ހުޅުމާލޭގައި ކޮމިއުނިޓީ ހަބެއް ހެދުމަށް ހައުސިން ޑިވެލޮޕްމަންޓް ކޯޕަރޭޝަން އެޗްޑީސީއާއި އަލޯހާ ކްލަަބާއި ދެމެދު އެއްބަސްވުމެއްގައި ސޮއިކޮށްފިއެވެ.
މިއީ ހުޅުމާލޭގައި ދިރިއުޅޭ ފަރާތްތަކާއި އެކި ބޭނުންތަކުގައި ހުޅުމާލެއަށް ޒިޔާރަތްކުރާ މީހުންނަށް، އާއިލާއާއި ރައްޓެހިންނާއެކު އެކުވެރި މާޙައުލެއްގައި ގިނަ ހަރަކާތްތަކެއް ހިނގޭނެގޮތަށް ފަރުމާކުރާ ކޮމިއުނިޓީ ހަބެކެވެ.
ކޮމިއުނިޓީ ހަބް ޤާއިމުކުރާނީ ހުޅުމާލޭ ފޭސް އެކެއްގެ ބީޗް ސަރަޙައްދުގައި 406 އަކަފޫޓެއްގެ ބިމެއްގައެވެ. އިމާރާތަކާއެކު ހަދާ މި ހަބްގައި ރައްޔިތުންނާއި ގުޅުން ހުރި ގިނަ ހަރަކާތްތަކެއް ހިންގާނެއެވެ. އެގޮތުން ކުޑަކުދިންނަށް ޚާއްސަ ކޮށްގެން މޫދުގެ ހަރަކާތްތަކާއި ޒުވާނުންގެ ކުރިއެރުވުމަށް ލައިފް ސްކިލް ޕްރޮގްރާމްތައް އަދި ހާއްސަ އެހީއަށް ބޭނުންވާ މީހުންނަށްވެސް ގިނަ ހަރަކާތްތަކެއް މި ހަބުން ކުރިއަށް ގެންދިއުމަށް ވަނީ ހަމަޖެހިފައެވެ. ވަކިން ހާއްސަކޮށް ތިމާވެއްޓަށް ގެއްލުންވާ ކަންކަމަށް ހޭލުންތެރިކަން އިތުރު ކުރުމަށާއި ޒުވާނުން އަދި ކުޑަކުދިންނަކީ ތިމާވެއްޓަށް ލޯބިކުރާ ބަޔަކަށް ހެދުމަށްވެސް ހާއްސަ އިސްކަމެއް ދީގެން މަސައްކަތް ކުރާނެއެވެ. މިއީ މިގޮތަށް ހުޅުމާލޭގައި ޤާއިމުކުރާ ފުރަތަމަ ކޮމިއުނިޓީ ހަބެވެ.
ނަމަވެސް މިހާރުވެސް ބައެއް މޫދު ކުޅިވަރާއި ގުޅުންހުރި ވިޔަފާރިތައް ހުޅުމާލޭގެ ބީޗް ސަރަޙައްދުގައި އަންނަނީ ހިންގަމުންނެވެ.
ހުޅުމާލޭގައި ދިރިއުޅޭ ރައްޔިތުންނަށް ހުޅުމާލެއަކީ ހިތްފަސޭހަ ތަނަކަށް ހެދުމަށް އެޗްޑީސީން އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން މޫދަށް އެރޭ ސަރަޙައްދައް ބޭނުންވާ ވަސީލަތްތައް ޤާއިމުކުރުމާއި، ހުޅުމާލޭގެ ހޭޅިފަށު ގޮޑުދޮށުގައި ވިޔަފާރިތަކުން ބޭނުންކުރަމުން އައި ބިންތައްވެސް ވަނީ ހުސްކޮށްފައެވެ. މިއީ އެކަށީގެންވާ ގޮތުގައި ހުޅުމާލޭގެ ބީޗް ސަރަޙައްދު އާއްމުންނަށް ބޭނުންކުރެވޭނެ ގޮތް ހެދުމަށް ގެނައި ބަދަލެކެވެ. އަދި ހުޅުމާލޭގެ ދެވަނަ ފިޔަވަހީގެ ބީޗް ސަރަޙައްދަކީވެސް ބޭނުންކުރަން ފަސޭހަ ސަރަޙައްދަކަށް ހެދުމަށް، ބީޗް ސަރަޙައްދުގައި ވަނީ ބެންޗްތައް ޖަހާފައެވެ.