ޔޫކްރެއިނުގެ ރައީސް ވޮލޮޑޮމީރް ޒެލެންސްކީ މި ހަފުތާގައި އެމެރިކާއަށް ވަޑައިގަންނަވައި، ރައީސް ޖޯ ބައިޑަންއާ ބައްދަލު ކުރައްވަން ހަމަޖެހިފައިވާ ކަމުގައި ވައިޓް ހައުސްއިން ހާމަކޮށްފިއެވެ. މި ދަތުރުފުޅުގައި ޒެލެންސްކީ އެމެރިކާގެ ޤާނޫނު ހަދާ މަޖިލިސް ކަމުގައިވާ ކޮންގްރެސްގައި ތަޤުރީރު ކުރައްވަން ހަމަޖެހިފައިވާ ކަމުގައި ވެސް ވައިޓް ހައުސްއިން ބުނެއެވެ. މި ދަތުރުފުޅާއެކު، އެމެރިކާއިން ޔޫކްރެއިނާ އެކު ބާއްވަމުންދާ ގާތްކަން ހާމަވެގެންދާނެ ކަމަށް އެމެރިކާއިން އުންމީދު ކުރެއެވެ.
"ޒެލެންސްކީގެ މި ދަތުރުފުޅާ އެކު، އެމެރިކާއިން ޔޫކްރެއިނަށް ކުރަމުންދާ ތާޢީދާއި ފޯރުކޮށްދެމުންދާ އެހީތެރިކަން ހާމަވެގެންދާނެ. އަދި، ކުރިއަށް އޮތް ތަނުގައި ވެސް އެމެރިކާއިން އެ ގޮތުގައި ދެމިއޮންނާނެ ކަން ސާފުވެގެން ދާނެ،" ވައިޓް ހައުސްގެ ތަރުޖަމާނު ކެރިން ޜޯން-ޕިޔަރ ވިދާޅުވިއެވެ.
ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފަށާފައި ވަނީ ފެބުރުވަރީ މަހުގެ 24 ވަނަ ދުވަހުއެވެ. މި ހަނގުރާމައަށް 10 މަސް ފުރުމާ ގާތްވެފައިވާއިރު، މިއީ ޤައުމުން ބޭރަށް ޒެލެންސްކީ ދަތުރުފުޅެއް ކުރައްވާ ފުރަތަމަ ފަހަރެވެ. ސިއްރިޔާތުގައި ޒެލެންސްކީ އެމެރިކާއަށް ވަޑައިގަންނަވާ މި ދަނޑިވަޅަކީ، ރަޝިޔާގެ އަސްކަރިއްޔާގެ އެންމެ އިސް ކޮމާންޑަރުންނާ ރައީސް ވްލަޑިމިޔަރ ޕުޓިން ބައްދަލުކުރެއްވުމަށް ތައްޔާރުވަމުންދާ ދަނޑިވަޅެކެވެ.
އެ ބައްދަލުމުގައި ހަނގުރާމައާ ގުޅޭ ކަންކަމުގެ އިތުރުން، އަންނަ އަހަރު ރަޝިޔާގެ އަސްކަރިއްޔާއިން ހާސިލުކުރާނެ ލަނޑުދަނޑިތަކާ ގުޅޭ ގޮތުން ޕުޓިން މަޝްވަރާ ކުރައްވާނެ ކަމުގައި ކްރެމްލިންއިން ބުނެއެވެ. ޒެލެންސްކީގެ ދަތުރުފުޅާ ގުޅޭ ގޮތުން ކްރެމްލިންއިން ބުނީ، އެމެރިކާއިން ޔޫކްރެއިނަށް އިތުރު ހަތިޔާރު ފޯރުކޮށްދޭން ނިންމައިފި ނަމަ، ހަނގުރާމައިގެ މައިދާނާއި ހަމަނުޖެހުންތައް އިތުރަށް ގޯސްވާނެ ކަމުގައެވެ.
ކްރެމްލިންއިން މިހެން ބުނި ނަމަވެސް، އެމެރިކާއިން ޔޫކްރެއިނަށް ފޮނުވަން ނިންމާފައިވާ އަސްކަރީ އެހީގެ ޕެކޭޖެއް ޒެލެންސްކީގެ ދަތުރުފުޅުގެ ތެރެއިން އިޢުލާނު ކުރާނެ ކަމަށް ބެލެވެއެވެ. "މި ދަތުރުގައި އެމެރިކާއާ އެކު އޮތް ގުޅުންތައް އިތުރަށް ހަރުދަނާ ކުރަން މަސައްކަތް ކުރާނަން،" ދަތުރުފުޅާ ގުޅޭގޮތުން ޒެލެންސްކީ ވިދާޅުވިއެވެ.
އެންމެ ފަހުން އެމެރިކާއިން ޔޫކްރެއިނަށް ދިނުމަށް ނިންމާފައިވާ އަސްކަރީ އެހީގެ ޕެކޭޖުގެ އަގު 2 ބިލިޔަން ޑޮލަރަށް އަރައެވެ. އަދި، މި ޕެކޭޖުގައި "ޕެޓްރިއޮޓް" މަރުކާގެ މިސައިލްތައް ހިމެނޭނެ ކަމުގައި ބައިޑަންގެ ސަރުކާރުގެ އިސް އޮފިޝަލަކު ވަނީ ހާމަކޮށްފައެވެ. މިއީ، ރަޝިޔާ ސިފައިން ޔޫކްރެއިނަށް މިހާރު ދެމުންދާ މިސައިލާއި ޑްރޯންގެ ވަރުގަދަ ހަމަލާތަކުން ދިފާޢުވުމަށް އެހީތެރިވެދޭނެ ހަތިޔާރެކެވެ.
ޒެލެންސްކީގެ ދަތުރުފުޅާ ގުޅިގެން، ސުލްޙައިގެ މަޝްވަރާތައް ފެށުމާމެދު އޭނާ ގެންގުޅުއްވާ ވިސްނުމަށް ބަދަލެއް އަތުވެދާނެ ކަމަސް ނުވެލެވޭ ކަމުގައި ވެސް ކްރެމްލިންއިން ބުނެއެވެ. ރަޝިޔާގެ ރައީސް ކަމުގެ މަޤާމުގައި ޕުޓިން ހުންނެވިހާ ދުވަހަކު، އެ ޤައުމާ އެކު ސުލްޙައިގެ މަޝްވަރާތައް ނުކުރާނެ ކަމަށް ޒެލެންސްކީ ކުރިން ވަނީ ވިދާޅުވެފައެވެ.
ޒެލެންސްކީގެ ދަތުރުފުޅުގައި ކޮންގްރެސްގައި ތަޤުރީރު ކުރައްވަން ހަމަޖެހިފައިވާއިރު، އެ ތަޤުރީރަކީ ޑިމޮކުރެސީއަށް ލިބޭނެ ވަރަށް ބޮޑު ކާމިޔާބީއެއްގެ ގޮތުގައި އެމެރިކާގެ ހައުސް އޮފް ރެޕްރެޒެންޓެޓިވްސްގެ ރައީސާ ނެންސީ ޕެލޯސީ ސިފަ ކުރައްވައެވެ. ޒެލެންސްކީގެ މި ދަތުރުފުޅުގެ މަޝްވަރާތައް ފަށާފައި ވަނީ ޑިސެންބަރު 10ވަނަ ދުވަހު އޭނާއާއި ބައިޑަންއާ އެކު ފޯނުން ކުރެއްވި މަޝްވަރާތަކަކަށް ފަހު ކަމުގައި ވައިޓް ހައުސްއިން ބުނެއެވެ.