ރަޝިޔާއިން ޑްރޯން ބޭނުންކޮށްގެން ޔޫކްރެއިނުގެ ވެރިރަށް ކީވްއަށް ވަރުގަދަ ހަމަލާތަކެއް ދޭން ފަށައިފިއެވެ. ކީވްއަށް ޑްރޯން ހަމަލާތައް ދޭން ފަށާފައި މި ވަނީ، މިސައިލާއި ރޮކެޓް ބޭނުންކޮށްގެން ކީވްގެ އަމާޒުތަކަށް ވަރުގަދަ ހަމަލާތަކެއް ދިންތާ ހަފުތާއެއް ވެސް ނުވަނީހެވެ. މިއީ ފެބުރުވަރީ 24ގައި ފެށި ހަނގުރާމައިގައި ރަޝިޔާއިން ކީވްއަށް ދީފައިވާ އެންމެ ވަރުގަދަ މިސައިލް އަދި ޑްރޯން ހަމަލާތަކެވެ.
ކީވްގެ އިތުރުން ޔޫކްރެއިނުގެ އެހެން ބޮޑެތި ރަށްތަކަށް އަމާޒުކޮށް ދީފައިވާ މިސައިލް ހަމަލާތަކޭ އެއް ފަދައިން، ޑްރޯން ހަމަލާތައް ވެސް އަމާޒު ކޮށްފައި ވަނީ ޒަރޫރީ ޚިދުމަތްތައް ދިނުމަށް ބޭނުން ކުރާ ވަސީލަތްތަކަށެވެ. ކީވްގެ އޮފިޝަލުން ބުނީ، ޑްރޯން ހަމަލާތަކުގައި ވެސް، ކަރަންޓުގެ ޚިދުމަތް ދިނުމަށް ބޭނުން ކުރާ ވަސީލަތްތަކަށް ބޮޑެތި ގެއްލުންތަކެއް ލިބުނު ކަމުގައެވެ.
ރަޝިޔާއިން ކީވްއަށް ޑްރޯން ހަމަލާތަކެއް ދީފައި މި ވަނީ، ރަޝިޔާގެ ރައީސް ވްލަޑިމިޔަރ ޕުޓިން، ބެލަރޫސްއަށް ދަތުރުފުޅެއް ކުރައްވަމުން ގެންދަވާ ދަނޑިވަޅެއްގައެވެ. ޔޫކްރެއިނާ އިންވެގެން އޮންނަ ބެލަރޫސްއަކީ ރަޝިޔާއާ ގާތް ގުޅުމެއް ބާއްވާ ޤައުމެކެވެ. އަދި، ރަޝިޔާއިން ޔޫކްރެއިނަށް އަރައި ކުރަމުންދާ ހަނގުރާމައިގައި ރަޝިޔާއަށް ތާޢީދު ކުރާ ޤައުމެކެވެ.
ޕުޓިން ބެލަރޫސްއަށް ވަޑައިގަންނަވާފައި މި ވަނީ، ދެ ޤައުމުގެ ސިފައިން ގުޅިގެން ކުރިއަށްގެންދާ އަސްކަރީ ތަމްރީނުތަކެއް ބައްލަވައިލެއްވުމަށެވެ. ބެލަރޫސްގައި ރަޝިޔާގެ ސިފައިން ބޮޑު ފައުޖެއް ޤާއިމުވެފައި އޮވެއެވެ. މި ހަފުތާގެ ތެރޭގައި ވަރުގަދަ އަސްކަރީ ތަމްރީނުތަކެއް ބޭއްވުމަށް ދެ ޤައުމުން ދަނީ ތައްޔާރުވަމުންނެވެ.
ކީވްއަށް ހަމަލާދިނުމަށް ރަޝިޔާއިން ބޭނުންކޮށްފައި ވަނީ އީރާނުގައި އުފައްދާފައިވާ ޝާހިދު މަރުކާގެ ޑްރޯން ކަމުގައި ޔޫކްރެއިނުގެ އަސްކަރިއްޔާއިން ބުނެއެވެ. އަދި، ޔޫކްރެއިނުގެ ސަރަޙައްދަށް 23 ޑްރޯން ވަތް ކަމަށާއި، މީގެ ތެރެއިން 18 ޑްރޯންއެއް ވައްޓައިލާފައިވާ ކަމުގައި ވެސް ޔޫކްރެއިނުން ބުނެއެވެ.
މިސައިލާއި ޑްރޯން ހަމަލާތަކާ ގުޅިގެން ކީވްގައި ވަނީ ބިރުވެރިކަމެއް އުފެދިފައެވެ. އަދި، ކީވްގެ ރައްޔިތުން ވަނީ، ބިންގަރާސް ފަދަ ތަންތަނުގައި ރައްކާތެރިކަން ހޯދާފައެވެ. ރަޝިޔާގެ ހަމަލާތައް ފެށުމާ އެކު ކީވްއަށް ގެނައި ކުއްލި ހާލަތު ތިން ގަޑިއިރަށް ދެމިގެން ދިޔައެވެ. ޑިސެންބަރު 16ވަނަ ދުވަހު އެކަނިވެސް ރަޝިޔާއިން ޔޫކްރެއިނަށް 70 މިސައިލް ހަމަލާ ދީފައިވެއެވެ.
ޑްރޯން ހަމަލާތަކުގައި މުހިންމު ވަސީލަތްތަކަށް ބޮޑެތި ގެއްލުންތަކެއް ލިބުނު ނަމަވެސް، އެއްވެސް މީހެއްގެ ފުރާނައަށް ނުރައްކާވެފައި ނުވާ ކަމުގައި ކީވްގެ މޭޔަރު ވިޓާލީ ކްލިޓްސްޝްކޯ ވިދާޅުވިއެވެ. ނަމަވެސް، މި ހަމަލާތަކާ ގުޅިގެން ކީވްގެ ބޮޑު ސަރަޙައްދަކުން އަނެއްކާ ވެސް ކަރަންޓުގެ ޚިދުމަތް މެދުކެނޑިފައިވާ ކަމުގައި އޭނާ ވިދާޅުވިއެވެ.
ޕުޓިންގެ ފައުޖުތަކުން ޔޫކްރެއިނަށް މިސައިލް ހަމަލާ ދޭން ފަށާފައި ވަނީ، ހަނގުރާމައިގައި މައިދާނުގައި ރަޝިޔާ ސިފައިންނަށް ބޮޑެތި ނާކާމިޔާބީތަކަކާ ކުރިމަތިލާން ޖެހުނު ފަހުންނެވެ. ހަނގުރާމައިގެ ކުރީކޮޅު ރަޝިޔާ ސިފައިން ވަނީ ޔޫކްރެއިނުގެ މައި ހަތަރު ސަރަޙައްދަކަށް އަތްގަދަ ކޮށްފައެވެ. ނަމަވެސް، ޔޫކްރެއިނުގެ ސިފައިން ވަނީ މީގެ ތެރެއިން ދެކުނުގައިވާ ޚާރްސަން ރަޝިޔާގެ އަތްދަށުން މިނިވަން ކޮށްފައެވެ.