ފިލިޕީންސްގެ ދެކުނުގެ ސަރަޙައްދުތަކަށް ބޯކޮށް ވާރޭވެހި، ފެންބޮޑުވުމުގެ ސަބަބުން ކުރިމަތިވި ހާދިސާތަކުގައި މަރުވި މީހުންގެ އަދަދު 13 އަށް އަރައިފިއެވެ. ވިއްސާރައިގައި ފެންބޮޑުވުމުގެ އަސަރު އެންމެ ބޮޑަށް ކޮށްފައި ވަނީ ދެކުނުގައިވާ މިސަމިސް އޮކްސިޑެންޓަލް ޕުރޮވިންސާއި ކަމަރިންސް ސޫރް ޕުރޮވިންސުގެ ސަރަޙައްދުތަކަށެވެ. ފެންބޮޑުވުމުގެ ސަބަބުން މިސަމިސް އޮކްސިޑެންޓަލް ޕުރޮވިންސުގެ ގިންގޫގް ސިޓީގައި ގިނަ އަދަދެއްގެ ރައްޔިތުން ވަނީ ހާލުގައި ޖެހިފައެވެ.
އެ ސަރަޙައްދުގައި ފެންބޮޑުވުމުގެ އަސަރު ކޮށްފައިވާ މީހުންގެ އަދަދު 166,000 އަށް އަރާ ކަމުގައި އެ ޤައުމުގެ ކާރިސާތަކާ ބެހޭ މައި އިދާރާއިން ބުނެއެވެ. އަދި، ފެންބޮޑުވުމާ ގުޅިގެން 45,000 އަށްވުރެ ގިނަ މީހުން މިހާރު ވެސް ރައްކާތެރި ހިސާބުތަކަށް ބަދަލު ކޮށްފައިވާ ކަމުގައި އެ އިދާރާއިން ބުނެއެވެ.
ފެންބޮޑުވުމާ ގުޅިގެން ކުރިމަތިވި އެކި ހާދިސާތަކާ އެކު 23 މީހަކު ގެއްލިފައިވާ ކަމަށާއި، އެ މީހުން ހޯދުމަށް މަސައްކަތް ކުރަމުންދާ ކަމުގައި ވެސް އެ އިދާރާގެ އޮފިޝަލުން ބުނެއެވެ. ބޯކޮށް ވާރޭވެހުމާ ގުޅިގެން ބައެއް ސަރަޙައްދުތަކުގެ ބިންގަނޑު ވަނީ ކަނޑައިގެން ގޮސްފައެވެ. އަދި، ކޯރުތައް ފުރިގެން ބަންޑުންވެ، ބައެއް މަގުތައް ބަންދުވެފައިވާ ކަމުގައި އޮފިޝަލުން ބުނެއެވެ. ގިނަ ސަރަޙައްދުތަކުން ކަރަންޓުގެ ޚިދުމަތް ވެސް ވަނީ މެދުކެނޑިފައެވެ.
ފެންބޮޑުވުމާ ގުޅިގެން މަރުވި މީހުންގެ ތެރޭގައި އެއް އަހަރުގެ ތުއްތު އަންހެން ކުއްޖަކާއި، ގެނބިގެން މަރުވި 64 އަހަރުގެ ފިރިހެނެއް ހިމެނެއެވެ. އަދި، 68 އަހަރުގެ އަންހެނަކު ސަލާމަތްކުރަން އުޅުމުގެ ތެރޭގައި ހިތް ހުއްޓިގެން މަރުވެފައިވާ ކަމުގައި ވެސް އެ ޤައުމުގެ އިދާރާތަކުން ބުނެއެވެ. ގެއްލިފައިވާ ކަމަށް ބެލެވޭ މީހުންގެ ތެރޭގައި ގިނައީ މަހަށް ނިކުމެ އުޅުނު މަސްވެރިންނެވެ.
ފިލިޕީންސްގެ ދެކުނުގެ ސަރަޙައްދުގައި އުފެދިފައިވާ "ޝިއަރ ލައިން"އެއްގެ ސަބަބުން ކުރިއަށް އޮތް ދުވަސްތަކުގައި ވެސް އެ ސަރަޙައްދަށް ބޯކޮށް ވާރޭވެހޭނެ ކަމަށް އެ ޤައުމުގެ މޫސުމާ ބެހޭ އިދާރާއިން ލަފާ ކުރެއެވެ. އަދި، ބޯކޮށް ވާރޭވެހުމާ ގުޅިގެން ބައެއް ސަރަޙައްދުތަކުގެ ބިންގަނޑު ކަނޑައިގެން ދިޔުމަކީ އެކަށީގެންވާ ކަމެއް ކަމުގައި ވެސް އެ އިދާރާއިން އިންޒާރު ކުރެއެވެ.