މެލޭޝިޔާގެ ކުއަލަ ލުމްޕޫރުގެ ރަށްބޭރު ހިސާބެއްގައި ބިންގަނޑު ކަނޑައިގެން ގޮސް، ކިސަޑު ފައިބާ 19 މީހުން މަރުވެއްޖެއެވެ. ބަޓަންގް ކަލީ ކިޔާ ރަށެއްގައި ހިނގި މި ހާދިސާގައި މަރުވި މީހުންގެ ތެރޭގައި ހަތަރު ކުޑަކުދިން ވެސް ހިމެނެއެވެ. އަދި، އިތުރު 14 މީހަކު ވަނީ ކިސަޑުތަކުގެ ދަށުވެ ގެއްލިފައެވެ.
ބިންގަނޑު ކަނޑައިގެން ގޮސް ކިސަޑު ފައިބާފައި ވަނީ ބަޓަންގް ކަލީގެ ދަނޑެއްގައި ހުންނަ ކޭމްޕެއްގެ މައްޗަށެވެ. މި ހާދިސާގައި މަރުވި މީހުންގެ ތެރޭގައި ދެމައިން ހިމެނޭ ކަމުގައި ސެލަންގޯ ސްޓޭޓްގެ އޮފިޝަލުން ބުނެއެވެ. ގެއްލިފައިވާ 14 މީހުން ހޯދުމަށް މިހާރު ދަނީ މަސައްކަތް ކުރަމުންނެވެ.
މި ހާދިސާ ހިނގި ވަގުތު އެ ތަނުގައި ގިނަ އަދަދެއްގެ ބަޔަކު ތިބި ކަމަށާއި، 61 މީހުން ސަލާމަތް ކުރެވިފައިވާ ކަމުގައި އޮފިޝަލުން ބުނެއެވެ. އެއީ، އެ ކޭމްޕުގައި ޗުއްޓީ ހޭދަކޮށްލަން ގޮސް ތިބި ބަޔެއް ކަމުގައި ވެސް އޮފިޝަލުން ބުނެއެވެ. ކިސަޑުތަކުގެ ދަށުވެފައިވާ މީހުން ސަލާމަތް ކުރުމަށް 100 ވުރެ ގިނަ އޮފިޝަލުން މިހާރު ދަނީ ހަރަކާތްތެރިވަމުންނެވެ.
މި ހާދިސާ ހިނގާފައިވާ ސަރަޙައްދުގައި ހުރި ކޭމްޕަކީ ޤަވާޢިދާ ޚިލާފަށް، ހުއްދަ ނުނަގައި ހިންގަމުންދިޔަ ކޭމްޕެއް ކަމުގައި އޮފިޝަލުން ބުނެއެވެ. ވިއްސާރަ މޫސުމަކީ މެލޭޝިޔާގައި މި ފަދަ ބިންގަނޑު ކަނޑައިގެން ދިޔުމާއި ކިސަޑު ފޭބުމުގެ ހާދިސާތައް ޢާންމުކޮށް ހިނގާ މޫސުމެކެވެ.
ނަމަވެސް، ފާއިތުވި ދުވަސްތަކުގައި ބަޓަންގް ކަލީ ސަރަޙައްދަށް ވިއްސާރަކޮށްފައި ނުވާ ކަމަށާއި، ބިންގަނޑު ކަނޑައިގެން ދިޔުމުގެ ހާދިސާ ހިނގާފައި ވަނީ ޤަވާޢިދާ ޚިލާފަށް ޢިމާރާތް ކުރުމުގެ މަސައްކަތް ކުރާތީ ކަމަށް ބެލެވޭ ކަމުގައި އޮފިޝަލުން ޤަބޫލު ކުރެއެވެ.
މި އަހަރުގެ މާރިޗު މަހު ވެސް ކުއަލަ ލުމްޕޫރުގެ ރަށް ބޭރު ހިސާބެއްގައި ބިންގަނޑު ކަނޑައިގެން ދިޔުމުގެ ހާދިސާއެއް ހިނގައި، ހަތަރު މީހުން މަރުވިއެވެ. އަދި، 1993ވަނަ އަހަރު ހިނގި މި ފަދަ ހާދިސާއެއްގައި 12 ބުރީގެ ޢިމާރާތެއް ވެއްޓި، 48އަށްވުރެ ގިނަ މީހުން މަރުވިއެވެ.