ރަޝިޔާއާއި ޔޫކްރެއިނުގެ ފައުޖުތަކުގެ މެދުގައި އެންމެ ވަރުގަދައަށް ހަމަލާތައް ބަދަލު ކުރަމުންދާ ބަޚްމުތްއަށް ޔޫކްރެއިނުގެ ރައީސް ވޮލޮޑޮމީރް ޒެލެންސްކީ ޒިޔާރަތް ކުރައްވައިފިއެވެ. ރަޝިޔާއިން ޔޫކްރެއިނަށް އަރައި ކުރަމުންދާ ހަނގުރާމައަށް 10 މަސް ފުރުމާ ގާތްވެފައިވާއިރު، ރަޝިޔާގެ ފައުޖުތަކުން މިހާރު ދަނީ ޔޫކްރެއިނުގެ އިރުމަތީގައިވާ ބަޚްމުތް ހިފުމަށް މަސައްކަތް ކުރަމުންނެވެ.
ނަމަވެސް، ޔޫކްރެއިނުގެ ފައުޖުތަކުން ދަނީ އެ ރަށް ދިފާޢު ކުރުމަށް ވަރުގަދައަށް ހަނގުރާމަ ކުރަމުންނެވެ. ބަޚްމުތްއަށް ކުރެއްވި ޒިޔާރަތުގައި ޒެލެންސްކީ ވަނީ ހަނގުރާމައިގެ ކުރީ ސަފުގައި ހަރަކާތްތެރިވަމުންދާ އެ ޤައުމުގެ ސިފައިންނާ ބައްދަލު ކުރައްވައި، އެ މީހުންނަށް ހިތްވަރު ދެއްވާފައެވެ. އަދި، ހަނގުރާމައިގައި ޔޫކްރެއިނުގެ ސިފައިން ހޯދަމުންދާ ކާމިޔާބީތަކުގެ ފަހަތުގައިވާ އިސް އޮފިސަރުންނަށް އޭނާވަނީ މެޑެލް ހަވާލު ކުރައްވާފައެވެ.
ބަޚްމުތް ހިފުމަށް ރަޝިޔާގެ ރައީސް ވްލަޑިމިޔަރ ޕުޓިން ވަނީ އެ ޤައުމުގެ ބޮޑު ފައުޖެއް ފޮނުވާފައެވެ. ނަމަވެސް، އެ ފައުޖުގައި ގިނައީ ކުލީ ސިފައިންނާއި، ކުށްވެރިންނާއި، އަލަށް އެ ޤައުމުގެ އަސްކަރިއްޔާއާ ގުޅުނު ސިފައިންނެވެ. ބަޚްމުތް ހިފުމަށް ކުރަމުންދާ ހަނގުރާމައިގައި އެ ރަށުގެ ބޮޑު ބައެއް މިހާރު ވަނީ ސުންނާފަތިވެފައެވެ.
"ޔޫކްރެއިނުގެ ރަށްތަކުގައި ކަރަންޓުގެ ޚިދުމަތް ލިބެން ހުރި ނަމަ، ރަނގަޅުވީސް. ނަމަވެސް، ހަނގުރާމައިގެ ސަބަބުން ގިނަ ރަށްތަކުގެ ހާލަތު ވަރަށް ދެރަ. އެއްވެސް އަލިކަމެއް ނެތް. ނަމަވެސް، އަޅުގަނޑުމެންގެ ހިތްތަކުގައިވާ އަލިކަމަށް އެއްވެސް ފަނޑުކަމެއް ނާދޭ. ނުވެސް އަންނާނެ،" ބަޚްމުތްގެ ސިފައިންނާ މުޚާތަބުކޮށް ވާހަކަފުޅު ދައްކަވަމުން ޒެލެންސްކީ ވިދާޅުވިއެވެ.
އޭނާ ބަޚްމުތްއަށް ޒިޔާރަތް ކުރައްވާފައި މި ވަނީ، ރަޝިޔާއިން އަތްގަދަ ކޮށްފައިވާ ޔޫކްރެއިނުގެ ސަރަޙައްދުތަކުގެ ހާލަތު ވަރަށް "އުނދަގޫ" ކަމަށް ޕުޓިން ވިދާޅުވެފައިވާ ދަނޑިވަޅެއްގައެވެ. ޔޫކްރެއިނުގެ މައި ހަތަރު ސަރަޙައްދަކަށް އަތްގަދަކޮށް، އެއީ ރަޝިޔާގެ ބައިތަކެއްގެ ގޮތުގައި ކަނޑައަޅައި، އެ ކަން ޕުޓިން އިޢުލާނު ކުރައްވާފައި ވަނީ ސެޕްޓެންބަރު މަހުއެވެ.
ރަޝިޔާއިން އަތްގަދަކޮށްފައި ވަނީ އިރުމަތީގައިވާ ޑޮނެޓްސްކްއާއި ލުހާންސްކްގެ އިތުރުން ދެކުނުގައިވާ ޚާރްސަންއާއި ޒަޕޮރީޜިޔާއަށެވެ. ނަމަވެސް، ޔޫކްރެއިނުގެ ސިފައިން މިހާރު ވަނީ ރަޝިޔާ ސިފައިންގެ އަތްދަށުން ޚާރްސަން މިނިވަންކޮށްފައެވެ. އަދި، އެ ތަން ހިފައިގެން ތިބި ރަޝިޔާ ސިފައިން ފަހަތަށް ޖައްސާފައެވެ. މިއީ، މި ހަނގުރާމައިގައި ޕުޓިންއަށް ލިބިވަޑައިގެންނެވި ވަރަށް ބޮޑު ނާކާމިޔާބީއެކެވެ.
މި ހަފުތާގެ ކުރީކޮޅު ޕުޓިން ވަނީ ބެލަރޫސްއަށް ޒިޔާރަތް ކުރައްވައި، އެ ޤައުމުގެ ރައީސް އެލެގްޒެންޑަރ ލުކަޝެންކޯއާ ބައްދަލު ކުރައްވާފައެވެ. ބެލަރޫސްއަކީ، މި ހަނގުރާމައިގައި ރަޝިޔާއަށް ތާޢީދު ކުރާ ޤައުމެކެވެ. އަދި، ޔޫކްރެއިނަށް ހަމަލާދިނުމަށް ރަޝިޔާ ސިފައިން ދަނީ ބެލަރޫސް ބޭނުން ކުރަމުންނެވެ.