ޗައިނާގެ ރައީސް ޝީ ޖިންޕިންގް ސަޢުދީ ޢަރަބިއްޔާއަށް ވަޑައިގަންނަވައި އެ ޤައުމުގެ ވަލީއަޙުދު މުޙައްމަދު ބިން ސަލްމާނާ ބައްދަލުކުރައްވައިފިއެވެ. ސަޢޫދީ ޢަރަބިއްޔާއަކީ އެމެރިކާގެ ޒަމާންވީ އެކުވެރިއެކެވެ. އަދި، ޗައިނާއަކީ އެމެރިކާއަށް މިހާރު އޮތް އެންމެ ބޮޑު ނުރައްކަލުގެ ގޮތުގައި އެ ޤައުމުން ދެކޭ ޤައުމެވެ. ޝީގެ ދަތުރުފުޅާ ގުޅިގެން އެމެރިކާއިން ވަނީ ނުރުހުން ފާޅުކޮށްފައެވެ.
ޝީއާއި ސަލްމާން ބައްދަލު ކުރައްވާފައި ވަނީ ސަޢޫދީ ވެރިރަށް ރިޔާދުގެ ޔަމާމާ ގަނޑުވަރުގައެވެ. އޭނާގެ މި ދަތުރުފުޅުގެ ތެރެއިން ދެ ޤައުމުގެ ދެމެދުގައި ގުޅުން ބަދަހިކުރުމަށް 30 ބިލިޔަން ޑޮލަރުގެ އަގުހުރި މަޝްރޫޢުތަކެއްގެ އެއްބަސްވުންތަކުގައި ސޮއިކުރާނެ ކަމުގައި ސަޢޫދީ ޢަރަބިއްޔާއިން ވަނީ ހާމަކޮށްފައެވެ.
ޝީ ސަޢޫދީއަށް ވަޑައިގަންނަވައިގެން މި އުޅުއްވަނީ، ކޮވިޑް-19 ފެތުރުން ކޮންޓްރޯލް ކުރުމަށް ޗައިނާގައި އަޅާފައިވާ ހަރުކަށި ފިޔަވަޅުތަކާ ގުޅިގެން އެ ޤައުމުގެ އިޤުތިޞާދަށް ބޮޑެތި ލޮޅުންތަކެއް އަރާފައިވާ ދަނޑިވަޅެއްގައެވެ. އަދި، މިއީ ސަޢޫދީ ޢަރަބިއްޔާއިން ވެސް، އެ ޤައުމުގެ އިޤުތިޞާދު އިތުރަށް ފުޅާކޮށް، އެމެރިކާ ނޫން އެހެން ޤައުމުތަކާ އެކު ސިޔާސީ ގުޅުންތައް އިތުރަށް ހަރުދަނާ ކުރަން މަސައްކަތް ކުރަމުންދާ ދަނޑިވަޅެކެވެ.
ޝީއާއި ސަލްމާންގެ ބައްދަލުވުމުން ފާހަގަކުރެވުނު އެންމެ ބޮޑު އެއް ކަމަކީ، ސަޢޫދީގެ އިޤުތިޞާދު ސިންދަފާތު ކުރުމަށް އެކުލަވައިލާފައިވާ "ވިޜަން 2030" އެޖެންޑާއާއި، ޗައިނާގެ ވިޔަފާރި ފުޅާކުރާ "ބެލްޓް އެންޑް ރޯޑް އިނީޝިއެޓިވް" ކުރިއަރުވަން ގުޅިގެން މަސައްކަތް ކުރުމަށް ދެ ޤައުމުން ސޮއިކޮށްފައިވާ އެއްބަސްވުމެވެ. މީގެ އިތުރުން، ތެލާއި، ގެދޮރުވެރިކަމާއި، ތަޢުލީމީ ދާއިރާއިން ގުޅުންތައް ހަރުދަނާ ކުރުމަށް ވެސް ދެ ޤައުމުން ވަނީ އެއްބަސްވުންތަކެއް އެކުލަވައިލާފައެވެ.
ސަޢޫދީ ޢަރަބިއްޔާއަށް ކުރައްވަމުން ގެންދަވާ ދަތުރުފުޅުގެ ޝީވަނީ ރަސްގެފާނު ސަލްމާނާ ވެސް ބައްދަލު ކުރައްވާފައެވެ. އަދި، 2016ވަނަ އެކުލަވައިލާފައިވާ މުހިންމު އެއްބަސްވުމެއްގައި ދެ ޤައުމުގެ ދެމެދުގައި ވަނީ ސޮއިކޮށްފައެވެ. މިއީ، ދެ ޤައުމުގެ ދެމެދުގައި އޮތް ގުޅުންތައް އިތުރަށް ހަރުދަނާކޮށް، ކޮންމެ ދެ އަހަރަކުން އެއް ފަހަރު، ދެ ޤައުމުގެ ލީޑަރުން ބައްދަލުކުރުމާ ގުޅޭ ގޮތުން ހަދާފައިވާ އެއްބަސްވުމެކެވެ.
"ބައިނަލްއަޤުވާމީ މައިދާނުގައި ސަޢޫދީ ޢަރަބިއްޔާއަކީ މުހިންމު ބާރެއް. އަދި، ސަޢޫދީންނާ އެކު ގާތް ގުޅުމެއް ބާއްވާ، ގުޅުންތައް އިތުރަށް ބަދަހި ކުރުމަކީ ޗައިނާގެ ވަރަށް މުހިންމު ސިޔާސަތެއް،" ރަސްގެފާނު ސަލްމާނާ އެކު ބޭއްވެވި ބައްދަލުވުމުގައި ޝީ ވިދާޅުވިއެވެ. ތެލުގެ ވިޔަފާރީގެ ދާއިރާއިން ސަޢޫދީ ޢަރަބިއްޔާއާ އެކު އިތުރަށް ގުޅުން ބަދަހިކުރަން ބޭނުންވާ ކަމުގައި ވެސް ޝީ ވިދާޅުވިއެވެ.
ސަޢޫދީ ޢަރަބިއްޔާގެ "ވިޜަން 2030" އެޖެންޑާގެ ދަށުން ޗައިނާގެ އިންވެސްޓަރުންނަށް އެ ޤައުމުގައި އިތުރު ފުރުޞަތުތައް ފަހިކޮށްދޭން ބޭނުންވާ ކަމުގައި ސަޢޫދީ އިންވެސްޓްމެންޓް މިނިސްޓަރ ޚާލިދު އަލްފާލިޙު ވިދާޅުވިއެވެ. ޝީގެ މި ދަތުރުފުޅުގައި ދެ ޤައުމުގެ މެދުގައި ގުޅުން ބަދަހި ކުރުމަށް 34 އެއްބަސްވުމެއްގައި ސޮއި ކުރެވޭނެ ކަމުގައި ސަޢޫދީ ޢަރަބިއްޔާއިން ބުނެއެވެ.
މެދުއިރުމަތީގެ ގިނަ ޤައުމުތަކަކީ އެމެރިކާއާ އެކު ގާތް ގުޅުމެއް ބާއްވަމުންދާ ޤައުމުތަކެކެވެ. މީގެ ތެރެއިން ވެސް ސަޢޫދީ ޢަރަބިއްޔާއާއި އެމެރިކާއާ ދެމެދު އޮތް ގުޅުން ފާހަގަ ކުރެވެއެވެ. ދިފާޢީ އަދި އަސްކަރީ ކަންކަމުގައި ސަޢޫދީ ޢަރަބިއްޔާއިން އެންމެ ބޮޑަށް ބަރޯސާވާ ޤައުމަކީ އެމެރިކާއެވެ. ނަމަވެސް، ވިޔަފާރީގެ ދާއިރާއަށް ބަލައިލާއިރު، ސަޢޫދީ އެންމެ ގިނަ އަދަދަކަށް ތެޔޮ ވިއްކާ ޤައުމަކީ ޗައިނާއެވެ. ޗައިނާއިން ދަނީ މެދުއިރުމަތީގެ އެހެން ޤައުމުތަކާ އެކު އޮންނަ ގުޅުންތައް ވެސް އިތުރަށް ބަދަހި ކުރަން މަސައްކަތް ކުރަމުންނެވެ.