ރަޝިޔާއާއި ޗައިނާ ގުޅިގެން އަސްކަރީ ތަމްރީނުތަކެއް ފެށުމަށް ތައްޔާރުވަމުންދާ ކަން ރަޝިޔާއިން ހާމަކޮށްފިއެވެ. އެ ޤައުމުން ބުނީ ހަފުތާއެއްހާ ދުވަހަށް ދެމިގެންދާނެ މި އަސްކަރީ ތަމްރީނުތައް ޑިސެންބަރު 21ވަނަ ދުވަހު ފަށާނެ ކަމުގައެވެ. އަދި، މި ތަމްރީނުތަކުގައި ރަޝިޔާގެ އަސްކަރީ މަނަވަރުތައް ބައިވެރިވާނެ ކަމުގައި އެ ޤައުމުން ބުނެއެވެ.
އިރުމަތީ ޗައިނާ ކަނޑުގައި ކުރިއަށްގެންދާ މި ތަމްރީނުތަކަކީ، ދެ ޤައުމުގެ ދެމެދުގައި އޮތް އަސްކަރީ ގުޅުންތައް އިތުރަށް ބަދަހިވަމުންދާ ކަމުގެ ހެއްކެކެވެ. މިއީ، ރަޝިޔާއިން ޔޫކްރެއިނަށް އަރައި ކުރަމުންދާ ހަނގުރާމައާ ގުޅިގެން ހުޅަނގުން ރަޝިޔާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކަށް ގޮންޖެހުމުގެ ގޮތުން ބާއްވާ ތަމްރީނުތަކެކެވެ.
ރަޝިޔާއާއި ޗައިނާއާ ދެމެދު އޮތް ގުޅުންތައް ފަހަކަށް އައިސް ވަނީ އިތުރަށް ބަދަހިކުރަން ފަށާފައެވެ. އަދި، މި ތަމްރީނުތަކާ އެކު ދެ ޤައުމުގެ ދެމެދުގައި އަސްކަރީ ދާއިރާއިން އޮތް ގުޅުންތައް އިތުރު ހަރުފަތަކަށް ގެންދެވޭނެ ކަމުގައި ރަޝިޔާއިން ޤަބޫލު ކުރެއެވެ.
ބައިނަލްއަޤުވާމީ މައިދާނުގައި ޗައިނާއާއި ރަޝިޔާއަކީ ޚިޔާލު ތަފާތުވުންތައް ގިނަ ދެ ޤައުމެވެ. ނަމަވެސް، ފިނި ހަނގުރާމައިގައި ދެ ޤައުމުން ވަނީ ގުޅިގެން ގިނަ މަސައްކަތްތަކެއް ކޮށްފައެވެ. އަދި، ބައިނަލްއަޤުވާމީ މައިދާނުގައި އެމެރިކާގެ ނުފޫޒު އިތުރުކުރަމުންދާ ދަނޑިވަޅެއްގައި، ރަޝިޔާއާއި ޗައިނާ ގުޅިގެން ދަނީ އެ ކަމަށް ރައްދު ދިނުމަށް މަސައްކަތް ކުރަމުންނެވެ.
އޭޝިޔާ ޕެސިފިކް ސަރަޙައްދުގައި ނުފޫޒާއި ބާރުވެރިކަން އިތުރުކުރަން ޗައިނާއިން މަސައްކަތް ކުރަމުން ދިޔަ ނަމަވެސް، އެމެރިކާއިން ވެސް ދަނީ އަސްކަރީ ދާއިރާއިން އެ ސަރަޙައްދުގެ ޤައުމުތަކާ އެކު ގާތް ގުޅުމެއް ބާއްވަމުންނެވެ. މި ގޮތުން، ދެކުނު ކޮރެޔާއާއި ޖަޕާނާ އެކު އެ ޤައުމުން ބާއްވާ ގުޅުންތަކާއި، އެ ތިން ޤައުމު ގުޅިގެން އެ ސަރަޙައްދުގައި ބާއްވަމުންދާ އަސްކަރީ ތަމްރީނުތައް ފާހަގަ ކުރެވެއެވެ.
މި ހަފުތާގެ ތެރޭގައި ރަޝިޔާއިން ބެލަރޫސްއާ ގުޅިގެން ވެސް އަސްކަރީ ތަމްރީނުތަކެއް ބޭއްވުމަށް ދަނީ ތައްޔާރުވަމުންނެވެ. މި ތަމްރީނުތައް ބައްލަވައިލެއްވުމަށް އެ ޤައުމުގެ ރައީސް ވްލަޑިމިއަރ ޕުޓިން މިހާރު ގެންދަވަނީ ބެލަރޫސްއަށް ދަތުރުފުޅެއް ކުރައްވަމުންނެވެ. ބެލަރޫސްއަކީ ރަޝިޔާއިން ޔޫކްރެއިނަށް އަރައި ކުރަމުންދާ ހަނގުރާމައިގައި ރަޝިޔާއަށް ތާޢީދުކޮށް، އެއްބާރުލުން ދެމުންދާ މަދު ޤައުމުތަކުގެ ތެރެއިން އެއް ޤައުމެވެ.