ޖަރުމަނު ވިލާތުގެ ވެރިރަށް ބަރލިންގެ ރެޑިސަން ބްލޫ ހޮޓަލުގެ ލޮބީގައި ހުންނަ ބޮޑު މަސް ޓޭންކެއް ތަޅައިގެން ގޮސް ދެ މީހަކަށް އަނިޔާވެއްޖެއެވެ. އަކުއާޑޯމްގެ ނަން ދީފައިވާ މި މަސް ޓޭންކުގައި 1,500 އަށްވުރެ ގިނަ މަސް ހުރެއެވެ. މަސް ޓޭންކު ތަޅައިގެންދިޔަ ވަގުތު ބިއްލޫރިގަނޑަކުން ޖެހި ދެ މީހަކު ހޮސްޕިޓަލުގައި އެޑްމިޓްކޮށްގެން ފަރުވާދޭން ޖެހުނު ކަމުގައި ބަރލިންގެ އެމަރޖެންސީ ޚިދުމަތްތަކާ ބެހޭ އިދާރާއިން ބުނެއެވެ.
އެކުއާޑޯމް މަސް ޓޭންކު ހުޅުވާފައި ވަނީ 2004ވަނަ އަހަރުއެވެ. މިއީ، ފަތުރުވެރިންގެ މެދުގައި މަޤުބޫލު އެއްޗެކެވެ. 26 ފޫޓު އުސް މި މަސް ޓޭންކު ތަޅައިގެން ދާން މެދުވެރިވި ސަބަބު ހޯދުމަށް އޮފިޝަލުން މިހާރު ދަނީ މަސައްކަތް ކުރަމުންނެވެ.
މަސް ޓޭންކު ތަޅައިގެން ދިޔުމާ އެކު، އޭގައި ހުރި މިލިޔަނަކަށް ވުރެ ގިނަ ލީޓަރުގެ ފެން ހޮޓަލުގެ ލޮބީތެރެއަށާއި މަގު މައްޗަށް ބަންޑުންވިއެވެ. އަދި، ހޮޓަލުގެ ލޮބީގެ އިތުރުން މަގުމަތީގައި ފެންބޮޑުވެ، އެ ސަރަޙައްދުގެ މަގުތައް ވަގުތީ ގޮތުން ބަންދު ކުރަން ޖެހުނެވެ. ޓޭންކު ތަޅައިގެން ދިޔުމާ އެކު ޓޭންކުގައި ތިބި މަސްތައް ވެސް ވަނީ ފެންގަނޑާ އެކު ބޭރަށް ވެއްޓިފައެވެ. އަދި އެތަކެއް ސަތޭކަ މަސްމަހާމެހި މި ހާދިސާގައި ވަނީ މަރުވެފައެވެ.
މި ހާދިސާއާ ގުޅިގެން ހޮޓާ ވަނީ ހުސްކޮށްފައެވެ. އަދި، ވަގުތީ ގޮތުން ބަންދު ކޮށްފައެވެ. އެ ތަނުގައި ތިބި ގެސްޓުން ވަނީ ވަގުތީ ގޮތުން އެހެން ތަންތަނަށް ބަދަލު ކޮށްފައެވެ. މި ހާދިސާގައި ލިބިފައިވާ ގެއްލުން އަންދާޒާ ކުރުމަށް ޑްރޯން ފަދަ ވަސީލަތްތައް ބޭނުން ކޮށްގެން އޮފިޝަލުން މިހާރު ދަނީ މަސައްކަތް ކުރަމުންނެވެ.