެއް ވިލާތުގެ ޤައުމުތަކަށް ކުރާނެ ކަމަށް ނުބެލެވޭ ކަމުގައި ދުނިޔޭގެ ޞިއްޙަތު ޖަމުޢިއްޔާ (ޑަބްލިޔު.އެޗް.އޯ)އިން ބުނެފިއެވެ. ބަލި ފެތުރުން ކޮންޓްރޯލް ކުރުމަށް އަޅާފައިވާ ފިޔަވަޅުތައް ބެއިޖިންގްއިން ދޫކޮށްލުމާ އެކު، ބަލީގެ ކޭސްތަކުގެ އަދަދު ކޮންޓްރޯލް ނުކުރެވޭ މިންވަރަކަށް އިތުރުވެ، އެ ޤައުމުގެ ހޮސްޕިޓަލްތައް ވަނީ ފުރިފައެވެ.
މި ކަމުގެ މާ ބޮޑު އަސަރެއް ވިލާތުގެ ޤައުމުތަކަށް ކުރާނެކަމަށް ނުބެލެވޭ ކަމުގައި ވިލާތުގައި ހުންނަ ޑަބްލިޔު.އެޗް.އޯ.ގެ މައި އޮފީހުގެ ޑިރެކްޓަރ ހާންސް ކްލޫގަރ ވިދާޅުވިއެވެ. ނަމަވެސް، މި ކަމާ މެދު އަޅައިނުލައި ތިބެވެން ނެތް ކަމުގައި ވެސް އޭނާ ވިދާޅުވިއެވެ. ޑަބްލިޔު.އެޗް.އޯ.ގެ ވިލާތުގެ ޤައުމުތަކުގެ ތެރޭގައި 53 ޤައުމު ހިމެނެއެވެ. މީގެ ތެރޭގައި ރަޝިޔާގެ އިތުރުން މެދުތެރޭ އޭޝިޔާގެ ބައެއް ޤައުމުތައް ވެސް ހިމެނެއެވެ.
ކްލޫގަރ ވިދާޅުވީ، ޗައިނާގެ ދަތުރުވެރިންނާ މެދު ބައެއް ޤައުމުތަކުން އަމަލުކުރަމުން ދަނީ ކަންބޮޑުވާ ފަދަ ގޮތަކަށް ކަމުގައެވެ. އޭނާ އިޝާރާތް ކުރައްވާފައި ވަނީ، ޗައިނާއިން ފުރައިގެން ދަތުރު ކުރާ ފަސިންޖަރުން ޕީ.ސީ.އާރް. ޓެސްޓެއްގެ ނެގެޓިވް ނަތީޖާ ހުށަހެޅުމަށް ބައެއް ޤައުމުތަކުން މަޖުބޫރުކުރަމުންދާތީ، އެ ނިންމުމަށެވެ. އޭނާ ވިދާޅުވީ، ސައިންސްގެ ހޯދުންތަކުގެ އަލީގައި މެނުވީ، މި ފަދަ ފިޔަވަޅުތައް އެޅުމަކީ ހަމަޖެހޭ އުސޫލެއް ނޫން ކަމުގައެވެ. އަދި، މިއީ ތަފާތުކުރުމުގެ އަމަލެއްގެ ގޮތުގައި އޭނާ ސިފަކުރެއްވިއެވެ.
ޗައިނާގެ ދަތުރުވެރިންނާ ދެކޮޅަށް މި ފަދަ ފިޔަވަޅުތައް އަޅާފައިވާ ޤައުމުތަކުގެ ތެރޭގައި އެމެރިކާ، ކެނެޑާ، އިނގިރޭސި ވިލާތް، ފަރަންސޭސި ވިލާތް، އިޓަލީ ވިލާތް، ސްޕެއިން، ޤަޠަރު، އިސްރާޢީލް، އަދި އިންޑިޔާގެ އިތުރުން ޗައިނާގެ އަވަށްޓެރިން ކަމުގައިވާ ދެކުނު ކޮރެޔާއާއި ތައިވާނާއި ޖަޕާނު ވެސް ހިމެނެއެވެ. ވައިގެ އުދުހުންތަކާ ބެހޭ ބައިނަލްއަޤުވާމީ ޖަމުޢިއްޔާ (އިޔާޓާ)އިން ވެސް ވަނީ މި ނިންމުމަށް ފާޑުކިޔާފައެވެ.
އެ ޖަމުޢިއްޔާއިން ބުނީ ޗައިނާގެ ދަތުރުވެރިންނާ ދެކޮޅަށް ބައެއް ޤައުމުތަކުން އަޅާފައި ވަނީ ޤަބޫލުކުރަން ދަތި، އަދި ހަމަނުޖެހޭ ފިޔަވަޅުތަކެއް ކަމުގައެވެ. އަދި މިއީ އަވަސްއަރުވައިލައިގެން ނިންމާފައިވާ ނިންމުންތަކެއްގެ ގޮތުގައި ސިފަކޮށް، އެ ޖަމުޢިއްޔާއިން ވަނީ މި ފިޔަވަޅުތަކުގެ ސަބަބުން ނަތީޖާއެއް ހާސިލުވާނެ ކަމަށް ނުބެލެވޭ ކަމުގައި ބުނެފައެވެ.
ޗައިނާއިން ވަނީ ބަލި ފެތުރުން ކޮންޓްރޯލް ކުރުމަށް އެ ޤައުމުގައި އަޅާފައިވާ ހަރުކަށި ފިޔަވަޅުތައް 2022 ޑިސެންބަރު 7 ވަނަ ދުވަހުން ފެށިގެން އުވައިލާފައެވެ. އެއަށްފަހު، އެ ޤައުމުގެ އެކި ކަންކޮޅުތަކުގައި ހަލުވިކަމާ އެކު ބަލި ފެތުރެން ފެށިއެވެ. އަދި އެތަކެއް ހާސް ބަޔަކަށް ބަލި ޖެހެމުން ދިޔައެވެ. އެންމެ ގިނައީ އުމުރުން ދުވަސްވީ މީހުންނެވެ. މި ބަލީގައި ގިނަ އަދަދެއްގެ ބަޔަކު މަރުވަމުންދާ ކަމަށް ބުނެވުނު ނަމަވެސް ޗައިނާއިން ދަނީ އެ ކަން ދޮގު ކުރަމުންނެވެ.
ޗައިނާގެ ހެނާން ޕުރޮވިންސަށް އެކަނި ބަލައިލިކަމުގައިވީ ނަމަވެސް ފެންނަނީ ނުރައްކާތެރި އަދި ބިރުވެރި މަންޒަރެކެވެ. އެ ޕުރޮވިންސުގެ އާބާދީގެ 90 އިންސައްތަ މީހުންނަށް މި ވަގުތު ބަލި ޖެހިފައިވާ ކަމުގައި އެ ޕުރޮވިންސުގެ އޮފިޝަލުން ބުނެއެވެ. މާނައަކީ، 99.4 މިލިޔަން މީހުންގެ އާބާދީއެއް އޮންނަ ހެނާންގެ 88.5 މިލިޔަން މީހުންނަށް މި ވަގުތު ބަލި ޖެހިފައިވާކަމެވެ.
ނަމަވެސް، ޖަނަވަރީ 8 ވަނަ ދުވަހުން ފެށިގެން އެ ޤައުމަށް އެތެރެވާ މީހުން ކަރަންޓީނު ކުރުން ވެސް އެ ޤައުމުން ވަނީ ހުއްޓައިލާފައެވެ. އެއާއެކު އެ ޤައުމަށް އެތެރެވާ މީހުންގެ އަދަދުތައް އިތުރުވެ، ބޭރު ޤައުމުތަކަށް ދަތުރު ކުރާ ފަތުރުވެރިންގެ އަދަދުތައް ވެސް ވަނީ އިތުރުވެފައެވެ.
ޗައިނާއިން ކަރަންޓީނުކުރުން ހުއްޓައިލުމުން އެ ޤައުމަށް އެންމެ ފުރަތަމަ ދަތުރުވެރިން އެތެރެވާން ފަށާފައި ވަނީ ވިޔަފާރީގެ މަރުކަޒީ ރަށް ޝެންގްހާއީއަށެވެ. މީގެ އިތުރުން، ހޮންގް ކޮންގާއި ޗައިނާއާ ދެމެދު ދަތުރުތައް ވެސް މި ވަނީ ހުޅުވައިލާފައެވެ. އަދި، ކުރިއަށް އޮތް އަށެއްކަ ހަފުތާގެ ތެރޭގައި ހޮންގް ކޮންގުން 400,000 އަށްވުރެ ގިނަ މީހުން ޗައިނާއަށް އެތެރެވާނެ ކަމަށް ބެލެވެއެވެ. އަދި، 7,000 އަށްވުރެ ގިނަ މީހުން ޗައިނާއިން ހޮންގް ކޮންގަށް ދަތުރުކުރާނެ ކަމަށް ބެލެވެއެވެ.
ޗައިނާއަށް އެތެރެވާ މީހުން ފުރިހަމަ ކުރަން ޖެހޭ ކަރަންޓީނު އުވައިލާފައިވީ ނަމަވެސް، އެ ޤައުމަށް އެތެރެވުމަށް އަދިވެސް ގިނަ ހުރަސްތަކެއް އެބަހުއްޓެވެ. މި ގޮތުން، ފަތުރުވެރިންނާއި ބޭރު ޤައުމުތަކުގެ ދަރިވަރުންނަށް ވިސާ ދޫކުރަށް ފެށުމާ މެދު އެ ޤައުމުން އަދި ގޮތެއް ނިންމާފައެއް ނުވެއެވެ.