ދުނިޔޭގެ އެކި ކަންކޮޅުތަކުގައި ހަލުވިކަމާ އެކު ނުރައްކާތެރި ބައްޔެއް ކަމުގައިވާ ކޮލެރާ ފެތުރެމުންދާ ކަމުގެ އިންޒާރު ދުނިޔޭގެ ޞިއްޙަތު ޖަމުޢިއްޔާ (ޑަބްލިޔު.އެޗް.އޯ)އިން ކޮށްފިއެވެ. އެ ޖަމުޢިއްޔާއިން ބުނާ ގޮތުގައި، މި ބަލި ފެތުރުން ޢާންމުވެފައި ވަނީ މޫސުމަށް އަންނަމުންދާ ނޭދެވޭ ބަދަލުތަކުގެ ސަބަބުންނެވެ. އަދި، މި ބައްޔަށް ޚާއްޞަކޮށްފައިވާ ވެކްސިންގެ އަދަދު މަދުވުމުގެ ސަބަބުން، ބަލި ފެތުރުން ކޮންޓްރޯލް ކުރުމަށް ވަނީ ހުރަސްތަކެއް ކުރިމަތިވެފައެވެ.
ދުނިޔޭގެ އެކި ކަންކޮޅުތަކުގައި 29 ޤައުމެއްގައި މިހާރު ވެސް ހަލުވިކަމާ އެކު މި ބަލި ފެތުރެމުންދާ ކަމުގައި އެ ޖަމުޢިއްޔާއިން ބުނެއެވެ. މީގެ ތެރެއިން ވެސް ހެއިޓީ ފާހަގަ ކުރެވެއެވެ. އެ ޤައުމުގައި މި ބަލި ޖެހިފައިވާ ކަން ކަށަވަރު ކުރެވިފައިވާ މީހުންގެ އަދަދު މިހާރު ވަނީ 1,200 އަށްވުރެ މައްޗަށް އަރާފައެވެ.
ހެއިޓީގައި ބަލި ޖެހިފައިވާ ކަމަށް ޝައްކު ކުރެވޭ 14,000 އަށްވުރެ ގިނަ ކޭސް ރިޕޯޓުކޮށްފައިވާއިރު، އެއީ ބަލި ޖެހިފައިވާ މީހުންނަށް ކަށަވަރު ކުރުމަށް ޓެސްޓު ކުރުމުގެ މަސައްކަތް ޑަބްލިޔު.އެޗް.އޯ.އިން ދަނީ ކުރަމުންނެވެ. ހެއިޓީގައި މި ބަލީގައި މަރުވި މީހުންގެ އަދަދު މިހާރު ވަނީ 280 އަށްވުރެ މައްޗަށް އަރާފައެވެ.
ޑަބްލިޔު.އެޗް.އޯ.އިން ދާދިފަހުން ވަނީ ހެއިޓީއަށް ވެކްސިންގެ 1.2 މިލިޔަން ޑޯޒް ފޮނުވާފައެވެ. ނަމަވެސް، ވެކްސިން ސްޓޮކްގެ އަދަދު ވަރަށް މަދު ކަމަށާއި، ފަގީރު ޤައުމުތަކުގެ ބަލި ފެތުރުން އިތުރުވެފައި ވީ ނަމަވެސް، ވެކްސިން އުފައްދާ ކުންފުނިތަކުން އެ ކަމަށް އިޖާބަދިނުމުގެ ގޮތުން ވެކްސިން އުފައްދާ މިންވަރު އިތުރުކޮށްފައި ނުވާ ކަމަށް އެ ޖަމުޢިއްޔާއިން ތުހުމަތު ކުރެއެވެ.
"ބަލި ފެތުރުން ކޮންޓްރޯލް. ނުކުރެވިއްޖެ ނަމަ، އެ ޤައުމުގައި ހާލަތު ދާނީ ގޯހުން ގޯހަށް. ހަލުވިކަމާ އެކު ބަލި ފެތުރެމުންދާ ޤައުމުތަކުގައި އެ ކަން ކޮންޓްރޯލް ކުރާނެ ވަސީލަތްތަކެއް ނެތް. އެންމެ ނުރައްކާ ބޮޑުވެފައި ވަނީ ފަގީރު ޤައުމުތަކުގައި. އެ ޤައުމުތަކުގައި ސާފު ބޯފެން ހޯދުމަށް ވަނީ ދަތިވެފައި،" ޑަބްލިޔު.އެޗް.އޯ.ގެ ކޮލެރާ ފެތުރުން ކޮންޓްރޯލް ކުރުމުގައި ހަރަކާތްތެރިވާ ޓީމުގައި އިސްކޮށް އުޅުއްވާ ފިލިޕް ބަރްބޯޒާ ވިދާޅުވިއެވެ.
ފަގީރު ޤައުމުތަކުގައި މި ބަލި ޖެހޭ މީހުންގެ ފުރާނަ ގެއްލުމުގެ ފުރުޞަތު ބޮޑު ކަމުގައި ވެސް އޭނާ ވިދާޅުވިއެވެ. ކޮލެރާއަކީ ތަޣައްޔަރުވެފައިވާ ފެނާއި ކާބޯތަކެތީގެ ޒަރީއާއިން ފެތުރޭ ނުރައްކާތެރި ބައްޔެކެވެ. މި ބަލީގެ އަލާމަތްތަކުގެ ތެރޭގައި ބޭރަށް ހިންގުމާއި، ހޮޑުލެވުން ހިމެނެއެވެ. މިއީ، ކުޑަކުދިންނަށް ވަރަށް ނުރައްކާތެރި ބައްޔެކެވެ.
"މޫސުމަށް އަންނަމުންދާ ނޭދެވޭ ބަދަލުތަކުގެ ސަބަބުން މި އަހަރުގެ ތެރޭގައި ކޮލެރާ ފެތުރުން އިތުރުވެފައިވާ ކަން ފާހަގަ ކުރެވޭ. މީގެ ތެރޭގައި ބައެއް ސަރަޙައްދުތަކަށް ހަނަފަސްކަން ކުރިމަތިވުމާއި، އަނެއްބައި ސަރަޙައްދުތަކަށް ބޯކޮށް ވާރޭވެހި، ފެންބޮޑުވުން ހިމެނޭ. މި ފަދަ ކާރިސާތަކާ ގުޅިގެން ސާފުބޯފެން ލިބުމަށް ހުރަސްއެޅޭ،" ބަރްބޯޒާ ވިދާޅުވިއެވެ.
ކޮލެރާއަކީ ފަރުވާ ކުރެވޭ ބައްޔެކެވެ. ބަލި ޖެހިފައިވާ ކަން ކުރިން ދެނެގަނެވިއްޖެ ނަމަ، ދިޔާތަކެއްޗާއި އެންޓިބަޔޮޓިކްސް ފަދަ ބޭސްތައް ބޭނުންކޮށްގެން މި ބައްޔަށް ފަރުވާ ކުރެވުނު ނަމަވެސް، ފަގީރު ޤައުމުތަކުގައި އެ ފަދަ ވަސީލަތްތައް ލިބުމުގައި ދަތިތައް ހުރި ކަމުގައި ޑަބްލިޔު.އެޗް.އޯ.އިން ބުނެއެވެ.