ރަޝިޔާއިން ޔޫކްރެއިނަށް އަރައި ކުރަމުންދާ ހަނގުރާމައިގައި އިސްވެ ނިއުކްލިޔަރ ހަތިޔާރު ބޭނުން ނުކުރާނެ ކަމުގައި އެ ޤައުމުގެ ރައީސް ވްލަޑިމިޔަރ ޕުޓިން ވިދާޅުވެއްޖެއެވެ. އޭނާ މިހެން ވިދާޅުވެފައި މި ވަނީ، ރަޝިޔާއިން އެންމެ ފަހުން ދީފައިވާ ވަރުގަދަ މިސައިލް ހަމަލާތަކުގައި ޢާންމުންގެ ހަ މީހަކު މަރުވެފައިވާ ކަމަށް ޔޫކްރެއިންގެ ރައީސް ވޮލޮޑޮމީރް ޒެލެންސްކީ ވިދާޅުވެފައިވާ ދަނޑިވަޅެއްގައެވެ.
ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފަށާފައި ވަނީ ފެބުރުވަރީ މަހުގެ 24ވަނަ ދުވަހުއެވެ. މި ހަނގުރާމައިގައި ހާސިލުކުރަން ރަޝިޔާއިން ކަނޑައަޅާފައިވާ ލަނޑުދަނޑިތައް އަދި މިހާތަނަށް ހާސިލުވެފައި ނުވާއިރު، މިއީ ދިގުލައިގެންދާނެ ހަނގުރާމައަކަށް ވެދާނެ ކަމުގައި ޕުޓިން ވިދާޅުވިއެވެ. ރަޝިޔާގެ އެންމެ ބޮޑު ލަނޑުދަނޑިއަކީ ޒެލެންސްކީގެ ސަރުކާރު ވައްޓައިލާ، ޑޮންބާސްގެ އިތުރުން ޔޫކްރެއިނުގެ އެހެން ބައެއް ސަރަޙައްދުތައް ހިފުމެވެ.
ހަނގުރާމައިގައި ރަޝިޔާއިން ވަނީ ޔޫކްރެއިނުގެ ހަތަރު ސަރަޙައްދަކަށް އަތްގަދަ ކޮށްފައެވެ. އެއީ ޑޮންޓެސްކް، ލުހާންސްކް، ޚާރްސަން އަދި ޒަޕޮރީޜިޔާއެވެ. ނަމަވެސް، ބޮޑެތި ނާކާމިޔާބީތަކެއް ކުރިމަތިވެ، ރަޝިޔާ ސިފައިންނަށް ދާދި ފަހުން ވަނީ ޔޫކްރެއިނުގެ ދެކުނުގައިވާ ޚާރްސަންއިން ފައިބަން ޖެހިފައެވެ. ހަނގުރާމައިގައި ރަޝިޔާއިން ނިއުކްލިޔަރ ހަތިޔާރު ބޭނުންކޮށްފާނެ ކަމުގެ ބިރު އުފެދިފައި ވަނީ ލިބެމުންދާ ނާކާމިޔާބީތަކާ ގުޅިގެންނެވެ.
ރަޝިޔާއިން އިސްވެ ޔޫކްރެއިނަށް ނިއުކްލިޔަރ ހަމަލާއެއް ނުދޭނެ ކަމުގައި ޕުޓިން ވިދާޅުވި ނަމަވެސް، ކުރިން އޭނާ ވަނީ މި ހަނގުރާމައިގައި ނިއުކްލިޔަރ ހަތިޔާރު ބޭނުން ކުރަން ޖެހިދާނެ ކަމުގެ އިޝާރާތެއް ދެއްވާފައެވެ. އޭނާ ވިދާޅުވެފައި ވަނީ، ޔޫކްރެއިނުގައި އަތްގަދަ ކޮށްފައިވާ ސަރަޙައްދުތަކަކީ ރަޝިޔާގެ ބިންތަކެއް ކަމަށާއި، އެ ބިންތައް ދިފާޢުކުރަން ނުރައްކާތެރި ހަތިޔާރު ބޭނުން ކުރަން ރަޝިޔާއިން ފަސް ނުޖެހޭނެ ކަމުގައެވެ.
"ނިއުކްލިޔަރ ހަތިޔާރުގެ ނުރައްކާތެރިކަން ދަނީ އިތުރުވަމުން. އެއީ އޮތް ބިރެއް. އެއީ ސިއްރެއް ނޫން،" ޕުޓިން ވިދާޅުވިއެވެ. އަދި، ރަޝިޔާއިން ނިއުކްލިޔަރ ހަތިޔާރެއް ބޭނުން ކުރަން ނިންމާނީ، ރަޝިޔާއާ ދެކޮޅަށް އެ ފަދަ ހަތިޔާރެއް ބޭނުންކޮށްފި ނަމަ، އެ ކަމުގެ ބަދަލުހިފުމުގެ ގޮތުން ކަމުގައި ވެސް އޭނާ ވިދާޅުވިއެވެ.
ރަޝިޔާއިން އުންމީދު ކޮށްފައި ވަނީ މި ހަނގުރާމައަކީ މަދު ދުވަސްކޮޅެއްގެ ތެރޭގައި ކާމިޔާބު ކުރެވޭނެ ހަނގުރާމައެއް ކަމުގައެވެ. އަދި ޔޫކްރެއިން ސިފައިން އަމާންދީ، ރަޝިޔާގެ ލަނޑުދަނޑިތައް ހާސިލު ކުރެވޭނެ ކަމުގައެވެ. ނަމަވެސް، ޔޫކްރެއިން ސިފައިން ވަނީ އެ މީހުންގެ ޤައުމުގެ މިނިވަންކަމާއި ސިޔާދަތު ހިމާޔަތް ކުރަން ތެދުވެ، ރަޝިޔާ ސިފައިންނާ ދެކޮޅަށް ވަރުގަދައަށް ހަނގުރާމަކުރަން ފަށާފައެވެ.
ޚާރްސަންއިން ފައިބަން ޖެހުމުން ރަޝިޔާއިން ވަނީ ޔޫކްރެއިނުގެ ވެރިރަށް ކީވްގެ އިތުރުން ބޮޑެތި އެހެން ރަށްތަކަށް ވަރަގަދަ މިސައިލް ހަމަލާތަކެއް ދޭން ފަށާފައެވެ. މި ހަމަލާތައް އަމާޒު ކުރަމުން ދަނީ ކަރަންޓު ފަދަ ޒަރޫރީ ޚިދުމަތްތައް ދިނުމަށް ބޭނުންވާ ވަސީލަތްތަކަށެވެ. މި ހަމަލާތަކާ ގުޅިގެން ޔޫކްރެއިނުގެ އެތަކެއް މިލިޔަން ރައްޔިތުންނަށް މިހާރު ދިރިއުޅެމުން ދަނީ ކަރަންޓާއި ފެނުގެ ޚިދުމަތާ ނުލައެވެ.
ހަމަލާތައް އިތުރަށް ވަރުގަދަ ކުރަން ރަޝިޔާއިން ދާދިފަހުން ވަނީ އެ ޤައުމުގެ އަސްކަރިއްޔާއަށް އިތުރު ސިފައިން ވެސް ވައްދާފައެވެ. މި ގޮތުން، 300,000 މީހުން އަސްކަރިއްޔާއާ އަލަށް ގުޅިފައިވާއިރު، މީގެ ތެރެއިން 150,000 ސިފައިން މިހާރު ވެސް ތިބީ ޔޫކްރެއިނުގެ ސަރަޙައްދުތަކުގައެވެ. އަދި، 70,000 ސިފައިން މިހާރު ވެސް ހަނގުރާމައިގެ ކުރީ ސަފުގައި ހަރަކާތްތެރިވަމުންދާ ކަމުގައި ޕުޓިން ވިދާޅުވިއެވެ.