އިރާޤުގެ އުތުރުގެ ސަރަޙައްދެއްގައި ފުލުހުންނަށް އަމާޒުކޮށް ދިން ބޮމުގެ ހަމަލާއެއްގައި ނުވަ ފުލުހަކު މަރައިލައިފިއެވެ. އެ ޤައުމުގައި ހަރަކާތްތެރިވާ އައި.އެސް. ޖަމާޢަތުން ވަނީ، އުތުރުގައި އޮންނަ ކިރްކުކްގައި ދިން މި ހަމަލާގެ ޒިންމާ އުފުލާފައެވެ. މިއީ ފާއިތުވި މަސްތަކުގެ ތެރޭގައި އެ ޤައުމުގައި ހިންގާފައިވާ މި ފަދަ އެންމެ ނުރައްކާތެރި އެއް ހަމަލާއެވެ.
މި ހަމަލާގެ މަޢުލޫމާތު ހާމަކޮށްފައި ވަނީ އައި.އެސް. ޖަމާޢަތުންނެވެ. އެ ޖަމާޢަތުގެ ހަނގުރާމަވެރިން ބޮމުގެ ހަމަލާ އަމާޒުކޮށްފައި ވަނީ ފުލުހުން ދަތުރު ކުރަމުންދިޔަ އުޅަނދަކަށެވެ. އަދި، ބޮން ގޮއްވައިލުމަށްފަހު، ސަލާމަތްވި ފުލުހުންނަށް އަމާޒުކޮށް ހަނގުރާމަވެރިން ވަނީ ވަރުގަދަ ބަޑީގެ ހަމަލާތަކެއް ދީފައެވެ.
ބޮމުގެ ހަމަލާ ދީފައި ވަނީ ކިރްކުކްގެ ޝަލާލް އަލްމާތަރު ކިޔާ އަވަށެއްގައި ދަތުރު ކުރަމުންދިޔަ ފުލުހުންގެ އުޅަނދަކަށް އަމާޒުކޮށެވެ. މި ހަމަލާއާ ގުޅިގެން ފުލުހުންނާއި ހަތިޔާރު އެޅި މީހުންނާ ދެމެދު ބަދަލުކުރި ހަމަލާތަކުގައި އައި.އެސް. ޖަމާޢަތުގެ ހަނގުރާމަވެރިއަކު މަރައިލާފައިވާ ކަމުގައި ފުލުހުން ބުނެއެވެ. މި ހާދިސާގައި ޒިންމާވާ އެހެން ހަނގުރާމަވެރިން ހޯދުމަށް ފުލުހުން މިހާރު ދަނީ މަސައްކަތް ކުރަމުންނެވެ.
2014ވަނަ އަހަރު އައި.އެސް. ޖަމާޢަތުން ވަނީ އިރާޤާއި ސޫރިޔާގެ ބައެއް ސަރަޙައްދުތަކަށް ވެރިވެގަނެފައެވެ. ނަމަވެސް، އެ ޖަމާޢަތާ ދެކޮޅަށް ގުޅިފައިވާ ލަޝްކަރެއް ތެދުވެ، ހަނގުރާމަ ފެށިއެވެ. އަދި، އައި.އެސް.އިން އަތްގަދަ ކޮށްފައިވާ ސަރަޙައްދުތަކުން އެ ޖަމާޢަތުގެ ހަނގުރާމަވެރިން ފައްސައިލިފިއެވެ. ސޫރިޔާގައި އައި.އެސް. ޖަމާޢަތުގެ ހަނގުރާމަވެރިން އެންމެ ފަހުން ގާއިމުވެ ތިބި ރަށުން އެ މީހުން ބަލިކޮށް، ފައްސައިލާފައި ވަނީ 2019ވަނަ އަހަރެވެ.
ކިރްކުކްގެ ފުލުހުންނަށް އަމާޒުކޮށް ދީފައިވާ ހަމަލާއަކީ ވަރަށް ފިނޑި އަމަލެއްގެ ގޮތުގައި ސިފަ ކުރައްވާ، އިރާޤުގެ ބޮޑުވަޒީރު މުޙައްމަދު ޝިޢާ އަލް-ސުދާނީ ވަނީ އެންމެ ހަރުކަށި އިބާރާތުން މި ހަމަލާ ކުށްވެރި ކުރައްވާފައެވެ. އަދި، ހަނގުރާމަވެރިންގެ ކުރިމަތީގައި ހިތްވަރު ދޫކޮށްނުލުމަށް އޭނާ ވަނީ އެ ޤައުމުގެ އަމަން ބަލަހައްޓާ ފައުޖުތަކަށް ގޮވައިލައްވާފައެވެ.
އިރާޤުގެ ބައެއް ސަރަޙައްދުތަކުގައި އައި.އެސް. ޖަމާޢަތުގެ ހަނގުރާމަވެރިން އަދިވެސް ދަނީ ހަރަކާތްތެރިވަމުންނެވެ. އެމެރިކާއިން އިސްވެ އުފައްދާފައިވާ ގުޅިފައިވާ ލަޝްކަރުން 2021ވަނަ އަހަރުގެ ޑިސެންބަރު މަހާ ޖެހެންދެން އެ ޖަމާޢަތާ ދެކޮޅަށް އަސްކަރީ ކެމްޕޭން ކުރިއަށް ގެންދިޔައެވެ. މިހާރު ވެސް އެ ޤައުމުގައި އެމެރިކާގެ 2,500އަށްވުރެ ގިނަ ސިފައިން ދަނީ ހަރަކާތްތެރިވަމުންނެވެ.
ނަމަވެސް، އައި.އެސް. ޖަމާޢަތުގެ ހަނގުރާމަވެރިން ދެމުންގެންދާ ހަމަލާތަކަށް މުޅިން ނިމުމެއް ގެނެވިފައެއް ނުވެއެވެ. ޑިސެންބަރު 14ވަނަ ދުވަހު އައި.އެސް. ހަނގުރާމަވެރިން ދިން ބޮމުގެ ހަމަލާއެއްގައި އިރާޤުގެ ސިފައިންގެ ތިން މީހުން ވަނީ މަރައިލާފައެވެ. އިތުރު ތިން ސިފައިން ޒަޚަމުވި މި ހަމަލާ ދީފައި ވަނީ ވެރިރަށް ބަޣްދާދުގެ ރަށްބޭރު ސަރަޙައްދެއްގައެވެ.
ކިރްކުކްގައި ހުންނަ އަސްކަރީ ޗެކްޕޯސްޓަކަށް އަމާޒުކޮށް ވެސް ހަނގުރާމަވެރި ޖަމާޢަތަކުން ދާދި ފަހުން ވަނީ ވަރުގަދަ ހަމަލާތަކެއް ދީފައެވެ. ހުސްވި ނޮވެންބަރު މަހު ދިން އެ ހަމަލާގައި ސިފައިންގެ ހަތަރު މީހުން ވަނީ މަރައިލާފައެވެ. ނަމަވެސް، އައި.އެސް. ޖަމާޢަތުން އެ ހަމަލާގެ ޒިންމާ އުފުލާ ކަމަށް ބުނެފައެއް ނުވެއެވެ.
އެ ޖަމާޢަތަށް ނިސްބަތްވާ 6,000އާއި 10,000އާ ދެމެދުގެ އަދަދެއްގެ ހަނގުރާމަވެރިން އިރާޤާއި ސޫރިޔާގައި އަދިވެސް ހަރަކާތްތެރިވަމުންދާ ކަމުގައި އ.ދ.އިން އަންދާޒާ ކުރެއެވެ. އެ ޖަމާޢަތުގެ ހަނގުރާމަވެރިން މިހާރު ހަރަކާތްތެރިވަމުން ދަނީ ރަށްފުށު ސަރަޙައްދުތަކުގައި ކަމަށް މަސްރަޙު ދިރާސާ ކުރާ ފަރާތްތަކުން ބުނެއެވެ.