ސޫރިޔާގައި ހަރަކާތްތެރިވާ އައި.އެސް. ޖަމާޢަތުގެ ހަނގުރާމަވެރިންނާ ދެކޮޅަށް އެ ޤައުމުގައި ހަރަކާތްތެރިވާ ސީރިޔަން ޑިމޮކްރެޓިކް ފޯސް (އެސް.ޑީ.އެފް)އިން އަސްކަރީ ކެމްޕޭނެއް ފަށައިފިއެވެ. އެސް.ޑީ.އެފް.އަކީ ކުރުދީ ދަރިކޮޅުގެ ހަނގުރާމަވެރިންގެ މައްޗަށް އެކުލެވިގެންވާ ޖަމާޢަތެކެވެ.
އެ ޖަމާޢަތުން އައި.އެސް.ގެ ހަނގުރާމަވެރިންނާ ދެކޮޅަށް އަސްކަރީ ކެމްޕޭނެއް ފަށާފައި މި ވަނީ، އައި.އެސް.ގެ ހަމަލާތައް އިތުރު ކޮށްފައިވާ ދަނޑިވަޅެއްގައެވެ. ރަޤާގައި ހުންނަ ޖަލަކަށް އަމާޒުކޮށް އައި.އެސް. ޖަމާޢަތުގެ ހަނގުރާމަވެރިން ދާދި ފަހުން ދިން ހަމަލާއެއްގައި ކުރުދީ ހަނގުރާމަވެރިންގެ ހަ މީހަކު ވަނީ މަރައިލާފައެވެ.
އެސް.ޑީ.އެފް.އިން ބުނީ، "އޮޕަރޭޝަން އަލް-ޖަޒީރާ ތަންޑަރބޮލްޓް"ގެ ނަން ދީފައިވާ މި ކެމްޕޭނުގެ މަޤުޞަދަކީ، ފަހަކަށް އައިސް އައި.އެސް. ޖަމާޢަތުގެ ހަނގުރާމަވެރިން ހަރަކާތްތެރިވާން ފަށާފައިވާ ކަމަށް ބެލެވޭ ސަރަޙައްދުތައް ބަލައި، އެ ސަރަޙައްދުތަކުގައި އުޅޭ ހަނގުރާމަވެރިން ހޯދައި، އެ މީހުންގެ އަމަލުތަކާއި ހަމަލާތައް ހުއްޓުވުން ކަމުގައެވެ.
އެސް.ޑީ.އެފް.ގެ މި ކެމްޕޭނުގައި އެމެރިކާއިން އެކުލަވައިލާފައިވާ ގުޅިފައިވާ ލަޝްކަރުން ވެސް ބައިވެރިވާނެއެވެ. އެ ކަން އެސް.ޑީ.އެފް.އިން އިޢުލާނުކޮށްފައިވީ ނަމަވެސް، ގުޅިފައިވާ ލަޝްކަރުން އަދި މިހާތަނަށް އެ ކަން ކަށަވަރު ކޮށްދީފައެއް ނުވެއެވެ.
ރަޤާގައި އައި.އެސް.އިން ދޭން މަސައްކަތްކުރި ހަމަލާތައް ރޫޅައިލާފައިވީ ނަމަވެސް، އެ ޖަމާޢަތުން ސޫރިޔާގެ އުތުރުގެ ސަރަޙައްދުތައް ކަމުގައިވާ ދީރު އަޒޫރާއި ހަސާކާގެ އިތުރުން އަލް-ހޯލްގައި ޓެރެރިސްޓް ހަމަލާތައް ދީފައިވާ ކަމަށް އެސް.ޑީ.އެފް.އިން ބުނެއެވެ. މި ހަމަލާތައް އަމާޒު ކޮށްފައި ވަނީ ރެފިޔުޖީން ދިރިއުޅޭ ސަރަޙައްދުތަކަށް ކަމުގައި ވެސް އެސް.ޑީ.އެފް.އިން ބުނެއެވެ.
ސޫރިޔާގެ ހަރަކާތްތެރިވާ ކުރުދީން ހަނގުރާމަވެރި ޖަމާޢަތްތަކުގެ އަމާޒުތަކަށް ތުރުކީ ވިލާތުން ދާދިފަހުން ވަނީ ވައިގެ ހަމަލާތަކެއް ދީފައެވެ. އެ ހަމަލާތަކަކީ، އިސްތަންބޫލުގައި ދިން ޓެރެރިސްޓް ހަމަލާއެއްގެ ބަދަލު ހިފުމުގެ ގޮތުން ދީފައިވާ ހަމަލާތަކެކެވެ. ތުރުކީގެ ވައިގެ ހަމަލާތަކާ ގުޅިގެން އައި.އެސް. ޖަމާޢަތުން ވެސް ކުރުދީ ހަނގުރާމަވެރިންނާ ދެކޮޅަށް ޓެރެރިސްޓް ހަމަލާތައް އިތުރު ކޮށްފައިވާ ކަމުގައި އެސް.ޑީ.އެފް.އިން ބުނެއެވެ.
2014 ވަނަ އަހަރު އައި.އެސް. ޖަމާޢަތުން ވަނީ ސޫރިޔާއާއި އިރާޤުގެ ބައެއް ސަރަޙައްދުތަކަށް އަތްގަދަކޮށް، އެ މީހުންގެ ޚިލާފަތެއް އިޢުލާނު ކޮށްފައެވެ. އަދި، އެމެރިކާއާއި ގުޅިފައިވާ ފައުޖުތަކުން އެ ޤައުމުތަކަށް އަރައި، އައި.އެސް. ޖަމާޢަތް ވަނީ ބަލިކޮށްފައެވެ. މި ހަނގުރާމައިގައި އެންމެ އިސް ދައުރެއް އަދާކޮށްފައި ވަނީ އެސް.ޑީ.އެފް.އިންނެވެ.
ސޫރިޔާގެ ސަރަޙައްދުތަކުން އައި.އެސް. ޖަމާޢަތުގެ ހަނގުރާމަވެރިން ފައްސައިލާފައި ވަނީ 2019 ވަނަ އަހަރެވެ. ނަމަވެސް، އެ ޖަމާޢަތުގެ ހަނގުރާމަވެރިން ސޫރިޔާއާއި އިރާޤުގެ ބައެއް ސަރަޙައްދުތަކުގައި އަދިވެސް ދަނީ ހަރަކާތްތެރިވަމުންނެވެ.