ގުޅީފަޅުގައި މިދިޔަ ބުރާސްފަތިދުވަހުގެރޭ އަލިފާނުގެ ޙާދިސާ ހިނގި ސައިޓުން ފެނުނު ކަށިތަކަކީ، އެތަނުން ގެއްލުނު މީހާގެ ކަށިތަކެއްކަން ކަށަވަރު ކުރެވޭނީ ޑީއެންއޭ ޓެސްޓުތަކަށްފަހުކަމަށް އެފްކޮންސް ކުންފުނިން ބުނެފިއެވެ.
މިދިޔަ ބުރާސްފަތި ދުވަހުގެ ރޭ ގުޅީފަޅުގައި ނުރައްކާތެރި އަލިފާނުގެ ޙާދިސާއެއް ހިނގީ، ތިލަމާލެ ބްރިޖްގެ މަސައްކަތްކުރާ މުވައްޒަފުން ބައިތިއްބާ އެކަމަޑޭޝަން ބްލޮކެއްގައެވެ.
މިއީ 457 މީހުން ދިރިއުޅެމުން ދިޔަ ތަނެކެވެ. އަލިފާނުގެ ޙާދިސާގައި އެކޮމަޑޭޝަން ބްލޮކްގައި ދިރިއުޅުނު ގިނަ ބަޔަކަށް އެކި ކަހަލަ އަނިޔާތައް ލިބިގެން ފަރުވާ ދީފައިވެއެވެ.
ހޮސްޕިޓަލަށް ގެންދިޔަ 78 މީހުންގެ ތެރެއިން، 32 މީހުން އެޑްމިޓްކޮށް ފަރުވާ ދީފައިވެއެވެ. އަދި 4 މީހެއް އޮޕަރޭޝަން ކޮށްފައިވެއެވެ.
މި ހާދިސާގައި މީހަކު ގެއްލިގެން އުޅޭކަން އެނގިފައިވަނީ، ހެޑް ކައުންޓާއި ސައިޓްގައި މަސައްކަތް ކުރާ އެހެން މީހުން ދިން މަޢުލޫމާތުންނެވެ. އެހެންކަމުން އެ ސައިޓް އިތުރަށް ބަލާ ފާސްކުރުމުގެ ތެރޭގައި އިންސާނެއްގެ ހަށިގަނޑުގެ ބައިތަކެއްކަމަށް ބެލެވޭ ބައިތަކެއް ވަނީ ފެނިފައެވެ. މަޢުލޫމާތު ލިބޭގޮތުގައި ފެނިފައިވަނީ ކަށިތަކެކެވެ.
އެފްކޮންސްއިން ބުނެފައިވަނީ ފެނުނު ހަށިގަނޑުގެ ބައިތަކަކީ، ގެއްލުނު މީހާގެ ހަށިގަނޑުގެ ބައިތަކެއްކަން ކަށަވަރުވާނީ ޑީއެންއޭ ޓެސްޓަށް ފަހުގައިކަަމަށެވެ. އަދި އެ ޓެސްޓްތައް ހަދަމުންދާ ކަމަށްވެސް އެފްކޮންސްއިން ބުނެއެވެ.
އެފްކޮންސްއިން ބުނީ، ގެއްލުނު މީހާގެ އާއިލާއަށް މިކަމާއި ގުޅޭ މަޢުލޫމާތު ފޯރުކޮށްދެމުންދާކަމަށެވެ. އަދި މިކަމާއި ގުޅިގެން ދޭންޖެހޭ އެހީތެރިކަމާއި އެއްބާރުލުންވެސް އާއިލާއަށް ދެމުންދާކަމަށް އެފްކޮންސްއިން ބުނެއެވެ.