ގުޅިފަޅުގައި ރޭ ހިނގި އަލިފާނުގެ ހާދިސާ އާ ގުޅިގެން 73 މީހަކު ހޮސްޕިޓަލަށް ގެންގޮސް ފަރުވާދީފިއެވެ.
ރޭ ދަންވަރު ހިނގި މި ހާދިސާގައި އަލިފާން ރޯވެފައިވަނީ ގުޅިފަޅުގައި ހުންނަ އެކޮމަޑޭޝަން ބްލޮކެއްގައެވެ. މިތަނަކީ ވިލިމާލެ ބްރިޖްގެ މަސައްކަތް ކުރަމުން އަންނަ އެފްކޮންސްގެ މުވައްޒަފުން ތިބޭ ތަނެވެ.
މި ހާދިސާގައި އެއްވެސް މީހަކަށް ބޮޑެތި ޒަހަމްތަކެއް ލިބިފައި ނުވާކަމަށް މައުލޫމާތު ލިބެއެވެ. އެހެންނަމަވެސް 73 މީހަކު ހޮސްޕިޓަލަށް ގެންގޮސް ވަނީ ފަރުވާދީފައެވެ. އޭގެތެރެއިން 13 މީހަކަށް އައިޖީއެމްއެޗްގައި ފަރުވާދިން އިރު އަނެއް 60 މީހުންނަށް ފަރުވާ ދީފައިވަނީ ހުޅުމާލޭގައި ހުންނަ ޓްރީޓޮޕް ހޮސްޕިޓަލްގައެވެ.
އެމްއެންޑީއެފުން ވިދާޅުވީ އަލިފާނުގެ ހާދިސާގެ ރިޕޯޓް ލިބުނީ ރޭ ދަންވަރު 31؛00 ކަންހާއިރު ކަމަށެވެ. އަދި އެތަނުގައި ރޯވި އަލިފާންގަނޑު ނިންވާލެވުނީ ދަންވަރު 01:52 ކަންހާއިރުކަމަށެވެ. މި ހާދިސާގައި އަލިފަން ރޯވި އިމާރާތް އެއްކޮށްް އަނދާ ހުލިވެފައިވާކަމަށް އެމްއެންޑީއެފުން ވިދާޅުވެއެވެ.
އަލިފާނުގެ ހާދިސާ ހިނގި އެކޮމަޑޭޝަން ބްލޮކުގައި 465 މީހުން ދިރިއުޅެމުން އަންނަކަމަށްް އެމްއެންޑީއެފުން ވިދާޅުވެއެވެ.
މި ހާދިސާއާއި ގުޅިގެން އެފްކޮންސް އިން ނެރުނު ބަޔާނެއްގައި ބުނީ މި ހާދީސާަގައި އެއްވެސް މީހަކު ފިހިފައިނުވާކަމަާއި ކުދިކުދި އަނިޔާތައް ލިބުނު މީހުންނަށް ހޮސްޕިޓަލްގައި ފަރުވާދެމުން އަންނަކަމަށެވެ. އަދި އަލިފާނުހެ ހާދިސާ ހިނގަން މެދުވެރި ސަބަބެއްއަދި ސާފުނުވާކަމަށާއިއ އެކަން ކަމާއިއ ގުޅޭ އިދާރާތަކާއި ގުޅިގެން ތަހުގީގުކުރަމުން އަންނަކަމަށްވެސް އެފްކޮންސް އިން ބުނެއެވެ.