ރަޝިޔާއިން އަނެއްކާ ވެސް ޔޫކްރެއިނުގެ ވެރިރަށް ކީވްގެ އިތުރުން އެހެން ބޮޑެތި ރަށްތަކަށް ވަރުގަދަ މިސައިލް ހަމަލާތަކެއް ދީފިއެވެ. މި ހަމަލާތަކާ ގުޅިގެން ކީވްގެ އިތުރުން ޔޫކްރެއިނުގެ ދެވަނައަށް އެންމެ ބޮޑު ރަށް ކަމުގައިވާ ޚާރްކީވްގެ ގިނަ ސަރަޙައްދުތަކުން ކަރަންޓުގެ ޚިދުމަތް ވަނީ މެދުކެނޑިފައެވެ.
ރަޝިޔާއިން ޔޫކްރެއިނުގެ ޚާރްކީވްއަށް ދިން ހަމަލާތަކުގައި ޢާންމުން ދިރިއުޅޭ އެޕާޓްމަންޓް ޢިމާރާތަކަށް މިސައިލް ހަމަލާއެއް އަރައި، ތިން މީހުން މަރުވި ކަމުގައި ޔޫކްރެއިނުގެ އޮފިޝަލުން ބުނެއެވެ. މިސައިލް ހަމަލާ އަރާފައި ވަނީ ޚާރްކީވްގެ ރަށެއް ކަމުގައިވާ ކްރިވްޔީ ރީހްގެ ޢިމާރާތަކަށެވެ. އެ ޤައުމުގެ އިރުމަތީ ސަރަޙައްދުތަކަށް ޔޫކްރެއިނު ސިފައިން ދިން ހަމަލާތަކެއްގައި 12 މީހުން މަރުވެފައިވާ ކަމަށް ރަޝިޔާގެ އޮފިޝަލުން ބުނެއެވެ.
ރަޝިޔާއިން އެންމެ ފަހުން ދިން މިސައިލް ހަމަލާތަކާ ގުޅިގެން ޔޫކްރެއިނުގެ ރައީސް ވޮލޮޑޮމީރް ޒެލެންސްކީ ވިދާޅުވީ، ރަޝިޔާއިން ކުރިއަށް އޮތް ހަފުތާތަކުގައި ވެސް މި ފަދަ އިތުރު ހަމަލާތަކެއް ދިނުމަށް ތައްޔާރުވަމުންދާ ކަމުގައެވެ. އަދި، މި ހަމަލާތަކުން ދިފާޢުވުމުގައި އެ ޤައުމަށް އެހީތެރިކަން ފޯރުކޮށްދިނުމަށް އޭނާ ވަނީ އަނެއްކާ ވެސް ހުޅަނގަށް ގޮވައިލައްވާފައެވެ.
މި ހަމަލާތަކާ ގުޅިގެން އޭނާ ރަޝިޔާގެ ސަރުކާރާއި އަސްކަރިއްޔާ ސިފަ ކުރައްވާފައި ވަނީ "ރޮކެޓަށް އަޅުކަންކުރާ" ބަޔެއްގެ ގޮތުގައެވެ. އަދި، މި ފަދަ އުދުވާންތަކުގެ ސަބަބުން ޔޫކްރެއިނުގެ މިނިވަންކަމުގެ ދިފާޢުގައި ހަނގުރާމަ ކުރަމުންދާ ސިފައިންގެ ހިތްވަރާއި އަޒުމަށް ގުޑުމެއް ނާރާނެ ކަމުގައި އޭނާ ވިދާޅުވިއެވެ.
ރަޝިޔާގެ އެންމެ ފަހުގެ ހަމަލާތައް ވެސް އަމާޒުކޮށްފައި ވަނީ ކަރަންޓުގެ ޚިދުމަތް ދިނުމަށް ބޭނުން ކުރާ އިންޖީނުގެތަކާއި ވަސީލަތްތަކަށެވެ. އަދި، މި ފަހަރު ރަޝިޔާގެ އަސްކަރީ މަތިންދާބޯޓުތައް ވެސް ބޭނުންކޮށްފައިވާ ކަމުގައި ޔޫކްރެއިނުން ބުނެއެވެ. އަދި، ހަމަލާތަކުގައި ނުވަ އިންޖީނުގެ ހަލާކުވެފައިވާ ކަމަށް ޔޫކްރެއިނުން ބުނެއެވެ.
މި ހަމަލާތަކާ ގުޅިގެން ވެރިރަށް ކީވްގެ ތިންބައިކުޅަ އެއްބައިން ކަރަންޓުގެ ޚިދުމަތް މެދުކެނޑި، އެ ސަރަޙައްދުތައް މިހާރު އޮތީ ކަނު އަނދިރީގައެވެ. އަދި، ފިނިމޫސުން ލައިގަތުމާ ގުޅިގެން، ގެއްލުންވެފައިވާ އިންޖީނުގެތަކާއި އެހެނިހެން ވަސީލަތްތައް މަރާމާތު ކުރުމަށް ބޮޑެތި ގޮންޖެހުންތަކެއް ކުރިމަތިވެފައިވާ ކަމުގައި ކީވްގެ އޮފިޝަލުން ބުނެއެވެ.
އަންނަ އަހަރުގެ ފެބުރުވަރީ 24ވަނަ ދުވަހު މި ހަނގުރާމައަށް އެއް އަހަރު ފުރޭނެއެވެ. އޭގެ ކުރިން، ރަޝިޔާއިން ހަނގުރާމަ އިތުރަށް ވަރުގަދަ ކުރަން މަސައްކަތް ކުރަމުންދާ ކަމަށާއި، އެ ޤައުމަށް އިތުރު ސިފައިން ފޮނުވާނެ ކަމަށް ބެލެވޭ ކަމުގައި ޔޫކްރެއިނުން ބުނެއެވެ. މި ހަނގުރާމައިގައި ޔޫކްރެއިނުގެ ބޮޑު ބައެއް ސުންނާފަތި ކޮށްލާފައިވީ ނަމަވެސް، ރަޝިޔާ ސިފައިންގެ ލަނޑުދަނޑިތައް ހާސިލުވެފައިވާ ކަމަކަށް ނުބެލެވެއެވެ.
އޮކްޓޫބަރު މަހުގެ ކުރީކޮޅުން ފެށިގެން ރަޝިޔާއިން ދަނީ ހަފުތާއަކު އެއްފަހަރު ކަހަލަ ގޮތަކަށް ޔޫކްރެއިނުގެ އަމާޒުތަކަށް ވަރުގަދަ މިސައިލް ހަމަލާތަކެއް އަމާޒު ކުރަމުންނެވެ. މި ހަމަލާތައް ފަށާފައި ވަނީ، ޔޫކްރެއިނުގެ ދެކުނުގައިވާ ޚާރްސަންގައި ރަޝިޔާ ސިފައިންނަށް ލިބުނު ނާކާމިޔާބީއަށް ފަހުއެވެ. އެ ސަރަޙައްދުން ރަޝިޔާ ސިފައިން ފަހަތަށް ޖައްސާ، ޔޫކްރެއިނު ސިފައިން ވަނީ އެ ސަރަޙައްދު މިނިވަން ކޮށްފައެވެ.