އަފްޣާނިސްތާނުގެ އުތުރުގައިވާ ރަށެއް ކަމުގައިވާ މަޒާރުއްޝަރީފްގެ މަގެއްގެ މަތީގައި ބޮމެއް ގޮއްވައިލައިގެން ދިން ހަމަލާއެއްގައި ހަތް މީހުން މަރުވެއްޖެއެވެ. މަގުމަތީގައި ދުއްވާފައި ދިޔަ ބަހަކަށް އަމާޒުކޮށް ދިން މި ހަމަލާގައި ގިނަ އަދަދެއްގެ ބަޔަކު ޒަޚަމުވިއެވެ.
މި ހަމަލާ އަމާޒުކޮށްފައި ވަނީ ތެޔޮ އުފައްދާ ކުންފުންޏެއްގައި މަސައްކަތް ކުރާ މުވައްޒަފުންތަކެއް ގޮވައިގެން ދަތުރު ކުރަމުންދިޔަ ބަހަކަށް ކަމުގައި މަޒާރުއްޝަރީފްގެ އޮފިޝަލުން ބުނެއެވެ. މި ހަމަލާގެ ފަހަތުގައި ވަނީ ކޮން ބަޔެއް ކަން އަދި ސާފެއް ނޫނެވެ. ނަމަވެސް، މި ހަމަލާ ދީފައި މި ވަނީ، އަފްޣާނިސްތާނުގެ އެކި ކަންކޮޅުތަކުގައި ސަލާމަތީ ފިޔަވަޅުތައް ވަރުގަދަ ކޮށްފައިވާ ކަމަށް ތާލިބާނުން ބުނަމުންދާ ދަނޑިވަޅެއްގައެވެ.
އަފްޣާނިސްތާނުގެ އިންތިޚާބީ ސަރުކާރު ވައްޓައިލާ، ތާލިބާނުން އެ ޤައުމުގެ ވެރިކަމާ ހަވާލުވީ 2021ވަނަ އަހަރުގެ އޮގަސްޓު މަހުއެވެ. އެއަށްފަހު، ޤައުމުގައި އަމަންއަމާން ކަން ޤާއިމުކޮށް، ސަލާމަތީ ކަންކަން ވަރުގަދަ ކުރަން މަސައްކަތް ކުރަމުންދާ ކަމުގައި ތާލިބާނުން ބުނެއެވެ. ނަމަވެސް، ދޭތެރެދޭތެރެއިން ދޭ މި ފަދަ ނުރައްކާތެރި ބޮމުގެ ހަމަލާތަކަށް ނިމުމެއް ގެނެވިފައެއް ނުވެއެވެ.
ތާލިބާނުންގެ އިތުރުން ޢާންމުންނަށް އަމާޒުކޮށް ހަމަލާތައް ދެމުން ދަނީ އައި.އެސް. ޖަމާޢަތަށް ވަފާތެރި ހަނގުރާމަވެރިން ކަމަށް ތާލިބާނުން ބުނެއެވެ. އެ ޖަމާޢަތުން ވަނީ، ބައެއް ހަމަލާތަކުގެ ޒިންމާ އުފުލާ ކަމުގައި ވެސް ބުނެފައެވެ.
ހުސްވި ނޮވެންބަރު މަހުގެ ތެރޭގައި ވެސް މި ފަދަ ނުރައްކާތެރި ބޮމުގެ ހަމަލާއެއް ދީފައިވެއެވެ. މަޒާރުއްޝަރީފްގެ އިރުދެކުނުން އޮންނަ އައިބަކްގެ މަދަރުސާއަކަށް އަމާޒުކޮށް ދިން ބޮމުގެ ހަމަލާގައި 19 މީހުން މަރުވެ، އިތުރު 24 މީހަކު ޒަޚަމުވިއެވެ. މި ހަމަލާގައި މަރުވި މީހުންގެ ތެރޭގައި ސްކޫލްގެ ދަރިވަރުން ވެސް ހިމެނެއެވެ.