އަލް ޖަޒީރާގެ ނޫސްވެރިއެއް ކަމުގައިވާ ޝީރީން އަބޫ އަކްލަޙް މަރައިލި މައްސަލަ އެ ނޫހުން ބައިނަލްއަޤްވާމީ ޖިނާއީ ކޯޓު (އައި.ސީ.ސީ)އަށް ހުށަހަޅައިފިއެވެ. އަލް ޖަޒީރާއިން ޝީރީންގެ މަރުގެ މައްސަލަ އައި.ސީ.ސީ.އަށް ހުށަހަޅާފައި މި ވަނީ، އޭނާ މަރުވީ ޔަހޫދީ އިސްރާޢީލުގެ ސިފައިން ދިން ބަޑީގެ ހަމަލާއެއްގައި ކަމަށް ތުހުމަތުކޮށެވެ.
މި ތުހުމަތަށް އިސްރާޢީލުން ދިޔައީ އެތަކެއް މަސްތަކެއް ވަންދެން ދެކޮޅު ހަދައި، ދޮގު ކުރަމުންނެވެ. ނަމަވެސް، އިސްރާޢީލުން ވެސް ފަހުން ވަނީ އޭނާ މަރުވީ އިސްރާޢީލުގެ ސިފައިންގެ މީހަކު ދިން ބަޑީގެ ހަމަލާއެއްގައި ކަމަށް އެއްބަސްވެފައެވެ. ޝީރީން މަރައިލާފައި ވަނީ ޔަހޫދީ އިސްރާޢީލުން ވެރިވެގަނެފައިވާ ހުޅަނގު އައްސޭރީގެ ޖެނިންނަށް އަރައި ހިންގަމުން ދިޔަ އުދުވާންތަކެއްގެ ޚަބަރު ރިޕޯޓު ކުރަމުން ދަނިކޮށް، މޭ މަހުގެ 11 ވަނަ ދުވަހުއެވެ.
ޝީރީން މަރައިލާފައި ވަނީ ޔަހޫދީ ސިފައިން ބަޑިޖަހައި ދިން ހަމަލާތަކެއްގައި ކަމަށް ފަލަސްޠީނުން އެންމެ ފުރަތަމަ ދުވަހުން ފެށިގެން ވެސް ދިޔައީ ބުނަމުންނެވެ. ނަމަވެސް، ޔަހޫދީ އިސްރާޢީލުން ދިޔައީ މި ކަމާ ދެކޮޅު ހަދަމުންނެވެ. ޝީރީން މަރުވީ ކޮން ބަޔަކު ދިން ބަޑީގެ ހަމަލާއެއްގައި ކަން ކަށަވަރު ކުރުމަށް ފަލަސްތީނުގެ އިތުރުން އެމެރިކާއިން ވަނީ ތަހުޤީޤު ކޮށްފައެވެ.
ޝީރީންގެ ހަށިގަނޑަށް އަރާފައިވާ ވަޒަން ތަހުޤީޤު ކުރުމަށް ފަހު އެމެރިކާއިން ވެސް ވަނީ، އޭނާ މަރުވީ ޔަހޫދީ އިސްރާޢީލުގެ ސިފައިން ދިން ހަމަލާއެއްގައި ކަމަށް ބެލެވޭ ކަމުގައި ބުނެފައެވެ. ޝީރީން މަރުވީ ޔަހޫދީ ސިފައިން ދިން ބަޑީގެ ހަމަލާތަކެއް ކަމުގައި އ.ދ.ގެ އިންސާނީ ޙައްޤުތަކާ ބެހޭ އިދާރާއިން ވެސް ވަނީ ބުނެފައެވެ.
ޝީރީން މަރުވި ހާދިސާއާ ގުޅޭ އިތުރު މަޢުލޫމާތާއި ހެކިތަކެއް ހޯދާފައިވާނެ ކަމުގައި އަލް ޖާޒީރާއިން ބުނެއެވެ. އަދި، ހެކީގެ ގޮތުގައި ވީޑިޔޯއާއި ހެކިބަސް ދޭނެ ފަރާތްތަކުގެ ނަންތައް އައި.ސީ.ސީ.އަށް ހުށަހަޅާފައިވާ ކަމުގައި ވެސް އެ ނޫހުން ބުނެއެވެ. އަދި، އެ ހެކިތަކަށް ބަލާއިރު، އިސްރާޢީލުގެ ޔަހޫދީ ސިފައިން ނޫސްވެރިންނާ އަމާޒުކޮށް ބަޑީގެ ހަމަލާތަކެއް ދީފައި ވަނީ ގަސްދުގައި ކަން ސާބިތުވާނެ ކަމަށް ވެސް އެ ނޫހުން ބުނެއެވެ.
"ޝީރީން މަރުވީ އިސްރާޢީލުގެ ސިފައިންނާއި ފަލަސްޠީނުގެ މުޖާހިދުންނާ ދެމެދު ބަދަލު ކުރަމުންދިޔަ ހަމަލާތަކެއްގެ ތެރެއިން އޮޅުމަކުން ދެވުނު ހަމަލާއެއްގެ ގޮތުގައި ދައްކަން އިސްރާޢީލުން ބުނަމުން ދަނީ ބުހުތާންދޮގު،" އަލް ޖަޒީރާއިން ބުންޏެވެ.
މި މައްސަލަ ބަލައިގަތުމާ މެދު އައި.ސީ.ސީ.އިން އަދި ވަކި ގޮތެއް ނިންމާފައެއް ނުވެއެވެ. އިސްރާޢީލުގެ ޔަހޫދީ ސިފައިންގެ ފައުޖުތަކުން ފަލަސްޠީނުގެ ބިންތަކަށް އަރައި ހިންގަމުންދާ ލާއިންސާނީ ޖާރީމާތައް ތަހުޤީޤު ކުރުމުގެ މަސައްކަތް އައި.ސީ.ސީ.އިން ވަނީ މިދިޔަ އަހަރުގެ ތެރޭގައި ފަށާފައެވެ. ނަމަވެސް، އިސްރާޢީލަކީ އައި.ސީ.ސީ.ގެ މެންބަރު ޤައުމެއް ނޫނެވެ. އަދި، އެ ކޯޓުގެ ނިންމުންތަކަށް ހުރުމަތްތެރިކޮށް ހިތާ ޤައުމެއް ވެސް ނޫނެވެ.
އަލް ޖަޒީރާގެ ނޫސްވެރިއެއް ކަމުގައިވާ ޝީރީންގެ މަރާ ގުޅިގެން ފަލަސްތީނުގެ އިތުރުން ދުނިޔޭގެ އެކި ކަންކޮޅުތަކުގައި ހިތާމަ ފާޅުކުރިއެވެ. ފަލަސްޠީނުގައި ޔަހޫދީންގެ އިސްތިއުމާރީ ބާރުން ހިންގަމުންދާ އިންސާނިއްޔަތާ ޚިލާފު ޖަރީމާތައް ކަވަރު ކުރުމުގެ މަސައްކަތް ޝީރީން ފަށާފައި ވަނީ މީގެ 25 އަހަރު ކުރިންނެވެ.