މިޔަންމާގެ ރޮހިންޔާ ދަރިކޮޅުގެ 200 އަށްވުރެ ގިނަ މުސްލިމުންނާ އެކު ދަތުރުކުރަމުންދިޔަ ބޯޓެއް އިންޑޮނީޝިޔާގެ ބަންޑަ އަޗޭގައި ބަނދަރުކޮށްފިއެވެ. އިންޑިނޮޝިޔާގެ ހުޅަނގު ފަރާތު އައްސޭރިފަށުގެ ރަށަކަށް ބަނދަރުކުރި މި ބޯޓުގައި ގިނައީ އަންހެނުންނާއި ކުޑަކުދިންނެވެ. އެ މީހުންނަށް އިންސާނީ އެހީތެރިކަން ފޯރުކޮށްދިނުމަށް އެ ޤައުމުގެ ފުލުހުން ދަނީ މަސައްކަތް ކުރަމުންނެވެ.
މިއީ، ހުސްވި 2022 ވަނަ އަހަރުގެ ނޮވެންބަރު މަހަށް ފަހު ރޮހިންޔާ މުސްލިމުންނާ އެކު އިންޑޮނީޝިޔާއަށް ބަނދަރުކޮށްފައިވާ ފަސްވަނަ ބޯޓެވެ. އެ މީހުން ދަތުރުކޮށްފައި ވަނީ ލަކުޑިން ބަނދެފައިވާ، ގިނަ ދުވަސްވެ، ހަލާކުވާން ކައިރިވެފައިވާ ބޯޓުފަހަރުގައެވެ. އެންމެ ފަހުން އިންޑޮނީޝިޔާއަށް ދިޔަ ބޯޓުގައި 69 ފިރިހެނުންނާއި 75 އަންހެނުންނާއި 40 ކުޑަކުދިން ތިބި ކަމުގައި އެ ޤައުމުގެ ފުލުހުން ބުނެއެވެ.
"ބޯޓުގައި ތިބި ގިނަ މީހުންގެ ހާލު ޖުމުލަ ގޮތެއްގައި ރަނގަޅު. ނަމަވެސް، މާބަނޑު އަންހެނަކާއި ބަލި ހަތަރު މީހުން އޭގައި ތިބި. އެ މީހުންނަށް ޞިއްޙީ ފަރުވާ ދިނުމަށް މި ދަނީ މަސައްކަތް ކުރަމުން. އަދި، އެ އެންމެންގެ ޞިއްޙީ ހާލަތު ދެނެގަތުމަށް ޓެސްޓުތައް ހަދަމުން މި ދަނީ،" އަޗޭގެ ފުލުހުންގެ އިސްވެރިޔާ އިރްފާން ފަހުމީ ރަމްލީ ވިދާޅުވިއެވެ.
މި ބޯޓުގައި ތިބި މީހުން އިންޑޮނީޝިޔާގެ ސަރުކާރުން ގާއިމުކޮށްފައިވާ ވަގުތީ ހިޔާއަކަށް ގެންދިޔުމަށް މަސައްކަތް ކުރަމުންދާ ކަމުގައި ވެސް އޮފިޝަލުން ބުނެއެވެ. ބޯޓުގައި ދަތުރު ކުރި ބައެއް މީހުން މަޢުލޫމާތު ދިން ގޮތުގައި، މި ބޯޓު ފުރާފައި ވަނީ 2022 ޑިސެންބަރު 10 ގައި ބަންގްލަދޭޝުންނެވެ. ބޯޓުގައި ތިބީ، ބަންގްލަދޭޝަށް ހިޖުރަކޮށްފައިވާ މިޔަންމާގެ ރޮހިންޔާ ދަރިކޮޅުގެ ރެފިޔުޖީންނެވެ.
މިޔަންމާގައި ކުރިމަތިވަމުންދާ ނަސްލީ ތަފާތުކުރުންތަކާއި، ޖެހިފައިވާ ނިކަމެތި ހާލުން ސަލާމަތްވުމަށް މިލިޔަނަކަށް ވުރެ ގިނަ ރޮހިންޔާ މުސްލިމުން ވަނީ ބަންގްލަދޭޝަށް ހިޖުރަކޮށްފައެވެ. މީގެ ތެރޭގައި، 2017ވަނަ އަހަރު މިޔަންމާގެ އަސްކަރިއްޔާއިން ފެށި އަނިޔާވެރި ކެމްޕޭނަކުން ސަލާމަތްވުމަށް ބަންގްލަދޭޝަށް ހިޖުރަކުރި އެތަކެއް ހާސް މުސްލިމުން ހިމެނެއެވެ.
ބަންގްލަދޭޝްގެ ރެފިޔުޖީ ކޭމްޕުތަކުގައި ވެސް ރޮހިންޔާ މުސްލިމުން ދިރިއުޅެމުން ދަނީ ވަރަށް ނިކަމެތި ހާލުގައެވެ. ބަންގްލަދޭޝްގެ ރެފިޔުޖީ ކޭމްޕުތައް ދޫކޮށް މެލޭޝިޔާއާއި އިންޑޮނީޝިޔާއަށް ހިޖުރަކުރަން މަސައްކަތް ކުރާ ރޮހިންޔާ މުސްލިމުންގެ އަދަދު ފަހަކަށް އައިސް ވަނީ އިތުރުވެފައެވެ. މީގެ ތެރެއިން ވެސް ބައެއް މީހުން ދަތުރުކުރި އުޅަނދުފަހަރު ކަނޑުވެ، ގިނަ އަދަދެއްގެ ބަޔަކު މަރުވެފައިވާ ކަމަށް ބެލެވޭ ކަމުގައި އ.ދ.ގެ ރެފިޔުޖީންނާ ބެހޭ އިދާރާ (ޔޫ.އެން.އެޗް.ސީ.އާރް)އިން ބުނެއެވެ.
2022 ވަނަ އަހަރު 2,400 އަށްވުރެ ގިނަ ރޮހިންޔާ މުސްލިމުން ކަނޑު ހުރަސްކޮށް ހިޖުރަކުރަން މަސައްކަތް ކޮށްފައިވާ ކަމަށާއި، އޭގެތެރެއިން 200 އެއްހާ މީހުން މަރުވެފައިވާ ކަމަށް ބެލެވޭ ކަމުގައި އެ އިދާރާއިން ބުނެއެވެ. މީގެ ތެރެއިން ގިނަ އަދަދެއްގެ ބަޔަކު ދަތުރު ކުރި ބޯޓުތައް ވަނީ މެލޭޝިޔާއާއި އިންޑޮނީޝިޔާއަށް ބަނދަރުކޮށްފައެވެ.
ރޮހިންޔާ ދަރިކޮޅުގެ 180 އަށްވުރެ ގިނަ މުސްލިމުން ދަތުރުކުރި ބޯޓެއް ކަނޑުވެ، ގެއްލިފައިވާ ކަމަށް ބެލެވޭ ކަމުގައި ޔޫ.އެން.އެޗް.ސީ.އާރް.އިން ދާދިފަހުން ވަނީ ބުނެފައެވެ. އެ އިދާރާއިން ބުނެފައި ވަނީ، ބޯޓު ފެތިފައިވާ ކަމަށް ބެލެވޭ ކަމުގައެވެ. ގިނަ އަދަދެއްގެ ރޮހިންޔާ މުސްލިމުންނާ އެކު އަންދަމަން ކަނޑުގައި ދަތުރު ކުރަމުން ދިޔަ ބޯޓެއް ހާލުގައި ޖެހިފައިވާ ކަމުގެ އިންޒާރު އެ އިދާރާއިން މީގެ ކުރިން ވެސް ވަނީ ކޮށްފައެވެ.
އެ މީހުން ސަލާމަތް ކުރުމަށް މެލޭޝިޔާއާއި ތައިލެންޑުގެ އިތުރުން އިންޑޮނީޝިޔާއަށް އެ އިދާރާއިން ގޮވައިލާފައިވެއެވެ. ނަމަވެސް، އެއްވެސް ޤައުމަކުން އެ ގޮވައިލުމަށް އިޖާބަދީފައެއް ނުވެއެވެ. 2020 ވަނަ އަހަރު ވެސް 2,000 ވަރަކަށް ރޮހިންޔާ މުސްލިމުން ކަނޑު ހުރަސްކޮށް އެހެން ޤައުމުތަކަށް ހިޖުރަކޮށްފައިވެއެވެ