އ.ދ.ގެ އިންސާނީ ޙައްޤުތަކާބެހޭ މަޖިލީހުގެ ނައިބު ރައީސެއްގެ މަޤާމަށް ދިވެހިރާއްޖެ

އ.ދ.ގެ އިންސާނީ ޙައްޤުތަކާބެހޭ މަޖިލީހުގެ ނައިބު ރައީސެއްގެ މަޤާމަށް ދިވެހިރާއްޖެ ހޮވިއްޖެއެވެ.

ސްވިޓްޒަލޭންޑްގެ ޖެނީވާގައި މިއަދު ކުރިއަށްދިޔަ އިންތިޚާބުގައި މިމަޤާމަށް ދިވެހިރާއްޖެ ހޮވިފައިވަނީ 2023 ވަނަ އަހަރު އ.ދ. ގެ އިންސާނީ ޙައްޤުތަކާބެހޭ މަޖިލީހުގައި އޭޝިއާ ޕެސިފިކް ސަރަހައްދުގެ ޤައުމުތައް ތަމްޞީލުކުރުމަށެވެ.

ދިވެހި ހާރިޖިއްޔާއިން ވިދާޅުވީ އ.ދ. ގެ 47 މެމްބަރު ޤައުމެއް އެކުލެވޭ، އަދި އިންސާނީ ޙައްޤުތަކާ ބެހޭ ކަންކަމުގައި ވަކާލާތުކޮށް، މަޝްވަރާކުރުމަށް ބައިނަލްއަޤްވާމީ ފެންވަރުގައި ކަނޑައެޅިފައިވާ އެންމެ މުހިންމު މަޖިލީހުގެ މިފަދަ އިސް މަޤާމަކަށް ދިވެހިރާއްޖެއަށް އާދެވުމަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ޚާރިޖީ ސިޔާސަތު ދުނިޔެއިން ބަލައިގަނެފައިވާކަމުގެ ރަމްޒެއްކަމަށެވެ.

އަދި އ.ދ. ގެ އިންސާނީ ޙައްޤުތަކާ ބެހޭ މަޖިލީހުގެ ބިއުރޯއިން ޖާގަ ލިބުމަކީ ދިވެހިރާއްޖެއިން އިންސާނީ ޙައްޤުތައް ޙިމާޔަތްކޮށް ކުރިއެރުވުމަށް ކުރާ މަސައްކަތުގެ އަގު އ.ދ. ގެ އެހެން މެމްބަރު ޤައުމުތަކުން ވަޒަންކުރާ މިންވަރު ދޭހަވާކަމަށް ދިވެހި ހާރިޖިއްޔާއިން ނެރުނު ބަޔާނުގައިވެއެވެ.

މިމަޤާމަށް ދިވެހިރާއްޖެ ހޮވިފައިވަނީ އިންސާނީ ޙައްޤުތަކާބެހޭ ބައިނަލްއަޤްވާމީ ޤަރާރަށް 75 އަހަރު ފުރުމުގެ މުނާސަބަތުގެ އެއް ދުވަސް ކުރިންނެވެ. އެހެންކަމުން، މިއީ މިޤަރާރުގައި ބަޔާންކުރާ ޕްރިންސިޕަލްތަކަށާއި، ދިވެހިރާއްޖޭގެ ޤާނޫނު އަސާސީ އިން ކަށަވަރުކޮށް ބަޔާންކުރާ ޙައްޤުތައް ދަމަހައްޓައި، ދުނިޔޭގެ ފެންވަރުގައި އެޙައްޤުތަކަށް އިޙްތިރާމު ހޯދައި ވަކާލާތުކުރުމަށް ދިވެހިރާއްޖެއަށް ލިބިފައިވާ މުހިންމު ފުރުޞަތެއްކަމަށްވެސް ދިވެހި ހާރިޖިއްޔާއިން ވިދާޅުވެއެވެ.

އ.ދ. ގެ އިންސާނީ ޙައްޤުތަކާ ބެހޭ މަޖިލީހުގެ 2023 ވަނަ އަހަރުގެ ރިޔާސަތު ބެލެހެއްޓުމަށް ހޮވިފައިވަނީ ޗެކް ރިޕަބްލިކްއެވެ. އަދި އެކައުންސިލްގެ 2023 ވަނަ އަހަރުގެ ނައިބު ރައީސްކަމަށް ދިވެހިރާއްޖޭގެ އިތުރުން ބޮލީވިއާ، ގޭމްބިއާ އަދި ލަކްސެމްބަރގް ވަނީ ހޮވިފައެވެ.