އެފްރިކާ ބައްރުގެ ޤައުމެއް ކަމުގައިވާ މާލީގައި ހަރަކާތްތެރިވަމުންދާ އ.ދ.ގެ ސުލްޙަ ބަލަހައްޓާ ފައުޖުގެ ސިފައިންނަށް އަމާޒުކޮށް ދިން ހަމަލާތަކެއްގައި، ތިން ސިފައިން މަރުވެއްޖެއެވެ. މީގެތެރޭގައި ހިމެނެނީ އ.ދ.ގެ ފައުޖުގެ ސިފައިން ދެ މީހަކާއި، މާލީގެ ސިފައިންގެ މީހެކެވެ. އެ މީހުން މަރައިލާފައި ވަނީ، ޓިމްބުކްޓޫ ކައިރީގައި ފޯރިމަރަމުންދިޔަ އ.ދ.ގެ ފައުޖުގެ އުޅަނދަކަށް ދިން ހަމަލާއެއްގައެވެ.
މި ހާދިސާގައި އ.ދ.ގެ ފައުޖުގެ އިތުރު ހަތަރު ސިފައިން ޒަޚަމުވި ކަމަށާއި، ޓިކްބުކްޓޫގައި ހުންނަ އަސްކަރީ ހޮސްޕިޓަލެއްގައި އެ މީހުންނަށް ފަރުވާދެމުންދާ ކަމުގައި މާލީގައި ހަރަކާތްތެރިވާ އ.ދ.ގެ މިޝަންއިން ބުނެއެވެ. މަރުވި މީހުންގެ ތެރޭގައި އަންހެނެއް ވެސް ހިމެނެއެވެ. އެ މީހުންނަށް ހަމަލާދީފައި ވަނީ ކޮން ޖަމާޢަތަކަށް ނިސްބަތްވާ ހަނގުރާމަވެރިން ކަން އަދި ސާފެއް ނޫނެވެ.
އ.ދ.ގެ ސަލާމަތީ މަޖިލީހުން ވަނީ އެންމެ ހަރުކަށި އިބާރާތުން މި ހަމަލާ ކުށްވެރިކޮށްފައެވެ. އަދި، މި ހާދިސާގެ ފުރިހަމަ ތަހުޤީޤެއް ހިންގުމަށް މާލީގެ ސަރުކާރަށް ގޮވައިލާފައެވެ. މާލީގައި ހަރަކާތްތެރިވާ އ.ދ.ގެ މިޝަންގެ އިސްވެރިޔާ އަލް-ޤާސިމް ވޭން ވެސް ވަނީ، މި ހަމަލާ ކުށްވެރިކުރާ ކަމަށް ވިދާޅުވެ، ހަމަލާއާ ގުޅިގެން ސަލާމަތީ ފިޔަވަޅުތައް އިތުރަށް ވަރުގަދަ ކޮށްފައިވާ ކަމުގައި ވިދާޅުވެފައެވެ.
މި ހާދިސާއާ ގުޅިގެން ހަތިޔާރު އެޅި ގުރޫޕާއި އ.ދ.ގެ ފައުޖުގެ ސިފައިންނާ ދެމެދު ހަމަލާތަކެއް ބަދަލުކޮށްފައިވާ ކަމަށާއި، މި ހާދިސާގައި ހަނގުރާމަވެރިންގެ އެކަކު މަރައިލާފައިވާ ކަމުގައި ޓިމްބުކްޓޫގެ ގަވަރުނަރު ބަކޫން ކާންޓޭ ވިދާޅުވިއެވެ. އަދި، އެ ސަރަޙައްދުގެ ހާލަތު މިހާރު ކޮންޓްރޯލްގެ ދަށަށް ގެނެވިފައިވާ ކަމުގައި ވެސް އޭނާ ވިދާޅުވިއެވެ.
2012ވަނަ އަހަރުން ފެށިގެން މާލީގައި ދަނީ ދާޚިލީ ހަމަނުޖެހުންތަކެއް ހިނގަމުންނެވެ. މި ހަމަނުޖެހުންތަކުގައި އެތަކެއް ހާސް ބަޔަކު ވަނީ މަރުވެފައެވެ. އަދި، ގިނަ އަދަދެއްގެ ބަޔަކު ވަނީ ރެފިޔުޖީންނަށް ވެފައެވެ. މާލީގެ މެދުތެރޭގެ އިތުރުން އުތުރާއި އިރުމަތީގައި ވެސް ހަނގުރާމަވެރި ޖަމާޢަތްތަކުން ދަނީ ހަރަކާތްތެރިވަމުންނެވެ.
މާލީގައި މިހާރު ވެރިކަން ކުރަމުން ދަނީ އަސްކަރީ ސަރުކާރަކުންނެވެ. އަސްކަރިއްޔާއިން ހިންގި ބަޣާވާތެއްގައި މާލީގެ ސަރުކާރުން ވައްޓައިލާފައި ވަނީ 2020ވަނަ އަހަރުގެ އޮގަސްޓު މަހުއެވެ. އެއަށްފަހު، 2021ވަނަ އަހަރުގެ މޭ މަހުގެ ތެރޭގައި ވެސް އިތުރު ބަޣާވާތެއް ހިންގާފައިވެއެވެ.
މާލީގައި ހަމަނުޖެހުންތައް އިތުރުވަމުން ދިޔުމުގެ ސަބަބުން، އ.ދ.ގެ ސުލްޙަ ބަލަހައްޓާ ފައުޖުގައި ބައިވެރިވާ ޤައުމުތަކުން ވަނީ އެ ޤައުމުތަކުގެ ސިފައިން މާލީން ބާލަން ނިންމާފައެވެ. މީގެ ތެރޭގައި ޖަރުމަނު ވިލާތް ވެސް ހިމެނެއެވެ. އެ ޤައުމުން ބުނީ، 2024ވަނަ އަހަރު، އެ ޤައުމުގެ ސިފައިން މާލީން ބާލާނެ ކަމުގައެވެ. އެ ޤައުމުގައި ޖަރުމަނުގެ 1,100 ސިފައިން ދަނީ ހަރަކާތްތެރިވަމުންނެވެ.