ރަޝިޔާގެ ރަށްތަކަށް ހަމަލާދޭން ޔޫކްރެއިނުގެ ސިފައިންނަށް ހިތްވަރުދީފައި ނުވާނެ ކަމުގައި އެމެރިކާއިން ބުނެފިއެވެ. އެމެރިކާގެ ޚާރިޖީ ވުޒާރާއިން މިހެން ބުނެފައި މި ވަނީ ރަޝިޔާގެ ދެ ރަށެއްގައިވާ އަސްކަރީ ވައިގެ ބަނދަރުތަކަކަށް ޑްރޯން ހަމަލާތަކެއް ދިނުމާ ގުޅިގެންނެވެ. އެއީ ޔޫކްރެއިނުން އަޑީގައި އޮވެގެން ދީފައިވާ ހަމަލާތަކެއް ކަމަށް ރަޝިޔާއިން ތުހުމަތު ކުރެއެވެ.
ނަމަވެސް، ޔޫކްރެއިނުން އެ ހަމަލާތަކުގެ ޒިންމާ އުފުލާފައެއް ނުވެއެވެ. ޑްރޯން ހަމަލާތައް އަމާޒުކޮށްފައި ވަނީ ސަރަޓޯފް އަދި ރްޔަޒަން ސަރަޙައްދުގައި އޮންނަ ޑްޔަގިލޭވޯއާއި އެންޖެލްސް ވައިގެ ބަނދަރަށެވެ. މި ހަމަލާތަކުގައި ރަޝިޔާ ސިފައިންގެ ތިން މީހުން މަރުވި ކަމުގައި އެ ޤައުމުގެ ދިފާޢީ ވުޒާރާއިން ބުނެއެވެ. އަދި، ދެ އަސްކަރީ މަތިންދާބޯޓަށް ވަނީ ގެއްލުން ލިބިފައެވެ.
"އެމެރިކާއިން ޔޫކްރެއިނަށް ހަތިޔާރު ފޯރުކޮށްދެމުން ދަނީ އެ ޤައުމުގެ މިނިވަންކަމާއި ސިޔާދަތު ހިމާޔަތް ކުރުމަށް. ރަޝިޔާއިން އަތްގަދަ ކޮށްފައިވާ ޔޫކްރެއިނުގެ ސަރަޙައްދުތައް މިނިވަން ކުރުމުގައި ބޭނުން ކުރުމަށް. އެއްވެސް ހާލެއްގައި، ސަރަޙައްދީ އިން ހުރަސްކޮށް، ރަޝިޔާގެ ރަށްތަކަށް ހަމަލާދޭން އެމެރިކާއިން ހިތްވަރުދީފައެއް ނުވާނެ،" މި ކަމާ ގުޅޭ ގޮތުން ވާހަކަފުޅު ދައްކަވަމުން އެމެރިކާގެ ޚާރިޖީ ވުޒާރާގެ ތަރުޖަމާނު ނެޑް ޕްރައިސް ވިދާޅުވިއެވެ.
ނަމަވެސް، ރަޝިޔާގެ އަސްކަރީ ވައިގެ ބަނދަރުތަކަށް ޑްރޯން ހަމަލާތައް ދިނުމުގެ ފަހަތުގައި ވަނީ ޔޫކްރެއިން ކަމަށް އޭނާ ވިދާޅުވެފައެއް ނުވެއެވެ. ވައިގެ ބަނދަރުތަކަށް ހަމަލާދޭން ބޭނުން ކޮށްފައި ވަނީ ކުރީގެ ރޫސީ ވިލާތުގެ ޒަމާނުގައި އުފައްދާފައިވާ ޑްރޯންތަކެއް ކަމުގައި ރަޝިޔާއިން ވެސް ވަނީ ބުނެފައެވެ. އަދި، ރަޝިޔާގެ ރަށްތަކަށް ހަމަލާދޭން އެމެރިކާއިން ފޯރުކޮށްދީފައިވާ ހަތިޔާރު ބޭނުންކޮށްފައި ނުވާ ކަމަށް ވެސް މާހިރުން ޤަބޫލު ކުރެއެވެ.
އެމެރިކާއިން ޔޫކްރެއިނަށް ފޯރުކޮށްދީފައިވާ އެންމެ ބާރުގަދަ އެއް ހަތިޔާރަކީ "ހައިމާސް"ގެ ނަން ދީފައިވާ ރޮކެޓް ސިސްޓަމްތަކެކެވެ. ހައިމާސް ސިސްޓަމްތައް މެދުވެރިކޮށް ރަޝިޔާއަށް ހަމަލާ ނުދެވޭނެ ގޮތަށް އެ ތަކެތީގެ ސޮފްޓްވެއަރއަށް އެމެރިކާއިން ބަދަލު ގެނެސްފައިވާ ކަމަށް އެމެރިކާގެ ނޫހެއް ކަމުގައިވާ ވޯލް ސްޓްރީޓް ޖަރނަލްއިން ރިޕޯޓު ކޮށްފައިވެއެވެ. ނަމަވެސް، މި ކަމާ މެދު އެއްޗެއް ވިދާޅުވާން ޕްރައިސް ވަނީ ދެކޮޅު ހައްދަވާފައެވެ.
އެމެރިކާގެ ރައީސް ޖޯ ބައިޑަން ވެސް ވަނީ، ދުރު ރާސްތާގެ މިސައިލް ސިސްޓަމްތައް ޔޫކްރެއިނަށް ފޯރުކޮށްދިނުމަށް ދެކޮޅު ހައްދަވާފައެވެ. އެމެރިކާއިން ފޯރުކޮށްދޭ ރޮކެޓާއި މިސައިލް ފަދަ ހަތިޔާރު ބޭނުން ކޮށްގެން ޔޫކްރެއިނު ސިފައިން ރަޝިޔާގެ ރަށްތަކަށް ހަމަލާދޭން ފަށައިފި ނަމަ، ހަނގުރާމައިގެ މަސްރަޙު އިތުރަށް ގޯސްވާނެ ކަމުގައި މަސްރަޙު ދިރާސާ ކުރާ ފަރާތްތަކުން ޤަބޫލު ކުރެއެވެ.
ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފަށާފައި ވަނީ ފެބުރުވަރީ މަހުގެ 24ވަނަ ދުވަހުއެވެ. އަދި، ހަނގުރާމައިގެ ތެރެއިން ޔޫކްރެއިނުގެ ހަތަރު ސަރަޙައްދެއް ވަނީ ރަޝިޔާގެ ކޮންޓްރޯލްގެ ދަށަށް ގެންގޮސްފައެވެ. ނަމަވެސް، ޔޫކްރެއިން ސިފައިން މިހާރު ވަނީ އެ ޤައުމުގެ ދެކުނުގައިވާ ޚާރްސަން މިނިވަން ކޮށްފައެވެ. ޚާރްސަންގެ ދެކުނުން އޮންނަނީ ރަޝިޔާއިން 2014ވަނަ އަހަރު އަތްގަދަ ކޮށްފައިވާ ސަރަޙައްދެއް ކަމުގައިވާ ކްރައިމިޔާއެވެ.
ކްރައިމިޔާގައި ރަޝިޔާގެ އަސްކަރިއްޔާއިން ޤާއިމު ކޮށްފައިވާ އަސްކަރީ މަރުކަޒުތަކަށް ވެސް ދާދިފަހުން ވަރުގަދަ ހަމަލާތަކެއް ވަނީ ދީފައެވެ. އަދި، ކްރައިމިޔާއާއި ރަޝިޔާ ގުޅައިދޭ މައި ބްރިޖުގައި ބާރުގަދަ ބޮމެއް ގޮއްވައިލައިގެން އެ ތަނަށް ވެސް ދާދި ފަހުން ވަނީ ބޮޑެތި ގެއްލުންތަކެއް ދީފައެވެ. މި ހަމަލާތަކުގެ ފަހަތުގައި ވެސް ވަނީ ޔޫކްރެއިންގެ އަސްކަރިއްޔާގެ ސްޕެޝަލް ފޯސް ސިފައިން ކަމުގައި ރަޝިޔާއިން ތުހުމަތު ކުރެއެވެ.