ޕޯސްޓްމޯޓަމަށް ނިޝާމާގެ ހަށިގަނޑު އިންޑިއާއަށް ފޮނުވައިފިއެވެ.
މިމަހުގެ 10 ވަނަ ދުވަހު، ހދ. ނޮޅިވަރަށްފަރުގައި މަރުވެފައި އޮއްވާ ފެނުނީ އެރަށު ހިތަށްފިނިވާގެ އުމުރުން 28 އަހަރުގެ ނިޝާމާ މުޙައްމަދުއެވެ. ނިޝާމާގެ މަރުގައި ޝައްކު ކުރެވޭ ކަންތައްތަކެއް ހުރުމާއި ގުޅިގެން، އެ މައްސަލަ ފުލުހުން ދަނީ ތަޙުޤީގުކުރަމުންނެވެ.
އިތުރު ތަޙުލީލުތަށް ހެދުމަށް ނިޝާމާގެ ޕޯސްޓްމޯޓަމް ހެދުމަށް ނިންމާ، އޭނާގެ ހަށިގަނޑު މިއަދުގެ ވަގުތެއްގައި އިންޑިއާއަށް ފޮނުވާފައިވާކަމަށް ފުލުހުން ވިދާޅުވެއެވެ.
ނިޝާމާ މަރުވެފައި އޮއްވާ ފެނުނީ އޭނާ ދިރިއުޅޭ ގޭގެ ކޮޓަރިތެރެއިންނެވެ. މި މައްސަލައިގައި ފުލުހުން ތުޙުމަތު ކުރަނީ ނިޝާމާގެ ފިރިމީހާ ފައިޞަލް ޢަލީއަށެވެ.
ނިޝާމާގެ މަރާއި ގުޅިގެން އޭނާގެ ފިރިމީހާއަށް ތުހުމަތު ކުރެވެނީ އެހާދިސާ ހިނގާދިޔައިރު އެގޭގައި އޭނާ އެކަނި ހުރުމާއި، އަދި ނިޝާމާ މަރުވެފައި އޮތްއިރު ކަރުގައި ޒަޚަމްތަކެއް ހުރުމުންނެވެ. އަދި ނިޝާމާ މަރުވެފައި އޮއްވާ ފެނުމުގެ ވަގުތުކޮޅެއް ކުރިން، ފައިޞަލް ރަށުން ފުރައިގެން ދިއުމުންނެވެ. ހާދިސާ ހިނގި ދުވަހު ފުލުހުން ވަނީ ފައިޞަލް ފުލުހުންގެ ހައްޔަރަށް ގެންގޮސްފައެވެ.
ކުޅުދުފުށީގައި ފުލުހުންގެ ހައްޔަރުގައި ހުއްޓާ، އޭނާ ވަނީ އަމިއްލައަށް މަރުވާން މަސައްކަތް ކޮށްފައެވެ. އެނާއަށް ކުޅުދުއްފުށީ ހޮސްޕިޓަލްގައި ވެންޓިލޭޓަރުގައި ފަރުވާ ދެމުން ދަނިކޮށް މަރުވެފައިވަނީ މިމަހުގެ 19 ވަނަ ދުވަހުއެވެ. ފައިޞަލްގެ ހަށިގަނޑު މާލެ ގެނެސް އާއިލާއާއި ހަވާލުކޮށް، މިހާރު ވަނީ ވަޅުލާފައެވެ.
ނިޝާމާގެ މަރުގެ މައްސަލައިގައި ތުޙުމަތު ކުރާ ފައިޞަލް މަރުވިނަމަވެސް، މައްސަލައިގެ ތަޙުޤީޤު ހުއްޓާނުލާނެކަމަށް ފުލުހުން ވަނީ ވިދާޅުވެފައެވެ. އަދި ފުލުހުންގެ ބެލުމުގެ ދަށުގައި ވަނިކޮށް ފައިޞަލް އަމިއްލައަށް މަރުވާން މަސައްކަތްކޮށް އެފަދަ ޢަމަލެއް ހިންގި މައްސަލަވެސް ފުލުހުން ދަނީ ބަލަމުންނެވެ.