އެމްޑީޕީގެ ޕްރައިމަރީ އިންތިހާބުގައި ވާދަކުރައްވާ ދެ ކެންޑިޑޭޓުންކަމަށްވާ، ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުއާއި ރައީސް މުހައްމަދު ނަޝީދު ނ.އަތޮޅާއި ބ.އަތޮޅަށް ވަޑައިގެންފިއެވެ.
ރައީސް ސާލީހު އާއި ރައީސް ނަޝީދުގެ ބ.އަތޮޅާއި ނ.އަތޮޅަށް ކުރައްވާ މި ދަތުރުފުޅަކީ މިމަހު 28 ވަނަ ދުވަހު ބާއްވާ އެމްޑީޕީގެ ޕްރައިމަރީ އިންތިހާބުގެ ކެމްޕެއިންއަށް ތާއީދު ހޯއްދެވުމަށް ކުރައްވާ ދަތުރުފުޅެކެވެ.
މިމަހު ބާއްވާ އެމްޑީޕީގެ ޕްރައިމަރީ ކެމްޕެއިންގެ ފޯރިގަދަވެފައިވާއިރު ޕްރައިމަރީގައި ވާދަކުރައްވާ ދެ ކެނޑިޑޭޓުން ގެންދަވަނީ ވާދަވެރި ކެމްޕެއިނެއް ކުރައްވަމުންނެވެ.
ކެނޑިޑޭޓުންގެ ދަތުރުފުޅުތަކަށް ބަލާލާއިރު ރ.އަތޮޅާއި ނ.އަތޮޅު އަދި ޅ.އަތޮޅަށް ކުރެއްވި ދަތުރުފުޅަށްފަހު އެމްޑީޕީގެ އެންމެ އިސް ލީޑަރު އަދި ރައީސުލްޖުމްހުރިއްޔާ އިބްރާހިމް މުހައްމަދު ސާލިހު ކެމްޕެއިންގެ މައިގަނޑު ހަރަކާތްތައް މިއަދު ކުރިއަށް ދިޔައީ ބ.އަތޮޅުގައެވެ.
އެގޮތުން ރައީސް ސާލިހުގެ އުފަން ރަށް ޅ.ހިންނަވަރުގައި ކެމްޕެއިން ހަރަކާތްތައް ހިންގެވުމަށްފަހު، ހިންނަވަރުން އެމަނިކުފާނު ވަޑައިގެންނެވީ ބ.އަތޮޅު އޭދަފުށްޓަށެވެ. އޭދަފުށްޓަށް ވަޑައިގެން އެ ރަށުގައި ތިއްބެވި އެމްޑީޕީގެ އާއްމު މެމްބަރުންނާއި ބައްދަލުކުރައްވާ ވަނީ ވާހަކަފުޅު ދައްކަވާފައެވެ. އަދި ބ.އަތޮޅުގައި ހިންގަމުންދާ އަދި ރާވާފައިވާ ތަރައްގީގެ މަސައްކަތްތަކުގެ ތަފްސީލްތައް ހާމަކުރެއްވިއެވެ.
އޭދަފުށްޓަށްފަހު، އެމަނިކުފާނު ވަނީ އެއަތޮޅު ހިތާދޫ އަދި ގޮއިދޫއަށް ވަޑައިގެން އެ ރަށްރަށުގައި ތިއްބެވި އެމްޑީޕީގެ އާއްމު މެމްބަރުންނާއި ބައްދަލުކުރައްވާފައެވެ. އަދި މިއަދު ހަވީރު ދަރަވަންދޫއަށް ވަޑައިގެން ވަނީ ހަރުގެ ޖަލްސާއެއްވެސް ބާއްވާފައެވެ.
ބ.ދަރަވަންދޫ އެމްޑީޕީ ކުރިއަށް ޖަލްސާ.#MDPKuriah #Ibu2023 pic.twitter.com/iqqhZqjW6g
— MDP Kuriah (@MDPKuriah) January 9, 2023
އެމްޑީޕީގެ ޕްރައިމަރީގައި ވާދަކުރައްވާ އެމްޑީޕީގެ ރައީސް، ރައީސް މުހައްމަދު ނަޝީދުގެ ކެމްޕެއިން ހަރަކާތްތަކަށް ބަލާލާއިރު އެމަނިކުފާނު ރޭ ވަނީ ހއ، ހދ، ށ އަދި ފުވައްމުލަކު ސިޓީގެ އެމްޑީޕީ މެންބަރުންނާއި މާލޭގައި ބައްދަލުކުރައްވާފައެވެ. އަދި އެމަނިކުފާނު މިއަދު ވަނީ ނ، ރ އަދި ބ އަތޮޅަށް ކުރައްވާ ދަތުރުފުޅެއް ފަށްޓަވާފައެވެ.
މިދަތުރުފުޅުގައި ރައީސް ނަޝީދު އެންމެ ފުރަތަމަ ވަޑައިގެންނެވީ ނ.މާފަރަށެވެ. މާފަރުގައި ރައްޔިތުންނާއި ބައްދަލުކުރުމުގެ ހަރަކާތްތަކަށްފަހު، ރައީސް ނަޝީދު ވަނީ އެއަތޮޅު ލަންދޫ، ކުޑަފަރި، ކެނދިކުޅުދޫ، ޅޮހި، މަނަދޫ އަދި ވެލިދޫއަށްވެސް މިއަދު ވަޑައިގެންފައެވެ.
މި ދަތުރުފުޅުގައި ރައީސް ނަޝީދު ވަނީ ޑޯޓުޑޯއަށް ހިންގަވާ، އެ ރަށްރަށުގައި އުޅުއްވާ ރައްޔިތުންނާއި ބައްދަލުކުރައްވާފައެވެ.
ވެލިދޫ ރޫޙުވަނީ #ހިތްތަކުގެރައީސް އެކު ❤️
— Sim (@Simwarr) January 9, 2023
އެދުވަހުވެސް މިއަދުވެސް ދެގޮތެއް ނުވާނަން، މިތިބީ ސާބިތުކަންމަތީ ރައީސް ނަޝީދާއި އެކު #ހިތާހިތުގެގުޅުން #Live Velidhoo #Anni2023 #FikureggeDhirun pic.twitter.com/hZruHbIHO8
އެމްޑީޕީގެ ޕްރައިމަރީގެ ވޯޓްލުން މިމަހުގެ 28 ވަނަ ދުވަހު އޮންނައިރު އެމްޑީޕީން މިހާރު ވަނީ އިންތިހާބުގައި ވޯޓްލުމުގެ ހައްގު ލިބިފައިވާ މީހުންގެ ދާއިމީ ލިސްޓް އާއްމުކޮށްފައެވެ.