ތައިލެންޑުގެ އަސްކަރީ މަނަވަރެއް ދިޔަވެ، ފެތުނު ހާދިސާގައި ގެއްލުނު ކަނޑުގެ ސިފައިންގެ 31 މީހަކު ހޯދުމުގެ މަސައްކަތް ކުރަމުން އެބަދެއެވެ. މި ހާދިސާ ހިނގާފައި ވަނީ އެ ޤައުމުގެ ދެކުނުއިރުމަތީ އައްސޭރިފަށުގެ ސަރަޙައްދެއްގައެވެ.
ތައިލެންޑުގެ އަސްކަރިއްޔާއިން ބުނީ އެޗް.ޓީ.އެމް.އެސް. ސުކްހޮތައި ދިޔަވާން ފަށާފައި ވަނީ ތައިލެންޑުގެ އައްސޭރިފަށުން 20 ނޯޓިކަލް މޭލު ބޭރުން ދަތުރުކުރަމުން ދަނިކޮށް ކަމުގައެވެ. މަނަވަރު ދިޔަވާން ފެށީ، އެ ސަރަޙައްދުގައި ނަގަންފެށި ބިޔަ ރާޅުތަކެއްގެ ސަބަބުން ކަމުގައި ވެސް އަސްކަރިއްޔާއިން ބުނެއެވެ.
މި ހާދިސާގައި މަނަވަރާ އެކު ކަނޑުވި 31 މީހުން ހޯދައި، އެ މީހުން ސަލާމަތް ކުރުމަށް ޚާއްޞަ އޮޕަރޭޝަނެއް މިހާރު ވަނީ ފަށާފައެވެ. މި ހާދިސާ ހިނގި ވަގުތު މަނަވަރުގައި 106 މީހުން ތިބި ކަމަށާއި، މީގެ ތެރެއިން 75 މީހުން ސަލާމަތް ކުރެވިފައިވާ ކަމުގައި އަސްކަރިއްޔާއިން ބުނެއެވެ.
މި ހާދިސާގައި އަނިޔާވި 11 މީހަކަށް އެ ސަރަޙައްދުގައި ހުންނަ ބަންގް ސަޕްހާން ހޮސްޕިޓަލުގައި މިހާރު ދަނީ ފަރުވާ ދެމުންނެވެ. އަދި، އިތުރު 40 މީހަކަށް ވަގުތީ ހިޔާތަކުގައި ފަރުވާދެމުންދާ ކަމުގައި ވެސް އެ ޤައުމުގެ އަސްކަރިއްޔާއިން ބުނެއެވެ.