ހދ.ނޮޅިވަރަމުގައި މަރުވެފައި އޮތްވާ ފެނުނު އެރަށު ހިތައްފިނިވާގެ ނިޝާމާ މުހައްމަދުގެ ހަށިގަނޑު ޕޯސްޓްމޯޓަމް ހެދުމަށް މާލެ ގެނައުމަށް ކުރަންޖެހޭ މަސައްކަތް ކުރަމުން އަންނަ ކަމަށް ފުލުހުން ހާމަކުރައްވައިފިއެވެ. ނިޝާމާގެ ހަށިގަނޑު މިހާރުވަނީ ހދ.ކުޅުދުފުއްޓަށް ގެންގޮސްފައެވެ.
އުމުރުން 28 އަަހަރުގެ ނިޝާމާ މުހައްމަދުގެ މަރުގެ މައްސަލައާ ގުޅިގެން އދ.ފެންފުށީ ރޯޒީވިލާ އަބޫބަކުރު ފައިސަލް 32 އަހަރު ކޯޓް އަމުރެއްގެ ދަށުން ހައްޔަރުކޮށްފައިވާ ކަމަށްވެސް ފުލުހުން ވިދާޅުވެއެވެ. އަދި މިމައްސަލަ ފުލުހުން އަންނަނީ ތަޙްޤީގުކުރަމުންނެވެ.
ނިޝާމާގެ މަރުގެ މައްސަލައިގައި ހައްޔަރުކޮށްފައިވަނީ ނިޝާމާގެ ފިރިމީހާ ކަމަށް ނޮޅިވަރަމު ކައުންސިލުންވަނީ ވިދާޅުވެފައެވެ. އޭނާ ހައްޔަރުކޮށްފައިވަނީ ކުޅުދުއްފުށީގައި ހުއްޓާ ކަމަށް މަޢުލޫމާތު ލިބެއެވެ. އޭނާ ކުޅުދުއްފުއްޓަށް ދިޔުމަށް ލޯންޗު ހަމަޖައްސާފައިވަނީ ޑޮކްޓަރަށް ދެއްކުމަށްކުރާ ދަތުރެއްކަމަށް ބުނެ ކަމަށް ކައުންސިލުން މަޢުލޫމާތުދެއެވެ.
އަންހެން މީހާ މަރާލުމުގެ ތުހުމަތު އޭނާއަށް ކުރިނަމަވެސް މީގެކުރިން ގެވެށި އަނިޔާގެ މައްސަލައެއް ނޮޅިވަރަމް ކައުންސިލަށް ރިޕޯޓުކޮށްފައި ނުވާކަމަށް އެކައުންސިލުން ވިދާޅުވެއެވެ. މިމައްސަލައިގައި ހައްޔަރުކޮށްފައިވާ ފިރިހެން މީހާއަކީ ނޮޅިވަރަމަށް ނިސްބަތްވާ މީހެއް ނޫންކަމުން އޭނާގެ ކުށުގެ ރިކޯޑާއި ގުޅޭ މަޢުލޫމާތެއް ކައުންސިލަކަށް ސާފެއް ނޫނެވެ.
ނިޝާމާގެ 3 ކުދިން ތިބެއެވެ. އަންހެން މީހާ ނޮޅިވަރަމްގައި ދިރިއުޅެމުން ދިޔައީ އޭނާގެ މައިންބަފައިންނާއެކުގައި ކަމަށްވުމުން ކުދިން މިހާރު ތިބީ ޢާއިލާގެ ގާތުގައި ކަމަށް ކައުންސިލުންވަނީ މަޢުލޫމާތު ދީފައެވެ.
ނޮޅިވަރަމްގައި މީހަކު މަރާލާފައިވާ ކަމުގެ ރިޕޯޓު ފުލުހުންނަށް ކޮށްފައިވަނީ ހޮނިހިރު ދުވަހު މެންދުރު 1230 ހާއިރު ކަމަށް ފުލުހުން ވިދާޅުވެއެވެ. އަދި ފުލުހުން ސީންއަށް ދިޔައިރު ހޭނެތިފައިވާ މީހަކު ފުލުހުންގެ އެހީތެރިކަމާއެކު ސިއްޙީ މަރުކަޒަށް ގެންދިޔަކަމަށާއި، ގެންދިޔައިރުވެސް އޭނާ ނިޔާވެފައިވާ ކަމަށް ޑޮކްޓަރުންނާއި ހަވާލާދީ ފުލުހުން ވިދާޅުވެއެވެ.