2030ވަނަ އަހަރުގެ ކުރިން ރާއްޖެއިން އެޗް.އައި.ވީ، ހެޕަޓައިޓިސް އަދި އެސް.ޓީ.އައި ނައްތާލުމަށް ޤައުމީ ފެންވަރުގެ ޕްލޭނެއް އިފްތިތާޙުކޮށްފިއެވެ.
މި ޕްލޭން އިފްތިތާޙުކޮށްފައިވަނީ، އެއިޑްސް ދުވަސް ފާހަގަކުރުމަށް ގއ.އަތޮޅުގައި ކުރިއަށްދާ ހަރަކާތްތަކުގެ ތެރެއިން، ވިލިނގިލީގައި ބޭއްވި ރަސްމިއްޔާތުގައިއެވެ.
މިރަސްމިއްޔާތުގައި އެޗް.އައި.ވީ، ހެޕަޓައިޓިސް އަދި ސެކްޝުއަލީ ޓްރާންސްމިޓެޑް އިންފެކްޝަން (އެސް.ޓީ.އައި) ނޭޝަނަލް ސްޓްރެޓެޖިކް ޕްލޭން އިފްތިތާޙުކޮށްދެއްވީ ރައީސުލްޖުމްހޫރިއްޔާގެ އޮފީހުގެ ސްޕެޝަލް އެޑްވައިޒަރ އޮން ސޯޝަލް ޕޮލިސީ ޑރ. މުޞްޠަފާ ލުޠުފީއެވެ. މިއީ އެޗް.އައި.ވީ / ހެޕަޓައަޓިސް އަދި ޖިންސީ ގުޅުމުން އަރާ އެހެނިހެން ބަލިތައް ކޮންޓްރޯލްކޮށް، ރައްކާތެރި ކުރުމަށްޓަކައި އެކުލަވާލެވިފައިވާ 5 އަހަރުގެ ގައުމީ ޕްލޭންއެކެވެ.
މި ރަސްމިއްޔާތުގައި ވާހަކަފުޅުދައްކަވަމުން ހެލްތް މިނިސްޓަރ އަޙުމަދު ނަސީމް ވިދާޅުވީ މިއަދު އިފްތިތާޙުކުރި ޕްލޭނަކީ އެއިޑްސް، ހެޕަޓައިޓިސް އަދި ޖިންސީ ގުޅުމުން އަރާ އެހެނިހެން ބަލިތައްވެސް، 2030ވަނަ އަހަރުގެ ކުރިން ރާއްޖެއިން ނައްތާލުމުގެ އަމާޒުގައި ފެށި މަސައްކަތެއްކަމަށެވެ. އަދު މިކަމުގައި އެންމެ މުހިންމުކަމަކީ އާއްމުން ހޭލުންތެރިވެ، ދިރިއުޅުމުގެ ނޭދެވޭ އާދަތަކުން މުޖުތަމަޢު ދުރުހެލިވުންކަމަށް މިނިސްޓަރ ވިދާޅުވިއެވެ.
މިނިސްޓަރ ނަސީމް ވިދާޅުވީ މިފަދަ ބަލިތަކުގެ ފަރުވާނެ ނިޒާމު މިހާރުވެސް ރާއްޖޭގައި ފުޅާކޮށްފައިވާކަމަށެވެ. އެގޮތުން ބައެއް ބަލިތަކުގެ ޓެސްޓުތައް ސިއްޙީ މަރުކަޒުތަކާއި ހޮސްޕިޓަލްތަކުގައި ޓެސްޓުކުރެވޭނެ އިންތިޒާމު މިހާރު ހަމަޖައްސާފައިވާކަމަށާއި އަދި އަންނަ އަހަރުގެ ފުރަތަމަ ކުއާޓަރުން ފެށިގެން، ހެޕަޓައިޓިސްއަށް ޓެސްޓުކުރެވޭނެ ފަސޭހަ އިންތިޒާމްވެސް ރާއްޖޭގެ އެކި ކަންކޮޅުތަކުގައި ހަމަޖެހިގެންދާނެކަމަށް މިނިސްޓަރ ވިދާޅުުވިއެވެ.
މިނިސްޓަރ ވިދާޅުވީ މިފަދަ ބަލިތައް ރާއްޖޭގައި ތަޙައްމަލުކުރާ މީހުންނަށް ބޭނުންވާ ބޭސްފަރުވާ، އާސަންދައާއި އެސްޓީއޯ މެދުވެރިކޮށް ދަނީ ލިބެމުންކަމަށެވެ.
"2030ގެ ކުރިން މި ބަލިތައް ނައްތާލެވޭނެކަމުގެ އުއްމީދު ބޯޑު. މަސައްކަތްކޮށް ރާއްޖެއިން މި ބަލިތައް ނައްތާލެވޭނެކަމުގެ ޔަގީންކަން ޑަބްލިއުއެޗްއޯއިންވެސް ދޭ. މީގެ ކުރިންވެސް ރާއްޖެއަކީ މިފަދަ އެކި ބަލިތައް ނައްތާލުމުގައި މުޅި ސަރަޙައްދުގައުވެސް ނަމޫނާ ޤައުމެއް." މިނިސްޓަރ ވިދާޅުވިއެވެ.
މި ރަސްމިއްޔާތުގައި ހެލްތް ޕޮރޮޓެކްޝަން އެޖެންސީގެ ޑިރެކްޓަރ ޖެނެރަލް މައިމޫނާ އަބޫބަކުރު ވިދާޅުވީ މިފަދަ ބަލިތައް ރާއްޖޭގައި މިހާރަށްވުރެ ބޮޑަށް ފެތުރުމުގެ ފުރުޞަތު އެބައޮތްކަމަށެވެ. ނަމަވެސް ރާއްޖެއިން މި ބަލިތައް ނައްތާލެވޭނެކަމަށާއި ބައްޔަށް އަވަހަށް ޓެސްޓުކޮށް ފަރުވާ އަވަހަށް ފެށުމަކީ އެންމެ މުހިންމު މަސައްކަތް ކަމަށެވެ. އަދި ހެލްތް މިނިސްޓްރީއިން މި ފެށި މަސައްކަތްތަކާއެކު، މުޅި ރާއްޖޭގައި ބަލިތަކަށް ޓެސްޓުކުރުމުގެ ނިޒާމު ވަތުގަދަކޮށް، އާއްމުން ހޭލުންތެރިކުރުމަށް ގިނަ މަސައްކަތްތަކެއް ކުރާނެކަމަށް މައިމޫނާ ވިދާޅުވިއެވެ.
"ގއ.އަތޮޅުގައި މި ކުރިއަށްދާ ޕްރޮގްރާމްތަކުގައިވެސް އާއްމުން މިކަމަށް ދޭ އަހަމިއްޔަތުކަން ފެނިއްޖެ. އަދި ސިއްހީ ނިޒާމުން ދެމުންދާ އެއްބާރުލުން ފެނިއްޖެ. އެގޮތުން މުޖުތަމަޢު ހޭލުންތެރިކޮށް، ޓެސްޓުކުރުމާއި އަދި ސިއްޙީ ޚިދުމަތްތެރިން ރަމްތީންކުރުމުގެ މުހިންމު މަސައްކަތްތަކެއް ގެންދެވިއްޖެ" ޑީޖީ މައިމޫނާ ވިދާޅުވިއެވެ.
ރާއްޖޭގައި އެއިޑްސްދުވަސް މިއަހަރު ރަސްމީކޮށް ފާހަގަކުރަނީ ގއ.އަތޮޅުގައެވެ. އެގޮތުން މި އަތޮޅުގެ 3 ރަށެއްގައި ގިނަ ހަރަކާތްތަކެއް ވަނީ ފަށާފައެވެ.
ވިލިނގިލީގައި ބޭއްވި ރަސްމިއްޔާތަށްފަހު އާއިލީ ހަވީރެއްވެސް އެރަށުގައި ވަނީ ބައްވާފައެވެ. މި ހަވީރުގައި އެކި އުމުރުފުރާގެ މީހުންނަށް ދުޅަހެޔޮ ސިއްޙަތެއްގައި ހުރުމަށާއި، ދިރިއުޅުން ބައްޓަން ކުރާނެ ގޮތުގެ މަޢުލޫމާތު ދީފައިވެއެވެ. އަދި ކުޑަކުދިންނަށް ކުޅިވަރުތައްވެސް މި އާއިލީ ހަވީރުގެ ތެރެއިން ކުރިއަށް ގެންގޮސްފައިވެއެވެ.