ދެކުނު އެފްރިކާގެ ރަށެއް ކަމުގައިވާ ބޮކްސްބަރގްގައި ތެޔޮ ޓޭންކަރެއް ގޮވައި ނުވަ މީހުން މަރުވެއްޖެއެވެ. މި ހާދިސާ ހިނގާފައިވާ ބޮކްސްބަރގްއަކީ، ދެކުނު އެފްރިކާގެ އެންމެ ބޮޑު ރަށް ކަމުގައިވާ ޖޮހެނެސްބަރގްއާ އިރުމަތިން އޮންނަ ރަށެކެވެ. މި ހާދިސާގައި އިތުރު 40 މީހުން ޒަޚަމުވިއެވެ.
މި ހާދިސާގައި ގޮވާފައި ވަނީ ލިކުއިފައިޑް ޕެޓްރޯލިޔަމް ގޭސް (އެލް.ޕީ.ޖީ) ބަރުކޮށްގެން ދަތުރު ކުރަމުން ދިޔަ ޓޭންކަރެވެ. އޭގައި އަލިފާން ރޯވެ، ގޮވަން މެދުވެރިވީ ބްރިޖެއްގެ ދަށުގައި ދަތުރު ކުރަމުން ދަނިކޮށް، ބްރިޖުގެ ދަށުގައި ތާށިވުމުގެ ސަބަބުން ކަމަށް ބެލެވެއެވެ. މި ހާދިސާ ހިނގާފައި ވަނީ ހޮސްޕިޓަލަކާއި ޢާންމުންގެ ދިރިއުޅޭ ގެތަކެއް ހުންނަ ސަރަޙައްދެއްގައެވެ.
އެ ޤައުމުގެ ކުއްލި ހަލާތްތަކުގައި ހަރަކާތްތެރިވާ ޓީމުތަކުން ބުނީ، ޓޭންކަރު ގޮވާފައި ވަނީ، އޭގައި ރޯވެފައިވާ އަލިފާންގަނޑު ނިއްވައިލަން މަސައްކަތް ކުރަމުން ދަނިކޮށް ކަމުގައެވެ. މި ހާދިސާގައި ޒަޚަމުވި މީހުންގެ ތެރޭގައި ޓޭންކަރު ދުއްވަން އިން މީހާ ވެސް ހިމެނެއެވެ. ޒަޚަމުވި 40 މީހުންގެ ތެރެއިން 15 މީހެއްގެ ހާލަތު ސީރިޔަސް ކަމުގައި އޮފިޝަލުން ބުނެއެވެ.
މި ހާދިސާގައި ޒަޚަމުވި މީހުންގެ ތެރޭގައި އަލިފާން ނިއްވާ މީހުން ވެސް ހިމެނެއެވެ. މަރުވި މީހުންގެ ފުރިހަމަ މަޢުލޫމާތު އޮފިޝަލުން އަދި ހާމަކޮށްފައެއް ނުވެއެވެ. ޓޭންކަރު ބުރިޖުގެ ދަށުގައި ތާށިވީ، އެ އުޅަނދަށް ދަތުރު ކުރެވޭ ވަރަށްވުރެ ތިރި ބުރިޖެއްގެ ދަށުން ދަތުރު ކުރުމަށް މަސައްކަތް ކުރުމުންނެވެ. އޭގައި 60,000 ލީޓަރުގެ އެލް.ޕީ.ޖީ. ހުއްޓެވެ.