ދިވެހިރާއްޖެއިން ޔޫރަޕިއަން ޔޫނިއަންއަށް ކަނޑައެޅުއްވި ސަފީރު އުމަރު އަބްދުއްރައްޒާގު، އެމަނިކުފާނުގެ ސަފީރުކަމުގެ ފަތްކޮޅު ޔޫރަޕިއަން ކައުންސިލްގެ ރައީސް ޗާލްސް މިޝެލްއަށް އަރުވައިފިއެވެ.
ފަތްކޮޅު އެރުވުމުގެ ރަސްމިއްޔާތު ބާއްވާފައި ވަނީ ހުކުރު ދުވަހު ޔޫރަޕިއަން ކައުންސިލްގެ ޖެނެރަލް ސެކްރެޓޭރިއަޓްގެ ހެޑްކުއާޓާޒްގައެވެ.
ފަތްކޮޅު އެރުވުމަށްފަހު ބޭއްވި ބައްދަލުކުރެއްވުމުގައި ރާއްޖެއިން އީޔޫއަށް ކަނޑައެޅުއްވި ސަފީރު ވަނީ ރާއްޖޭގެ ރައްޔިތުންނާއި ރައީސުލްޖުމްހޫރިއްޔާގެ ނަންފުޅުގައި ޔޫރަޕިއަން ކައުންސިލްގެ ރައީސްއަށް ހެޔޮއެދުުންތަކާއި ތަހުނިޔާ އަރިސްކުރައްވާފައެވެ.
މި ބައްދަލުކުރެއްވުމުގައި ދެ ބޭފުޅުން ވަނީ ރާއްޖެއާއި އީޔޫއާ އޮތް ގުޅުން ބަދަހިވަމުން އަންނަކަން ފާހަގަކުރައްވައި، ކުރިއަށް އޮތްތަނުގައި ދެ ފަރާތުގެ ގުޅުން އިތުރަށް ވަރުގަދަކުރުމާއި ގުޅޭގޮތުން މަޝްވަރާކުރައްވާފައެވެ.
ފަތްކޮޅު އެރުވުމުގެ ރަސްމިއްޔާތުގައި ސަފީރު އުމަރު އަބްދުއްރައްޒާގުގެ އަރިހުގައި ކައުންސެލަރ މަރިޔަމް ސީނާ އާއި ފަސްޓް ސެކްރެޓަރީ ފާތިމަތު ރީނާ ބައިވެރިވެވަޑައިގަތެވެ.
ކިންގްޑަމް އޮފް ބެލްޖިއަމަށް ދިވެހިރާއްޖެއިން ކަނޑައަޅުއްވާފައި ހުންނަވާ ސަފީރުކަމަށާއި، ޔޫރަޕިއަން ޔޫނިއަނަށް ދިވެހިރާއްޖެއިން ކަނޑައަޅުއްވާފައި ހުންނަވާ ސަފީރުކަމުގެ މަޤާމަށް ސްޓޭޓް މިނިސްޓަރު ފެންވަރުގައި ޢުމަރު ޢަބްދުއްރައްޒާޤު އައްޔަންކުރެއްވީ މިދިޔަ މޭމަހުގެ 30 ވަނަ ދުވަހުއެވެ.
ބެލްޖިއަމް އާއި އީޔޫގެ ސަފީރުކަމުގެ މަގާމުގެ އިތުރުން އުމަރު އަބްދުއްރައްޒާގަކީ ރާއްޖެއިން ކިންގްޑޮމް އޮފް ނެދަލެންޑް އަދި ގްރޭންޑް ޑަޗްސް އޮފް ލަގްޒަމްބާގަށް ކަނޑައަޅުއްވާފައި ހުންނަވާ ނޮން ރެސިޑެންސް ސަފީރުވެސްމެއެވެ.
އުމަރު އަބްދުއްރައްޒާގު މީގެކުރިން ވަނީ ރާއްޖެއިން ލަންކާއަށް ކަނޑައަޅުއްވާފައި ހުންނަވާ ސަފީރުކަމުގެ މަގާމުވެސް އަދާކުރައްވާފައެވެ..