ލުބުނާނުގައި ހަރަކާތްތެރިވާ އ.ދ.ގެ ސުލްޙަ ބަލަހައްޓާ ފައުޖުގެ ސިފައިންގެ ބަޔަކު ދަތުރުކުރަމުންދިޔަ އުޅަނދަކަށް ދިން ބަޑީގެ ހަމަލާތަކެއްގައި އެ ފައުޖުގެ އެކަކު މަރުވެ، އިތުރު ތިން ސިފައިން ޒަޚަމުވެއްޖެއެވެ. މި ހާދިސާ ހިނގާފައި ވަނީ ލުބުނާނުގެ ދެކުނުގައި، އެ ޤައުމާއި އިސްރާޢީލާ ގުޅޭ ސަރަޙައްދީ ރޮނގު ކައިރީގައިވާ ރަށެއް ކަމުގައިވާ އަލް-އަޤްބިއްޔާ ކައިރީގައެވެ.
މި ހާދިސާގައި މަރުވީ އަޔަލެންޑުގެ ސިފައިންގެ މީހެކެވެ. އޭނާގެ މަރާ ގުޅިގެން އަޔަލެންޑުން ވަނީ ކަންބޮޑުވުން ފާޅުކޮށްފައެވެ. އަޔަލެންޑުގެ ބޮޑުވަޒީރު މައިކަލް މާޓިން ވިދާޅުވީ، މި ހާދިސާގެ މަޢުލޫމާތު އެއްސެވީ ކުއްލި ސިހުމާއި، ފުން ހިތާމައާ އެކުގައި ކަމުގައެވެ.
ހަތިޔާރު އެޅި ޖަމާޢަތަކުން ހަމަލާދީފައި ވަނީ އަލް-އަޤްބިއްޔާއިން ފުރައިގެން ވެރިރަށް ބެއިރޫތަށް ދަތުރު ކުރަމުންދިޔަ ދެ އުޅަނދަކަށެވެ. އެ އުޅަނދުތަކުގައި އ.ދ.ގެ ސުލްޙަ ބަލަހައްޓާ ފައުޖުގެ އަށް ސިފައިން ތިބި ކަމުގައި އަޔަލެންޑުގެ އަސްކަރިއްޔާއިން ބުނެއެވެ.
މި ހާދިސާގައި ސިފައިންގެ ހަތަރު މީހަކު ޒަޚަމުވި ކަމަށާއި، މީގެ ތެރެއިން އެކަކު ހޮސްޕިޓަލަށް ގެންދިޔަ މަގު މަތީގައި މަރުވެފައިވާ ކަމުގައި ވެސް އަޔަލެންޑުގެ އަސްކަރިއްޔާއިން ބުނެއެވެ. އަދި، މީގެ ތެރެއިން އިތުރު މީހެއްގެ ހާލަތު ސީރިޔަސް ކަމަށާއި، އޭނާގެ ފުރާނަ ސަލާމަތް ކުރުމަށް މަސައްކަތް ކުރަމުންދާ ކަމުގައި ވެސް އެ ޤައުމުގެ އަސްކަރިއްޔާއިން ބުނެއެވެ.
މި ހާދިސާއާ ގުޅިގެން ލުބުނާނުގެ ބޮޑުވަޒީރު ނަޖީބް މީކާތީ ވެސް ވަނީ ކަންބޮޑުވުން ފާޅު ކުރައްވާފައެވެ. އަދި، މި ހާދިސާގެ ފުރިހަމަ ތަހުޤީޤެއް ހިންގަވާނެ ކަމުގައި އޭނާ ވިދާޅުވިއެވެ. ލުބުނާނުގައި ހަރަކާތްތެރިވާ މުޖާހިދުންގެ ޖަމާޢަތެއް ކަމުގައިވާ ހިޒްބުاللهގެ އިސް އޮފިޝަލެއް ކަމުގައިވާ ވަފީޤް ޞަފާ ބުނީ، މިއީ ގަސްދުގައި ދީފައިވާ ހަމަލާއެއް ކަމަށް ނުބެލެވޭ ކަމުގައެވެ. އަދި، މި ހާދިސާ އިތުރަށް ތަހުޤީޤު ކުރަމުންދާ ކަމުގައި އޭނާ ވެސް ބުންޏެވެ.
މިއީ، 2015ވަނަ އަހަރަށް ފަހު ހިނގާފައިވާ ހާދިސާއެއްގައި އ.ދ.ގެ ސުލްޙަ ބަލަހައްޓާ ފައުޖުގެ ސިފައިންގެ މީހަކު ލުބުނާނުގައި މަރުވި ފުރަތަމަ ފަހަރެވެ. އެ އަހަރު، ޔަހޫދީ އިސްރާޢީލުގެ ސިފައިން ދިން ހަމަލާތަކެއްގައި ސްޕެއިންގެ ސިފައިންގެ މީހަކު މަރުވިއެވެ.
ލުބުނާނަށް އ.ދ.ގެ ސުލްޙަ ބަލަހައްޓާ ސިފައިން ދިޔައީ 1978 ވަނަ އަހަރު، ޔަހޫދީ އިސްރާޢީލުގެ ސިފައިން އެ ޤައުމުން ބޭލުމުގެ ކަންކަން ބެލެހެއްޓުމަށެވެ. ލުބުނާނާއި އިސްރާޢީލާ ދެމެދު އެއިރު ފެށި ހަނގުރާމަ ނިމުނުކަން ރަސްމީކޮށް އަދިވެސް އިޢުލާނު ކޮށްފައެއް ނުވެއެވެ. ދެ ޤައުމުގެ ސަރަޙައްދީ އިމުގައި ސުލްޙަ ބެލެހެއްޓުމުގެ މަސައްކަތުގައި އ.ދ.ގެ 10,000 އަށްވުރެ ގިނަ ސިފައިން އަދިވެސް ދަނީ ހަރަކާތްތެރިވަމުންނެވެ.