ތުރުކީވިލާތުގެ އިރުދެކުނުގައިވާ ސަރަޙައްދެއްގައި ބޮމެއް ގޮއްވައިލައިގެން ދިން ހަމަލާއެއްގައި ނުވަ މީހުން ޒަޚަމުވެއްޖެއެވެ. މި ހަމަލާ އަމާޒުކޮށްފައި ވަނީ ދިޔާބަކީރްގައި ދަތުރު ކުރަމުންދިޔަ ފުލުހުންގެ އުޅަނދަކަށެވެ. އެއީ، ކުރުދީން ދިރިއުޅޭ ސަރަޙައްދެކެވެ.
މި ހާދިސާގައި ޒަޚަމުވެފައި ވަނީ ފުލުހުންގެ އަށް މީހުންނާއި ޢާންމުންގެ މީހަކަށެވެ. މި ނުވަ މީހުންނަށް ހޮސްޕިޓަލުގައި ފަރުވާ ދީފައިވާ ކަމަށާއި، ނަމަވެސް އެއްވެސް މީހެއްގެ ފުރާނައަށް ނުރައްކާވާ ފަދަ އަނިޔާތަކެއް ލިބިފައި ނުވާ ކަމުގައި އެ ސަރަޙައްދުގެ ގަވަރުނަރުގެ އޮފީހުން ބުނެއެވެ.
މިއީ، ފާއިތުވި ފަސްވަރަކަށް އަހަރުގެ ތެރޭގައި އެ ސަރަޙައްދުގައި ދީފައިވާ މި ފަދަ ފުރަތަމަ ހަމަލާއެވެ. އަދި، މި ހަމަލާއާ އެކު، އެ ސަރަޙައްދުގައި ހަމަނުޖެހުންތަކެއް ފެށިދާނެ ކަމުގެ ބިރު ވަނީ ހީވެފައެވެ. ތުރުކީ ވިލާތުގެ ސަރުކާރާ ދެކޮޅަށް މަސައްކަތް ކުރަމުންދާ އެއްވެސް ޖަމާޢަތަކުން، އަދި މިހާތަނަށް މި ހަމަލާގެ ޒިންމާ އުފުލާފައެއް ނުވެއެވެ.
ނަމަވެސް، މި ހަމަލާ ދީފައި މި ވަނީ، ކުރުދީންނާ ދެކޮޅަށް ތުރުކީ ވިލާތުގެ އަސްކަރިއްޔާއިން ވަރުގަދަ އުދުވާންތަކެއް ފަށާފައިވާ ދަނޑިވަޅެއްގައެވެ. ތުރުކީ ވިލާތުގެ ސިފައިން ވަނީ، ސޫރިޔާއާއި އިރާޤުގެ އުތުރުގައި ކުރުދީ ހަނގުރާމަވެރި ޖަމާޢަތްތައް ހަރަކާތްތެރިވާ ސަރަޙައްދުތަކަށް ވައިގެ ހަމަލާ ދޭން ފަށާފައެވެ.
ތުރުކީ ވިލާތުން ކުރުދީންނަށް ހަމަލާދޭން ފަށާފައި ވަނީ، ވެރިރަށް އިސްތަންބޫލުގައި ބޮމެއްގައި ގޮއްވައިލާ ހަ މީހުން މަރައިލި ހާދިސާއާ ގުޅިގެން ބަދަލު ހިފުމުގެ ގޮތުންނެވެ. ނޮވެންބަރު މަހު ދިން ހަމަލާގައި 80އަށްވުރެ ގިނަ މީހުން ޒަޚަމުވިއެވެ. އަދި، ތުރުކީ ވިލާތުން ވަނީ އެ ހަމަލާގެ ފަހަތުގައި ވަނީ ކުރުދީ ހަނގުރާމަވެރިން ކަމުގައި ތުހުމަތު ކޮށްފައެވެ.
ތުރުކީ ވިލާތުގެ ރައީސް ރަޖަބް ތައްޔިބް އުރުދުޣާން ވަނީ، ސޫރިޔާއަށް ސިފައިން ފޮނުވައި، ކުރުދީންނާ ދެކޮޅަށް ހަނގުރާމަ ފަށާނެ ކަމުގެ އިންޒާރު ވެސް ދެއްވާފައެވެ. ސޫރިޔާގައި ހަރަކާތްތެރިވާ ކުރުދީ ހަނގުރާމަވެރިންގެ އަމަލުތައް ހުއްޓުވަން އެހީތެރިވުމަށް، އޭނާ ދާދި ފަހުން ވަނީ ރަޝިޔާގެ ރައީސް ވްލަޑިމިޔަރ ޕުޓިންގެ އަރިހުން ވެސް އެދިވަޑައިގަންނަވާފައެވެ.
ތުރުކީ ވިލާތާއި ހުޅަނގުން ޓެރެރިސްޓް ޖަމާޢަތެއްގެ ގޮތުގައި ސިފަކުރާ ކުރުދިސްތާން ވަރކަރސް ޕާޓީ (ޕީ.ކޭ.ކޭ)އިން މީގެ ކުރިން ވަނީ ތުރުކީ ވިލާތުގައި ދީފައިވާ ބޮމުގެ ހަމަލާތަކެއްގެ ޒިންމާ އުފުލާފައެވެ. ތުރުކީ ސަރުކާރާ ދެކޮޅަށް ޕީ.ކޭ.ކޭ.އިން ހިންގަމުންދާ ހަރަކާތްތަކުގައި އެތަކެއް ސަތޭކަ މީހުން ވަނީ މަރުވެފައެވެ. މީގެ ތެރޭގައި ޢާންމުންނާއި ސަލާމަތީ ބާރުތަކުގެ ސިފައިން ހިމެނެއެވެ.