ފުލުހުން ހިންގި ޚާއްޞަ އޮޕަރޭޝަނެއްގައި އަތުލައިގަތް 119 ކިލޯގެ މަސްތުވާތަކެތީގެ މައްސަލާގައި ހައްޔަރުކޮށް، ދަޢުވާކޮށްފައިވާ ގދ.ހޯޑެއްދޫ އަލޯރާ، އަޙްމަދު މުޖާހިދު، ޝަރީޢަތް ނިމެންދެން ބަންދުކުރުމަށް ހައިކޯޓުން ޙުކުމްކޮށްފިއެވެ.
ފުލުހުން ކުރިއަށްގެންދދިޔަ ޑްރަގް އޮޕަރޭޝަނެއްގައި، 2 ދުވަސްތެރޭގައި ހެރޮއިންކަމަށް ޝައްކުކުރެވޭ 119 ކިލޯގެ މަސްތުވާތަކެތި އަތުލައިގެންފައިވަނީ މިދިޔަ އަހަރުގެ ޑިސެމްބަރު މަހުގެ ތެރޭގައެވެ. އަދި އެ މައްސަލާގައި 3 މީހަކު ފުލުހުން ހައްޔަރުކުރިއެވެ. އެމީހުންގެ މައްޗަށް ދައުލަތުން އުފުލީ ޑައިފޯމިން ޓްރެކް ކުރުމުގެ ދަޢުވާއެވެ.
މި މައްސަލާގައި ހިމެނޭ ގދ. ހޯޑެއްދޫ އަލޯރާ އަޙްމަދު މުޖާހިދު ޝަރީޢަތް ނިމެންދެން ބަނދުކުރުމަށް ކްރިމިނަލް ކޯޓުން ޢަމުރުކުރީ މާރިޗް މަހުގެ ތެރޭގައެވެ. ޝަރީޢަތް ނިމެންދެން ބަންދުގައި ހުއްޓާ އޭނާ ދޫކޮށްލީ މިދިޔަ ނޮވެމްބަރު މަހުގެ 23 ވަނަ ދުވަހުއެވެ. ނަމަވެސް އެ މައްސަލަ ކްރިމިނަލް ކޯޓުގައި ކުރިއަށް ގެންދާ ސެކްޝަންގައި ދާއިމީ ފަނޑިޔާރަކު ނެތުމުން، އަވަސް މިނެއްގައި ޝަރީޢަތް ކުރިއަށް ނުދާކަމަށް ބުނެ ދައުލަތުން ހައިކޯޓުގައި އިސްތިއުނާފްކުރިއެވެ.
މި މައްސަލާގައި ހައިކޯޓުން ކުރި ޙުކުމުގައި ވަނީ ކްރިމިނަލް ކޯޓުގެ އަމުރުން ޝަރީޢަތުން ވަކި ގޮތެއް ކަނޑައަޅަންދެން އަޙްމަދު މުޖާހިދު ބަންދުގައި ބެހެއްޓުމަށް ނިންމި ނިންމުން، މުރާޖަޢާކޮށްދިނުމަށް އެދި ޕްރޮސިކިއުޓަރ ޖެނެރަލްގެ އޮފީހުން ހުށަހެޅުމުން، އެ އަމުރު، ބާޠިލުކޮށް އަޙްމަދު މުޖާހިދު މިނިވަންކުރީ ބަންދު ކުރި ޙާލަތަށް އެއްވެސް ބަދަލެއް އައިސްގެން ނޫންކަމަށެވެ.
މިގޮތުން، ފުރަތަމަ ކަމަކަށް މައްސަލަ ބަލާ ސެކްޝަނުގައި ދާއިމީ ފަނޑިޔާރަކު ނެތުމުން މައްސަލައިގެ އަޑުއެހުންތައް އެކަށީގެންވާ އަވަސްމިނެއްގައި ކުރިއަށް ގެންދެވިދާނެ ކަމަށް ނުފެންނަކަމަށް ބަޔާން ކުރި ކުރުމަކީ ތުހުމަތުގައިވާ މީހާ ބަންދު ކުރުމަށް ނުވަތަ ބަންދުން ދޫކުރުމަށް ބެލިދާނެ ޤާނޫނީ ސަބަބެއް ނޫންކަމަށް ހައި ކޯޓުގެ ޙުކުމުގައިވެއެވެ. މައްސަލައެއް ލަސްވުމަކީ، ބަންދުގައި ހުންނަންޖެހޭ މީހަކު ދޫކޮށްލަންޖެހޭ ސަބަބެއް ނޫންކަމަށާއި، އެއީ ބަންދުގައި ހުންނަން ނުޖެހޭ މީހަކު ވެސް ބަންދުކުރަން ޖެހޭ ސަބަބެއްވެސް ނޫންކަމަށް ހައިކޯޓުގެ ޙުކުމުގައިވެއެވެ.
މައްސަލަ ބަލާ ކޯޓެއްގައި ނުވަތަ އެ ކޯޓެއްގެ ސެކްޝަނުގައި ނުވަތަ ޖުޑީޝަލް ދާއިރާގެ ކޯޓެއްގައި އެ ވަގުތަށް ދާއިމީ ފަނޑިޔާރަކު ނެތްނަމަ، ޢަމަލު ކުރަންވީ ގޮތް ޤާނޫނުގައި ބަޔާންކުރާކަމަށްވެސް ހައިކޯޓުން ވިދާޅުވިއެވެ. އެހެންކަމުން ދާއިމީ ފަނޑިޔާރަކު ނެތްނަމަ، ޢަމަލު ކުރަންވީ ގޮތް ޤާނޫނުގައި ފަނޑިޔާރަކު ނެތިގެން މައްސަލައެއް ލަސްވާނަމަ، ބަންދުގައި ހުންނަންޖެހޭ މީހަކު މުޖުތަމަޢުއަށް ދޫކުރުމުގެ ބަދަލުގައި ޢަމަލު ކުރަންޖެހޭނީ ޤާނޫނުގައިވާ ގޮތަށް އެމައްސަލައެއް އަވަސް ކުރެވޭނެ ގޮތަކަށް އެހެން ފަނޑިޔާރަކާއި މައްސަލަ ބެލުން ޙަވާލުކޮށްގެންކަމަށްވެސް ހައިކޯޓުގެ ޙުކުމުގައިވެއެވެ.
Our teams have successfully recovered additional 91 packets of narcotic drugs that are suspected to be heroin after really good policing work during the last 48 hours. This makes it a total of 119 packets with the 28 packets seized on Sunday night. Estimated weight is 119 kgs. pic.twitter.com/oDOUxWre4w
— Mohamed Hameed (@M_Hameedh) December 14, 2021
ހައިކޯޓުގެ ޙުކުމުގައި ވަނީ އަޙްމަދު ޖާހިދު ބަންދުގައި ބަހައްޓަންޖެހޭ ޟަރޫރަތެއް ނެތްކަމަށް ކްރިމިނަލް ކޯޓުން ބުނެފައިވަނީ އޭނާ ބަންދުގައި ބަހައްޓަންޖެހޭ މިންވަރަށް ހެކި ލިބިފައި އޮތްކަމަށް ކުރިން ނިންމި ނިންމުންތަކުގެ ޙާލަތު ބަދަލުވީ ގޮތް ބަޔާން ކޮށްދެވޭނެ ޙާލަތެއް ނެތިކަން އެނގޭކަމަށެވެ.
ހައިކޯޓުގެ ޙުކުމުގައި އަޙްމަދު މުޖާހިދު ޝަރީޢަތް ނިމެންދެން ބަންދުކޮށްފައިވާ މައްސަލައަކީ، 100 ކިލޯ ނުވަތަ އެއަށްވުރެ ގިނަ ކިލޯގެ މަސްތުވާތަކެތި ހިމެނޭ މައްސަލައެއްގައި، އޭގެތެރެއިން 80 ވަރަކަށް ކިލޯ އާ އަޙްމަދު މުޖާހިދުއާ ގުޅުވާލެވޭ އެކަށީގެންވާ ހެކިތަކެއް ހުރެގެން ކަން އެނގޭކަމަށް ބުނެފައިވެއެވެ. އަދި މި މައްސަލާގައި ހުށައަޅާފައިވާ ލިޔުންތަކުން އެނގޭ ގޮތުގައި، އެމަސްތުވާތަކެތި މުޖުތަމަޢަށް ފޯރުކޮށްދިނުމުގައި ނުވަތަ މި ކަމުގެ ވިޔާފަރީގައި އަޙްމަދު މުޖާހިދު ޝާމިލުވާކަމަށް ބެލެވޭނެ ހެކިތައް ހުށަހަޅާފައި އެބަހުރިކަމަށްވެސް ޙުކުމުގައިވެއެވެ. ހަމައެހެންމެ، މިމައްސަލައިގެ މައުޟޫޢުގައި ހެކިބަސްދޭން ތިބި ބައެއް ފަރާތްތަކުގެ ހެކިބަސް ޝަރީޢަތަށް ނުނަގާކަން ދެފަރާތުގެ ބަހުންވެސް ސާފުވާކަމަށާއި، އެހެންކަމުން، އަޙްމަދު މުޖާހިދު ބަންދުގައި ބަހައްޓަން ޖެހޭ ޟަރޫރަތެއް ނެތްކަމަށް ދަށުކޯޓުން ބުނާ ބަހުގެ މާނައަކީ ކޮބާކަމެއް އެނގޭކަށް ނެތްކަމަށްވެސް ހައިކޯޓުގެ ޙުކުމުގައިވެއެވެ.
އެހެންކަމުން ހުކުމެއް ކުރެވެންދެން ނުވަތަ ޝަރީޢަތުން ވަކިގޮތެއް ކަނޑައަޅަންދެން އަޙްމަދު މުޖާހިދު ބަންދުގައި ބެހެއްޓުމަށް ނިންމި ނިންމުން ބާޠިލުނުވެ ދެމިއޮތްކަމަށް ކަނޑައެޅީކަމަށް ހައިކޯޓުގެ ޙުކުމުގައިވެއެވެ.
119 ކިލޯގެ މަސްތުވާތަކެތީގެ މި މައްސަލައަކީ މާލެއާއި ހުޅުމާލޭގައި މިދިޔަ އަހަރުގެ ޑިސެމްބަރު މަހު ފުލުހުން ހިންގި ޚާއްޞަ އޮޕަރޭޝަނެކެވެ. މި އޮޕަރޭޝަނުގައި މާލެއާއި ހުޅުމާލޭގެ ވަރަށް ގިނަ ތަންތަން ބަލައި ފާސްކޮށް މަސްތުވާތަކެތި ހޯދާފައިވެއެވެ. ފުލުހުން ތުހުމަތުކުރާ ގޮތުގައި މި މައްސަލައިގެ ފަހަތުގައި ވަނީ ގއ. ހޯނޑެއްދޫ، އަލޯރާ އަރުޝަދު ޚާލިދެވެ. މަސްތުވާތަކެތި އަތުލާގަތްއިރު އަރުޝަދު ހުރީ ލަންކާގައެވެ. އޭނާ ފަހުން ރާއްޖެ އައުމުން ފުލުހުން އޭނާ ހައްޔަރުކުރިއެވެ. ނަމަވެސް ބަންދުގައި ބެހެއްޓޭވަރުގެ ހެއްކެއް ނެތުމުން އޭނާ ވަނީ ދޫކޮށްލާފައެވެ.