މިޔަންމާގެ ގިނަ އަދަދެއްގެ ރޮހިންޔާ މުސްލިމުން އަނެއްކާ ވެސް އިންޑޮނީޝިޔާއަށް ހިޖުރަކުރަން ފަށައިފިއެވެ. މި ގޮތަށް މިޔަންމާ ދޫކޮށް ހިޖުރަކުރި ރޮހިންޔާ ދަރިކޮޅުގެ 57 މީހުން ތިބި އުޅަނދެއް ދާދި ފަހުން ވަނީ އިންޑޮނީޝިޔާގެ އަޗޭއަށް ދަތުރު ކޮށްފައެވެ. އެ މީހުންނަށް އަޗޭއަށް ވާސިލުވީ، މަހެއްހާ ދުވަސް ކަނޑުމަތީގައި ހޭދަކުރުމަށް ފަހުއެވެ. އެ ބޯޓުގައި ތިބީ ފިރިހެނުންނެވެ.
މިޔަންމާގައި ކުރިމަތިވަމުންދާ ނިކަމެތި ހާލުން ސަލާމަތްވުމަށް އެތަކެއް ހާސް ރޮޖިންޔާ މުސްލިމުންނެއް ދަނީ އިންޑޮނީޝިޔާއާއި މެލޭޝިޔާއަށް ހިޖުރަ ކުރަމުންނެވެ. އެންމެ ފަހުން އަޗޭއަށް ދިޔުމަށް މަސައްކަތްކުރި މީހުން ދަތުރުކުރި އުޅަނދުގެ އިންޖީނު ހަލާކުވެ، އެ މީހުން ވަނީ ކަނޑުމަތިވެފައެވެ. އެ މީހުންނަށް އަޗޭއަށް ދެވުނީ ބެހިގެން ކަމުގައި އިންޑޮނީޝިޔާގެ ފުލުހުން ބުނެއެވެ.
ކަނޑުމަތީގައި ގިނަ ދުވަސްވުމުގެ ސަބަބުން ބޯޓުން ދަތުރުކުރި މީހުންގެ ޞިއްޙީ ހާލަތު ދެރަވެފައިވާ ކަމުގައި ވެސް އަޗޭގެ ފުލުހުންގެ ބުންޏެވެ. އަދި، ހަތަރު ފިރިހެނުން ހިސްޕިޓަލުގައި އެޑްމިޓު ކޮށްގެން މިހާރު ފަރުވާދޭން ފަށާފައިވާ ކަމުގައި ވެސް އޮފިޝަލުން ބުނެއެވެ. ބޯޓުގައި ދަތުރުކުރި އެހެން މީހުން މިހާރު ވަނީ ރެފިޔުޖީ ކޭމްޕަކަށް ބަދަލުކޮށްފައެވެ.
މި ބޯޓަކީ، ފާއިތުވި މަސްތަކުގެ ތެރޭގައި އިންޑޮނީޝިޔާއަށް ދަތުރުކުރި މި ފަދަ ތިންވަނަ ބޯޓެވެ. ހުސްވި ނޮވެންބަރު މަހުގެ 15 ވަނަ ދުވަހާއި 16 ވަނަ ދުވަހު މި ފަދަ އިތުރު ދެ ބޯޓު އިންޑޮނީޝިޔާއަށް ދަތުރުކޮށްފައިވެއެވެ. އެ ދެ ބޯޓުގައި ރޮހިންޔާ ދަރިކޮޅުގެ 229 މީހުން ތިބި ކަމުގައި އިންޑޮނީޝިޔާގެ އޮފިޝަލުން ބުނެއެވެ.
އެ މީހުންނާ ގުޅޭ ކަންކަން ބެލެހެއްޓުމުގައި ހިޖުރަ ކުރާ މީހުންނާ ބެހޭ ބައިނަލްއަޤުވާމީ ޖަމުޢިއްޔާ (އައި.އޯ.އެމް)އާއި އ.ދ.ގެ ރެފިޔުޖީންނާ ބެހޭ އިދާރާ (ޔޫ.އެން.އެޗް.ސީ.އާރް)ގެ އެހީތެރިކަން އިންޑޮނީޝިޔާއިން ދަނީ ހޯދަމުންނެވެ. ރޮހިންޔާ ދަރިކޮޅުގެ އިތުރު 200 މީހުންނާ އެކު ދަތުރުކުރަމުންދިޔަ ބޯޓެއް ކައިރިން ހާލުގައި ޖެހިފައިވާ ކަމަށް ވެސް ރިޕޯޓު ކޮށްފައިވެއެވެ.
އެ ބޯޓު މިހާރު އޮތީ އިންޑޮނީޝިޔާއާއި މެލޭޝިޔާ އަދި ތައިލެންޑު ކައިރީގައި އަންދަމަން ކަނޑުގެ ސަރަޙައްދުގައެވެ. އެ ބޯޓުގައި އަންހެނުންނާއި ކުޑަކުދިން ވެސް ތިއްބެވެ. އެ ބޯޓުގައި ތިބި މީހުން ސަލާމަތް ކުރުމަށް ޔޫ.އެން.އެޗް.ސީ.އާރް.އިން ވަނީ ގޮވައިލާފައެވެ. ނަމަވެސް، އެ ކަން ކުރަން އެއްވެސް ޤައުމަކުން ފިޔަވަޅެއް އަޅާފައިވާ ކަމުގެ ރިޕޯޓެއް އަދި ލިބިފައެއް ނުވެއެވެ.