މީގެ ތިން އަހަރު ކުރިން މަރައިލާފައިވާ އީރާނުގެ އަސްކަރިއްޔާގެ އިސް އޮފިސަރެއް ކަމުގައިވާ ޖެނެރަލް ޤާސިމް ސުލައިމާނީގެ މަރުގެ ބަދަލު ހިފާނެ ކަމަށް ވިދާޅުވެ، އެ ޤައުމުގެ ރައީސް އިބްރާހީމް ރައީސީ އެމެރިކާއަށް ވަރުގަދަ އިންޒާރެއް ދެއްވައިފިއެވެ. އޭނާ މި ފަދައިން އިންޒާރު ދެއްވާފައި ވަނީ، ސުލައިމާނީގެ މަރަށް ތިން އަހަރު ފުރުން ފާހަގަ ކުރުމަށް ބޭއްވި ހަފުލާއެއްގައި ވާހަކަފުޅު ދައްކަވަމުންނެވެ.
ސުލައިމާނީއަކީ، އީރާނުގެ އިސްލާމިކް ރިވޮލޫޝަނަރީ ގާޑްސްގެ އެންމެ ބާރުގަދަ ގޮފި ކަމުގައިވާ ޤުދްޞް ފޯސްގެ އެންމެ އިސްވެރިޔާއެވެ. އޭނާ މަރައިލުމަށް އަމުރު ކޮށްފައި ވަނީ އެމެރިކާގެ ކުރީގެ ރައީސް ޑޮނަލްޑް ޓްރަމްޕެވެ. 62 އަހަރުގެ ސުލައިމާނީ މަރައިލާފައި ވަނީ 2020 ވަނަ އަހަރުގެ ޖަނަވަރީ މަހުގެ 3 ވަނަ ދުވަހެވެ. އޭނާ މަރައިލާފައި ވަނީ އެމެރިކާގެ އަސްކަރިއްޔާއިން ދިން ޑްރޯން ހަމަލާއެއްގައެވެ.
"ސުލައިމާނީއަކީ ޝަހީދެއް. އޭނާގެ ހަނދާންތައް މި ޤައުމުން ދުވަހަކު ވެސް ފޮހެވިގެން ނުދާނެ. އޭނާގެ ލޭ އޮހޮރުވައިލި މީހުންނަށް ބުނަން އޮތީ، އީރާނުން އޭނާގެ މަރުގެ ބަދަލު ހިފާނަމޭ. ކަލޭމެންނަށް އަރާމުގައި ލޮލުފިޔައެއް ވެސް ޖަހައިލުމުގެ ފުރުޞަތު ނުދޭނަން،" ރައީސީ ވިދާޅުވިއެވެ.
ސުލައިމާނީއަކީ އީރާނުގެ ޢާންމުންގެ މެދުގައި ވެސް ވަރަށް މަޤުބޫލު ބޭފުޅެކެވެ. އީރާނުން މެދުއިރުމަތީގެ ޤައުމުތަކުގައި ހިންގާ އަސްކަރީ އަދި ޖާސޫސީ އޮޕަރޭޝަންތަކުގައި އެންމެ އިސްކޮށް ހަރަކާތްތެރިވެފައި ވަނީ އޭނާއެވެ. އަދި، އޭނާއަކީ 1980 އިން 1988 ވަނަ އަހަރާ ދެމެދު ކުރި އީރާން-އިރާޤު ހަނގުރާމައިގެ ބަޠަލެއްގެ ގޮތުގައި އީރާނުގެ ރައްޔިތުން ޤަބޫލު ކުރާ ބޭފުޅެކެވެ.
އެމެރިކާގެ އަސްކަރިއްޔާއިން ސުލައިމާނީ މަރައިލާފައި ވަނީ އިރާޤުގެ ވެރިރަށް ބަޣްދާދުގެ ވައިގެ ބަނދަރަށް ދިން ޑްރޯން ހަމަލާއެއްގައެވެ. މި ހަމަލާގައި އިރާޤުގެ އަސްކަރިއްޔާގެ އިސް އޮފިޝަލެއް ކަމުގައިވާ ލެފްޓިނެންޓް އަބޫ މަޙުދީ އަލް-މުހަންދިސް ވެސް މަރުވިއެވެ. ސުލައިމާނީ މަރައިލާފައި ވަނީ އެމެރިކާގެ ޚާރިޖީ ވުޒާރާގެ އޮފިޝަލުންނާއި ސިފައިންނާ ދެކޮޅަށް ހަމަލާތަކެއް ދިނުމަށް ރާވަމުންދާތީ، އެ ހަމަލާތައް ހުއްޓުވުމުގެ ބޭނުމުގައި ކަމުގައެވެ.
ސުލައިމާނީގެ މަރާ ގުޅިގެން ބަދަލު ހިފުމުގެ ގޮތުން އީރާނުން ވަނީ އިރާޤުގައި ހުންނަ އެމެރިކާގެ އަސްކަރީ މަރުކަޒުތަކަށް ވަރުގަދަ ހަމަލާތަކެއް ދީފައެވެ. ނަމަވެސް، މި ހަމަލާތަކުގައި އެމެރިކާ ސިފައިންގެ އެއްވެސް މީހެއްގެ ފުރާނަ ގެއްލިފައި ނުވާ ކަމުގައި އެމެރިކާއިން ބުނެއެވެ. އެ ދުވަސްވަރު އީރާނުން ވަނީ އޮޅުމެއްގެ ތެރޭގައި ޔޫކްރެއިނުގެ ފަސިންޖަރުން އުފުލާ މަތިންދާބޯޓަކަށް ވެސް ހަމަލާދީފައެވެ. އެ ހާދިސާގައި 176 މީހުން މަރުވިއެވެ.