ޔޫކްރެއިނުގެ ދެކުނުގައިވާ ޚާރްސަންގެ ރަށްބޭރުގައި ހުންނަ ހޮސްޕިޓަލަކަށް ރަޝިޔާ ސިފައިން ދިން ހަމަލާތަކެއްގެ ގިނަ އަދަދެއްގެ ބަޔަކު ޒަޚަމުވެއްޖެއެވެ. ޚާރްސަންއަކީ ރަޝިޔާ ސިފައިން އަތްގަދަކޮށްފައިވާ އޮތް ސަރަޙައްދުތަކުގެ ތެރެއިން އެއް ސަރަޙައްދެވެ. ނަމަވެސް، ޔޫކްރެއިނު ސިފައިން ވަނީ އެ ސަރަޙައްދު މިނިވަން ކޮށްފައެވެ.
ރަޝިޔާ ސިފައިންގެ އާޓިލަރީ ބަޑީގެ ހަމަލާތައް އަމާޒުކޮށްފައި ވަނީ ޚާރްސަންގެ ރަށްބޭރުގައި އޮންނަ ރަށެއް ކަމުގައިވާ ނެޑްނިޕްރިއަންސްކްއަށް ކަމަށް ޚާރްސަންގެ އޮފިޝަލުން ބުނެއެވެ. އެ ހަމަލާގައި ގިނަ އަދަދެއްގެ ބަޔަކު ޒަޚަމުވި ކަމަށާއި، އެ މީހުންނަށް ފަރުވާ ދިނުމަށް އެ ސަރަޙައްދުގެ ހޮސްޕިޓަލަކަށް ގެންދިޔަ ފަހުން، ރަޝިޔާ ސިފައިން އެ ހޮސްޕިޓަލަށް ހަމަލާދީފައިވާ ކަމުގައި ވެސް އޮފިޝަލުން ބުނެއެވެ.
ނެޑްނިޕްރިއަންސްކްއަށް ދިން ހަމަލާތަކުގައި 13 އަހަރުގެ ކުއްޖަކު ޒަޚަމުވިއެވެ. އަދި، ހޮސްޕިޓަލުގެ އައި.ސީ.ޔޫ.ގައި އޭނާއަށް ފަރުވާދެމުން ދަނިކޮށް ރަޝިޔާއިން ދިން ހަމަލާތަކުގައި އޭނާއަށް އިތުރު ޒަޚަމުތަކެއް ލިބުނު ކަމުގައި އެ ރަށުގެ އޮފިޝަލުން ބުނެއެވެ. މި ހަމަލާތަކުގައި އެ ސަރަޙައްދުން ކަރަންޓުގެ ޚިދުމަތް ވެސް މެދުކެނޑުނެވެ.
ޖަނަވަރީ 2 ވަނަ ދުވަހު ރަޝިޔާއިން ވަނީ ޔޫކްރެއިނުގެ ވެރިރަށް ކީވްގެ އިތުރުން ބޮޑެތި އެހެން ރަށްތަކަށް ވެސް ވަރުގަދަ ހަމަލާތަކެއް ދީފައެވެ. މިސައިލާއި ޑްރޯން ބޭނުންކޮށްގެން ދީފައިވާ މި ހަމަލާތަކުގައި ހަތަރު މީހުން މަރުވި ކަމުގައި ކީވްގެ އޮފިޝަލުން ބުނެއެވެ. އަދި ދެކުނުގައި ޒަޕޮރީޜިޔާއަށް ދިން ހަމަލާތަކެއްގައި ވެސް އިތުރު މީހަކު މަރުވި ކަމުގައި އެ ސަރަޙައްދުގެ އޮފިޝަލުން ބުނެއެވެ.
ރަޝިޔާގެ ހަމަލާތައް މީގެ ކުރިން އަމާޒުކުރަމުން ގޮސްފައި ވަނީ ޔޫކްރެއިނުގެ ރައްޔިތުންނަށް އަސާސީ ޚިދުމަތްތައް ދިނުމަށް ބޭނުންކުރާ ވަސީލަތްތަކަށެވެ. އިންޖީނުގެތަކާއި ކަރަންޓާއި ފެނުގެ ޚިދުމަތް ދިނުމަށް ބޭނުން ކުރާ ވަސީލަތްތަކަށެވެ. ނަމަވެސް، ރަޝިޔާ ސިފައިންގެ އަމާޒުތައް މިހާރު ބަދަލުވެފައިވާ ކަމުގައި ޔޫކްރެއިނުން ބުނެއެވެ.
އެންމެ ފަހުން ދިން ހަމަލާތައް އަމާޒުކޮށްފައި ވަނީ ޢާންމުން ދިރިއުޅޭ ސަރަޙައްދުތަކަށް ކަމުގައި ރައީސް ވޮލޮޑޮމީރް ޒެލެންސްކީގެ އިސް މުޝީރެއް ކަމުގައިވާ މިޚައިލޯ ޕޮޑޮލްޔެކް ވިދާޅުވިއެވެ. ވެރިރަށް ކީވްގެ ޑެސްނިޔަންސްކީއަށް ދިން ހަމަލާތަކުގައި 19 އަހަރުގެ ޒުވާނަކު ޒަޚަމުވެ، ހޮސްޕިޓަލުގައި އެޑްމިޓުކޮށްގެން ފަރުވާދޭން ޖެހުނެއެވެ.
ޔޫކްރެއިނުގެ ރައްޔިތުން އައު އަހަރަށް މަރުޙަބާ ކިޔާފައި ވަނީ ވެސް ރަޝިޔާގެ ވަރުގަދަ ހަމަލާތަކަކާ އެކުގައެވެ. ރަޝިޔާ ސިފައިން ޔޫކްރެއިނަށް އަރާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހެވެ. މި ހަނގުރާމައަށް 10 މަސް ފުރި 11 ވަނަ މަސް ފެށިފައިވާއިރު، ހަނގުރާމައަށް ނިމުމެއް އަންނާނެ ދުވަހެއް ނޭނގޭ ކަމުގައި ޒެލެންސްކީ ވަނީ ވިދާޅުވެފައެވެ. އަދި، ޔޫކްރެއިނަށް އަތްގަދަކޮށްފައިވާ ރަޝިޔާ ސިފައިން އެ ޤައުމުން ބޭލުމަށްފަހު ނޫނީ ހަނގުރާމަ ކުރުން ހުއްޓައިނުލާނެ ކަމުގައި އޭނާ ވިދާޅުވެއެވެ.