ދިވެހި ރައްޔިތުންގެ ޕާޓީ (ޑީއާރްޕީ) އުވާލުމަށް އިލެކްޝަންސް ކޮމިޝަނުން ނިންމުމާ ގުޅިގެން އެކަމަށް ހައްލެއް ހޯދުމަށް ކޯޓަށް ދިއުމަށް އެ ޕާޓީން ނިންމައިފިއެވެ.
އިލެކްޝަން ކޮމިޝަނުން ޑީއާރްޕީ އުވާލުމަށް ނިންމުމުން އެކަމާމެދު ކަންބޮޑުވުން ފާޅުކޮށް ޑީއާރްޕީން ނެރުނު ބަޔާނުގައި ބުނީ ކޯޓުން މި މައްސަލައަށް ހައްލެއް ނުލިބެއްޖެނަމަ ޖޭ.ޑީ.ޕީގެ ނަމުގައި އައު ސިޔާސީ ޕާޓީއެއް އުފެއްދުމުގެ މަސައްކަތް ފެށުމަށް ތައްޔާރުވަމުން އަންނަކަމަށެވެ.
ޑީއާރްޕީގެ ބަޔާނުގައި ބުނީ އެ ޕާޓީގެ މިހާރުގެ ލީޑަރޝިޕުން 2019 ވަނަ އަހަރު ޕާޓީއާ ހަވާލުވުމާއެކު އޭގެ ކުރިން އެ ޕާޓީ ހިންގުމުގައި ވެރިންގެ ގޮތުގައި ތިބި މީހުން ހިންގާފައިވާ އެކި ކަންކަމާ ގުޅިގެން އެކި ތަންތަނަށް ދަންކަން ޖެހިފައިވާ ދަރަނީގެ މައްސަލަތައް ހައްލުކުރުމަށާއި ޕާޓީގެ އިދާރީ ކަންކަން ހަރުދަނާ ކުރުމަށް މަސައްކަތް ފެށިތަނާހެން ކޯވިޑުގެ ސަބަބުން އެހާލަތުން އަރައިނުގަނެވި ތިބެންޖެހުނުކަމަށެވެ.
އަދި މިއަހަރު މަސައްކަތް ފެށޭވަރުވުމުން ޤާނޫން ބުނާ މިންވަރަށް މީހުން ހަމަކުރުމުގެ މަސައްކަތް ފެށިއިރު އީސީން ޕާޓީގެ މެންބަރޝިޕް ފޯމްތަކަށް ބޮޑެތި ބަދަލުތައް ގެނެސްފައިވާކަމަށެވެ. މިގޮތުން ދިމާވަމުންދާ ދަތިތައް ތަކުރާރުކޮށް އީސީއަށް އަންގަމުން ދަނިކޮށް ޕާޓީ އުވާލުމަށް ނިންމުމަކީ ރާއްޖޭގެ ޑިމޮކްރަސީ ފުނޑާލުމަށް އީސީން ފެށި މަސައްކަތެއްކަމަށްވެސް ޑީއާރްޕީގެ ބަޔާނުގައި ބުނެއެވެ.
އެ ބަޔާނުގައި ބުނީ ކުރިއަށް ރިޔާސީ އިންތިޚާބަށް އެޕާޓީގެ ލީޑަރު އަދި ކާށިދޫ ދާއިރާގެ މަޖިލިސް މެންބަރު އަބްދުﷲ ޖާބިރު ކުރިމަތިލާފައިވާ ވަގުތެއްގައި ޕާޓީ އުވާލުމަށް ނިންމުމަކީ ޑިމޮކްރަސީއާ ނުހަނު ބީރައްޓެހި އަމަލެއްކަމަށެވެ. އަދި ރާއްޖޭގައި ދެވަނައަށް އެންމެ ދުވަސް ސިޔާސީީ ޕާޓީ އުވުނަ ނުދިނުމަށްޓަކައި ކޯޓަށް ދާން ނިންމާފައިވަކަމަށް ޑީއާރްޕީން ބުނެއެވެ.
ދިވެހި ރައްޔިތުންގެ ޕާޓީ (ޑީއާރްޕީ) އުވާލުމުގެ މަސައްކަތް ކުރަމުން އަންނާތީ އެޕާޓީގެ ނަމުގައި އެއްވެސް ސިޔާސީ ހަރަކާތެއް ނުހިންގުމަށް އިލެކްޝަންސް ކޮމިޝަނުން ވަނީ އަންގާފައެވެ. އީސީން މިގޮތަށް ނިންމާފައިވަނީ ސިޔާސީ ޕާޓީއެއް ވުޖޫދުގައި އޮތުމަށް ސިޔާސީ ޕާޓީގެ ޤާނޫނު ލާޒިމުކުރާ 3،000 މެންބަރުން ހަމަކުރުމަށް ޑީއާރްޕީއަށް ގާނޫނުގެ ދަށުން ދެވުނު ތިން މަސް ދުވަހުގެ މުއްދަތު އޮކްޓޫބަރު 25 އަށް ހަމަވިއިރު 3،000 މެންބަރުން އެ ޕާޓީއަށް ހަމަނުވުމުން ކަމަށް އިލެކްޝަންސް ކޮމިޝަނުން ވަނީ ބުނެފައެވެ.