މިދިޔަ ހުކުރު ދުވަހު ސިނަމާލެ ބްރިޖްމަތީގައި ހިނގި ނުރައްކާތެރި އެކްސިޑެންޓްގެ ވީޑިއޯ، ސޯޝަލް މީޑިއާގައި ދައުރު ނުކުރުމަށް ފުލުހުން އިލްތިމާސްކޮށްފިއެވެ.
ސައިކަލަކާއި ކާރެއް ޖެހި ހިނގި މި އެކްސިޑެންޓްގައި 54 އަހަރުގެ ދިވެހި ފިރިހެނަކު ވަނީ ނިޔާވެފައެވެ. އެކްސިޑެންޓް ހިނގީ ހުކުރު ދުވަހު މެންދުރު 2:30ހާއިރު، ބްރިޖާއި ހުޅުލެ ގުޅޭ ސަރަޙައްދުގައެވެ.
ދަޢުރުވަމުންދާ ވީޑިއޯއަކީ ފުލުހުން ބްރިޖްގައި ޖަހާފައިވާ ކެމެރާގެ ސީސިޓީވީ ފުޓޭޖްއެކެވެ. ފުލުހުން ވިދާޅުވީ މި ވީޑިއޯ އާއްމުވެފައިވާ މައްސަލަ ބަލަމުންދާކަމަށެވެ.
މި ވީޑިއޯ ޝޯޝަލް މީޑިއާގައި ދަޢުރުވަމުން ދިއުމާއި ގުޅިގެން ފުލުހުން ވިދާޅުވީ، މިފަދަ ވީޑިއޯއެއް ދަޢުރުކުރުމަކީ މަރުހޫމްގެ އާއިލާއަށް ނުހަނު ހިތްދަތިކަން ގެނުވާނެ ޢަމަލެއްގެ ގޮތުގައި ދެކޭކަމަށެވެ. އަދި ވީޑިއޯ ދަޢުރުވުމުގެ ކަންބޮޑުވުން އާއިލާގެ ފަރާތުން ފުލުހުންނާވެސް ޙިއްސާކޮށްފައިވާކަމަށް ވިދާޅުވިއެވެ.
އެހެންކަމުން އެ ވީޑިއޯ ސޯޝަލް މީޑިއާގެ އެކި ވަސީލަތްތަކުގައި ދަޢުރު ނުކުރުމަށް ފުލުހުން އެދެއެވެ.
މި ވީޑިއޯ އާއްމުވާން މެދުވެރިވި ގޮތް ބަލާ، ފިޔަވަޅު އަޅަންޖެހޭ ފަރާތްތަކާ މެދު ފިޔަވަޅު އަޅާނެކަމަށްވެސް ފުލުހުން ވިދާޅުވެއެވެ.