ޔަހޫދީ އިސްރާޢީލުގެ ސިފައިން އެ މީހުން އަޅުވެތިކޮށްފައިވާ ފަލަސްޠީނުގެ ބިންތަކަށް އަރައި ހިންގަމުންދާ ލާއިންސާނީ އުދުވާންތަކުގައި ފަލަސްޠީނުގެ ހަތަރު މުޖާހިދުން ޝަހީދު ކޮށްލައިފިއެވެ. މީގެ ތެރެއިން ތިން މީހަކު ޝަހީދު ކޮށްލާފައި ވަނީ ހުޅަނގު އައްސޭރީގެ ޖަނީންގައި އިސްރާޢީލުގެ ސިފައިން ހިންގި އުދުވާންތަކެއްގައެވެ. ހަތަރު މީހާ ޝަހީދުކޮށްލީ ސިލްވާދް ކިޔާ ރަށެއްގައެވެ.
ފަހަކަށް އައިސް ކޮންމެ ދުވަހަކު ވެސް އިސްރާޢީލުގެ އިސްތިއުމާރީ ސިފައިން ދަނީ ފަލަސްޠީނު ރައްޔިތުންގެ ބިންތަކަށް އަރައި އުދުވާންތައް ހިންގަމުންނެވެ. އެ މީހުންގެ ގެދޮރަށް ރޭޑު ޖަހަމުންނެވެ. އަދި، ބޮން އަޅައި، އެ މީހުންގެ ގެދޮރު ސުންނާފަތި ކުރަމުންނެވެ.
ފަލަސްޠީނުގެ ޞިއްޙަތާ ބެހޭ ވުޒާރާއިން ބުނީ ޖަނީންގައި ޔަހޫދީންގެ ސިފައިން ތިން މީހުން ޝަހީދު ކޮށްލާފައި ވަނީ ބަޑީގެ ހަމަލާތަކެއްގައި ކަމުގައެވެ. އެ މީހުން ޖަނީނަށް އަރާފައި ވަނީ ފަލަސްޠީނުގެ މުޖާހިދުންތަކެއް ހޯދައި، އެ މީހުން ހައްޔަރު ކުރުމުގެ ނަމުގައެވެ. މި އުދުވާން ހިންގާފައި ވަނީ ފަތިހުގެ ވަގުތު ޖަނީންގެ ރައްޔިތުން ނިދާފައި ތިއްބައެވެ.
ފަލަސްޠީނުގެ މިނިވަންކަމަށް ޖިހާދު ކުރަމުންދާ އިސްލާމިކް ޖިހާދުން ބުނީ ޝަހީދު ކޮށްލާފައިވާ ތިން މީހުންނަކީ އެ ޖަމާޢަތުގެ މެންބަރުން ކަމުގައެވެ. ޝަހީދު ކޮށްލާފައިވާ ތިން މީހުންނަކީ އައްތާ ޝަލަބީއާއި، ސިދުޤީ ޒަކަރުނާއާއި، ތާރިޤް ދަމޭޖް ކަމުގައި ޖަނީންގެ އިބްނު ސީނާ ހޮސްޕިޓަލުން ބުނެއެވެ.
ޔަހޫދީ ސިފައިންގެ ޝިކާރައަކަށްވެ ޝަހީދުވެފައިވާ ހަތަރު ވަނަ މީހަކީ 32 އަހަރުގެ މުޙާޖިދު މަޙްމޫދު ޙަމީދެވެ. އޭނާ ޝަހީދު ކޮށްލާފައި ވަނީ ހުޅަނގު އައްސޭރީގެ ރަށެއް ކަމުގައިވާ ސިލްވާދުގައި ޔަހޫދީ ސިފައިން ހިންގި އުދުވާނެއްގައެވެ. ޙަމީދު ޝަހީދު ކޮށްލާފައި މި ވަނީ، އިސްރާޢީލުގެ ޖަލެއްގައި 11 އަހަރު ހޭދަ ކުރުމަށް ފަހު، އޭނާ މިނިވަންވިތާ އެއް އަހަރު ފަހުންނެވެ.
ޔަހޫދީންގެ ސިފައިން ފަލަސްޠީނު ރައްޔިތުންގެ ބިންތަކަށް އަރައި މި އަހަރުގެ ތެރޭގައި ހިންގާފައިވާ އުދުވާންތަކުގައި މިހާތަނަށް 150 މީހުން ވަނީ ޝަހީދު ކޮށްލާފައެވެ. އަދި، އެތަކެއް ސަތޭކަ ބަޔަކު ޒަޚަމު ކޮށްލާފައެވެ. މީގެ ތެރޭގައި ގިނަ އަދަދެއްގެ ޢާންމުން ހިމެނެއެވެ. 40 މީހަކު ޝަހީދު ކޮށްލާފައި ވަނީ ޖަނީންގައެވެ. އިތުރު 49 މީހުން ޝަހީދު ކޮށްލާފައި ވަނީ އެންމެ ތިން ދުވަހުގެ ތެރޭގައި ޢައްޒާއަށް ދިން ވަރުގަދަ ހަމަލާތަކެއްގައެވެ.
ޝަހީދު ކޮށްލާފައިވާ މީހުންގެ ތެރޭގައި 12 އަހަރުގެ ކުއްޖެއް ވެސް ހިމެނެއެވެ. މީގެ އިތުރުން، އަލް ޖަޒީރާގެ ނޫސްވެރިއެއް ކަމުގައިވާ ޝީރީން އަބޫ އަކްލަޙް ވެސް މަރުވެފައި ވަނީ ޔަހޫދީންގެ ސިފައިން ދިން ބަޑީގެ ހަމަލާއެއްގައެވެ.