ވިލާތާއި އެމެރިކާގެ ޤައުމުތަކަށް ކުރައްވާ ދަތުރުފުޅެއްގައި ޖަޕާނުގެ ބޮޑުވަޒީރު ފުމިޔޯ ކިޝިޑާ ފުރާވަޑައިގަންނަވައިފިއެވެ. އޭނާ ވިލާތާއި އެމެރިކާއަށް މި ވަޑައިގަންނަވަނީ، އިރުމަތީ އޭޝިޔާގެ މަސްރަޙު ހޫނުވެފައިވާ ދަނޑިވަޅެއްގައެވެ. ޗައިނާއާއި ތައިވާނާ ދެމެދު ކޯޅުން ބޮޑުވެ، ދެ ކޮރެޔާގެ ދެމެދުގައި ހަނގުރާމައެއް ފެށުމުގެ ކޮޅުމަތި ފެންނަން ފަށާފައިވާ ވަގުތެއްގައެވެ. މި ކޯޅުންތަކުގެ މެދުގައި ޖަޕާނު ވެސް އޮތީ ތާށިވެފައެވެ.
ސިނާޢީ ގޮތުން އެންމެ ކުރިއަރާފައިވާ 7 ޤައުމުކަމުގައި ޖީ7ގެ ރިޔާސަތުގައި މި އަހަރު ފުރަމުންދަނީ ޖަޕާނުންނެވެ. ކިޝިޑާގެ މި ދަތުރުފުޅަކީ، ޖީ7ގެ ރައީސްގެ ހައިސިއްޔަތުން ކުރައްވާ ދަތުރުފުޅެކެވެ. މައިގަނޑު އަމާޒަކީ، އިރުމަތީ އޭޝިޔާ ސަރަޙައްދުގެ އިތުރުން ޖީ7 އެކުލެވިގެންވާ ޤައުމުތައް ހިމެނޭ ސަރަޙައްދުތަކުގެ ސަލާމަތާއި ރައްކާތެރިކަން ކަށަވަރު ކުރުމާ ގުޅޭ ގޮތުން މަޝްވަރާ ކުރުމެވެ.
މި ދަތުރުފުޅުގައި އޭނާ ފަރަންސޭސިވިލާތާއި، އިޓަލީވިލާތާއި، އިނގިރޭސިވިލާތުގެ އިތުރުން ކެނެޑާއާއި އެމެރިކާއަށް ވެސް ވަޑައިގަންނަވާނެއެވެ. މިއީ، ބޮޑުވަޒީރު ކަމުގެ މަޤާމާ ހަވާލުވެ ވަޑައިގެންނެވުމަށް ފަހު އޭނާ އެމެރިކާއަށް ކުރައްވާ ފުރަތަމަ ޒިޔާރަތެވެ. މި ދަތުރުފުޅުގައި އޭނާ އެމެރިކާގެ ރައީސް ޖޯ ބައިޑަންއާ ބައްދަލު ކުރައްވާނެއެވެ.
ކިޝިޑާގެ މި ދަތުރުފުޅުގެ އެންމެ މުހިންމު މަންޒިލަކީ ވެސް އެމެރިކާއެވެ. އެމެރިކާއަކީ އަސްކަރީ އަދި ދިފާޢީ ދާއިރާއިން ޖަޕާނުގެ ވަރަށް ގާތް އެކުވެރިއެކެވެ. ސަލާމަތީ ކަންކަމުގެ އިތުރުން ރަޝިޔާއިން ޔޫކްރެއިނަށް އަރައި ފަށާފައިވާ ހަނގުރާމައާ ގުޅިގެން ޤައުމުތަކުގެ ސަލާމަތާއި ރައްކާތެރިކަން ކަށަވަރު ކުރުމަށް ކުރިމަތިވެފައިވާ ގޮންޖެހުންތަކާ ގުޅޭ ގޮތުން ވެސް ކިޝިޑާއާއި ބައިޑަން މަޝްވަރާ ކުރައްވާނެއެވެ. އަދި، ޖަޕާނުގެ އަސްކަރިއްޔާ އިތުރަށް ބާރުވެރިކުރުމަށް އޭނާ ކުރައްވަމުން ގެންދަވާ މަސައްކަތްޕުޅާ ގުޅޭ ގޮތުން ވެސް ބައިޑަންއާ ވާހަކަފުޅު ދައްކަވާނެއެވެ.
އިރުމަތީ އޭޝިޔާގައި ޗައިނާއިން ނުފޫޒު ގަދަކުރަމުންދާ ކަމަށް ތުހުމަތުކޮށް، ހުސްވި 2022 ވަނަ އަހަރުގެ ޑިސެންބަރު މަހު ޖަޕާނުން ވަނީ އެ ޤައުމުގެ ދިފާޢީ ބަޖެޓު އިތުރުކުރަން ނިންމައި، އަސްކަރިއްޔާ އިތުރަށް ބާރުވެރިކުރުމަށް މަސައްކަތް ފަށާފައެވެ. މީގެ އިތުރުން، އުތުރު ކޮރެޔާގެ ނިއުކްލިޔަރ ޕުރޮގުރާމަކީ ވެސް ޖަޕާނުގެ ސަލާމަތާއި ރައްކާތެރިކަމަށް އޮތް ނުރައްކަލެއްގެ ގޮތުގައި އެ ޤައުމުން ދެކެއެވެ.
އުތުރު ކޮރެޔާއިން ދާދިފަހުން ހެދި ބެލިސްޓިކް މިސައިލް ޓެސްޓުތަކެއްގެ ތެރެއިން ޖަޕާނުގެ މަތިން މިސައިލެއް ފޮނުވައިލާފައިވާ ކަން ފާހަގަކުރެވެއެވެ. މި ހާދިސާއާ ގުޅިގެން ޖަޕާނުގެ އަސްކަރިއްޔާ ތައްޔާރީ ހާލަތަކަށް ގެނެސް، އެ ޤައުމުގެ ރައްޔިތުން ރައްކާތެރިކަމުގެ ފިޔަވަޅުތައް އަޅަން މަޖުބޫރުވިއެވެ.
މި އަހަރު ޖީ7ގެ ޤައުމުތަކުގެ ބައްދަލުވުން ބޭއްވުމަށް ހަމަޖެހިފައި ވަނީ ޖަޕާނުގައެވެ. ޖަޕާނުގެ އިތުރުން އެ ޖަމުޢިއްޔާގައި ހިމެނޭ ޤައުމުތަކަކީ އެމެރިކާ، ޖަރުމަނުވިލާތް، އިޓަލީވިލާތް، އަދި ފަރަންސޭސިވިލާތާއި އިނގިރޭސިވިލާތުގެ އިތުރުން ކެނެޑާއެވެ.