އދ. ދަނގެތީގެ ވިޔަފާރިވެރިޔާ މަހްމޫދު އަބޫބަކުރު މަރާލި މައްސަލާގައި މަރަށް ހުކުމްކޮށްފައިވާ ޝާހް އޮލަމް މިއާ (ސާލިމް) މަހްމޫދު މަރާލުމުގައި ބައިވެރިނުވާކަމަށް އޭނާ މިއަދު ހައިކޯޓްގައި ބުނެފިއެވެ.
ދަނގެތީގެ ވިޔާފާރިވެރިޔާ މަހްމޫދުގެ ހަބަރެއް ނުވެގެން ހޯދަން ނުކުމެ އުޅެނިކޮށް އެނާގެ ހަށިގަނޑު ފެނުނީ 2021 ވަނަ އަހަރު އޮކްޓޫބަރު މަހުގެ 13 ވަނަދުވަހުއެވެ. މަހްމޫދުގެ ހަށިގަނޑު ފެނިފައިވަނީ އަނިޔާވެރިގޮތަކަށް މަރާލުމަށްފަހު ފަޅުގެއްގެ ތެރޭގައި ހުރި ވަޅަކަށް ވައްޓާލާފައި އޮއްވައެވެ. މަހްމޫދުގެ މަރުގެ މައްސަލަ ސާބިތުވެ ސާލިމް މެރުމަށް ދަށު ކޯޓުން އަމުރުކުރީ މިދިޔަ އަހަރުގެ ތެރޭގައެވެ.
އެހުކުމް ސައްހަކަން ކަށަވަރުކުރުމަށް ޝާހް އޮލަމް ހުށައަޅާފައިނުވާތީ މައްސަލަ އިސްތިއުނާފުކުރީ ދައުލަތުގެ ފަރާތުންނެވެ.
މި މައްސަލައިގައި މިއަދު ބޭއްވި އަޑުއެހުމުގައި ޝާހް އޮލަމްގެ ދައްކާ ވާހަކަ ތަރުޖަމާކޮށްދޭން މީހަކު އިނެވެ. އެހެންނަމަވެސް އެމީހާ ދެއްކި ވާހަކަތައް އަޑުއެހުމެއްނެތި ދިވެހިން ބަހާއި ބަންގްލަދޭޝް ބަސް އެއްކޮށްގެން ޝާހް އޮލަމް ވަނީ ރުޅިވެރިކަމާއި ހިތްހަމަނުޖެހުމާއި އެކު ވާހަކަ ދައްކާފައެވެ. ދިވެހިން ވާހަކަ ދައްކަމުން ޝާހް އޮލަމް ބުނީ މަހްމޫދު މަރާލުމުގައި އޭނާ ބައިވެރިނުވާކަމަށެވެ. ދަށުކޯޓްގައި ކުށަށް އިއުތިރާފުވީ އެހެން ހެދުމުން ބަންގްލަދޭޝަށް ދެވޭނެކަމަށް އޭނާގެ ތަރުޖަމާނު ތަހުޤީގީ މަރުހަލާގައި ބުނުމުންކަމަށްވެސް ޝާހް އޮލަމް ބުންޏެވެ. އެހެންނަމަވެސް ޝާހް އޮލަމްގެ ތަރުޖަމާނަކަށް އިން ދިވެހި މީހާ ވަނީ މިވާހަކަތަކަށް އިންކާރުކޮށްފައެވެ.
ވަކީލަކު ހަމަޖައްސަން ބޭނުންތޯ މައްސަލަ ބައްލަވާ ފަނޑިޔާރުންގެ ބެންޗުން ސުވާލުކުރުމުން ޝާހް އޮލަމް ބުނީ އޭނާގެ ތަރުޖަމާނާ މެދު ހިތްހަމަނުޖެހޭކަމަށާއި މިހާރު ބޭނުންވަނީ ބަންގްލަދޭޝްގެ މީހަކު ތަރުޖަމާނެއްގެ ގޮތުގައި ހޯދުމަށްކަމަށެވެ. އަދި ދައުލަތުގެ ހަރަދުގައި ވަކީލަކު ހަމަޖައްސަން ބޭނުންކަމަށްވެސް ޝާހް އޮލަމް ވަނީ ބުނެފައެވެ. ވަކީލަކު ހަމަޖައްސަން ބޭނުންވާކަމަށް އޭނާ ބުނުމުން އެކަން އޮންނަ ގޮތް އޭނާއަށް ވަނީ ކިޔާދީފައެވެ. އަދި މިއަދުގެ އަޑުއެހުން ނިންމާލީ ވަކީލަކު ހަމަޖެއްސުމަށް އޭނާއަށް ފުރުސަތު ދިނުމަށްފަހުއެވެ.
މިމައްސަލަ ބައްލަވާ ހައިކޯޓްގެ ބެންޗުގައި ހިމެނިވަޑައިގަންނަވަނީ ފަނޑިޔާރު މުހައްމަދު ނިޔާޒާއި ފަނޑިޔާރު ހަސަން ޝަފީއުއާ ފަނޑިޔާރު ފާތިމަތު ފަރުހީޒާއެވެ.
މަރުގެ މައްސަލާގައި އެއްވެސް މީހެއްގެ މައްޗަށް މަރުގެ ހުކުމް އިއްވައިފިނަމަ އެ ހުކުމް ތަންފީޒުކުރެވޭނީ ސުޕްރީމްކޯޓުން އެ ނިންމުމަށް ތާއިދުކުރުމުންނެވެ. މަރުގެ މައްސަލަތަކުގައި ސުޕްރީމްކޯޓުން މަރުގެ ހުކުމް 3 މީހެއްގެ ވަނީ ދަމަހައްޓާފައެވެ.